ހުރިހާ ދަރިވަރުންނަކީ ވެސް ފަތިސް ނަމާދުން ދުވަސް ފަށާ ބަޔަކަށްވުމަށް އާދަކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދަރިވަރުންގެ ކިބައިން އެދިވަޑައިގެންފި އެވެ.

ދަރިވަރުންގެ ކިބައިން ރައީސް މިކަމަށް އެދިވަޑައިގަތީ ޝަހީދު އަލީ ސްކޫލް ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގަ އެވެ. އެ މަނިކުފާނު ވިދާޅުވީ، ޒުވާނުންގެ ހިތްތަކުގައި ގައުމިއްޔަތުގެ ބިންވަޅު ނެގުމަށް ސަރުކާރުން ވަރަށް ގިނަ މަސައްކަތްތަކެއް ކުރަމުން އަންނަ ކަމަށާއި، ކޮންމެ ދަރިވަރަކު ވެސް ބަލަންވާނީ ގައުމަށް ހިދުމަތްކޮށްދިނުމަށް ކަމަށެވެ.

ތައުލީމީ ހަޔާތަކީ ގައުމާއި، މުޖުތަމައަށް ބޭނުންތެރި ދުވަސްތަކަކަށް ހަދަންޖެހޭނެކަން ފާހަގަކުރައްވަމުން ރައީސް ވިދާޅުވީ، ހަޔާތުގެ ކޮންމެ ވަގުތެއް ހޭދަކުރަންޖެހޭނީ އިސްލާމްދީނާ އެއްގޮތްވާ ގޮތުގެ މަތިން ކަމަށެވެ. އަދިހަމައެހެންމެ އިސްލާމްދީނުގައި ކަންކަން ބަޔާންކޮށްފައިވަނީ މާތް މަގުސަދުތަކެއްގައި ކަމަށް ވެސް ރައީސް ވަނީ ވިދާޅުވެފަ އެވެ.

"ފަރުޟު ފަސް ނަމާދު އަދާކުރުމަށް ހުރިހާ ލޮބުވެތި ދަރިވަރުންނަށް އަޅުގަނޑު ވަރަށް ބޮޑަށް އިލްތިމާސްކުރަން. ވަގުތުން ވަގުތަށް ނަމާދު ކުރުމަށް. ފަތިސް ނަމާދަށް ގަޑިއަށް ހޭލައި، ފަތިސް ނަމާދުކޮށްގެން ދުވަސް ފެށުމަށް ހުރިހާ ކުދިންވެސް އަޒުމު ކަނޑައަޅަން އަޅުގަނޑު އިލްތިމާސްކުރަން. މައިންބަފައިންގެ ކިބައިންވެސް އެދެން ހުރިހާ ކިޔަވާ ކުދިން ދުވަސް ފަށަނީ ގަޑިއަށް ފަތިސް ނަމާދުގެ ގަޑީގައި ތެދުވެ ނަމާދު ކޮށްގެންކަން، އެއީ މައިންބަފައިންގެ ޒިންމާއެއްކަމަށް ކަނޑައަޅައި އެކަން ކަށަވަރުކުރެއްވުމަށް،" --- ރައީސް ވިދާޅުވި އެވެ.

ރައީސް ވިދާޅުވީ، ހުރިހާ ދަރިވަރުން ވެސް ޓީޗަރުންނާއި، މައިންބަފައިންގެ ނަސޭހަތް އަޑުއަހައި އެ މީހުންގެ އިރުޝާދުތަކާ އެއްގޮތަކަށް އަމަލުކުރަންޖެހޭނެ ކަމަށާއި އެހެންނޫންނަމަ ކުރިއަރައިދިޔުމުގައި ދަތިތަކެއް ދިމާވާނެ ކަމަށެވެ.

މި އަހަރުގެ ކިޔެވުން މިއަދު ފަށާފައިވާއިރު، މިއީ 2020 ވަނަ އަހަރަށް ފަހު ޖެނުއަރީ މަހު ކިޔެވުން ފެށި ފުރުތަމަ އަހަރެވެ. މި އަހަރުގެ ކިޔެވުން ފަށާފައި މިވަނީ ސަރުކާރުގެ 219 ސްކޫލެއްގައި 80،715 ދަރިވަރުންނާއެކުގަ އެވެ. މީގެ އިތުރުން ދަރިވަރުންނަށް ކިޔަވައިދޭން 9،952 ޓީޗަރުން އެ ސްކޫލްތަކުގައި ހަރަކާތްތެރިވާނެ ކަމަށް އެޑިއުކޭޝަން މިނިސްޓްރީގެ ތަފާސްހިސާބުން ދައްކަ އެވެ.