މި ސަރުކާރުން އެޅި ފުރަތަމަ ސްކޫލު ކަމަށްވާ "ޝަހީދު އަލީ" ސްކޫލް ރަސްމީކޮށް ހުޅުވައިފި އެވެ. މި ސްކޫލް ރަސްމީކޮށް ހުޅުވައިދެއްވީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެވެ.

ހުޅުމާލޭގެ ދެވަނަ ފިޔަވަހީގައި ޒަމާނީ ފެންވަރަށް ތަރައްގީކޮށްފައިވާ މި ސްކޫލް ހުޅުވުމަށް މިއަދު ހެދުނު ބޭއްވި ހާއްސަ ރަސްމިއްޔާތުގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ބައިވެރިވެވަޑައިގެންނެވި އެވެ. މި ޖަލްސާގައި ސްކޫލްގެ ރަސްމީ ލޯގޯ އިފްތިތާހުކޮށް، ރައީސުލްޖުމްހޫރިއްޔާއަށް ވަނީ ހަނދާނީ ހަދިޔާއެއްވެސް އަރުވާފަ އެވެ.

އާރްސީސީއާ ހަވާލުކޮށްގެން ސަރުކާރުން އެޅި މ މި ސްކޫލްގެ އިމާރާތްކުރުމުގެ މަސައްކަތް ފަށާފައިވަނީ ޑިސެމްބަރު 2023 ގަ އެވެ.

^{ޝަހީދު އަލީ ސްކޫލް ހުޅުވުމަށް މިއަދު ހެދުނު ބޭއްވި ރަސްމިއްޔާތުގެ ތެރެއިން--- ފޮޓޯ: ރައީސް އޮފީސް}

މި ސްކޫލުގައި ޒަމާނީ ވަސީލަތްތަކާއެކު 54 ކްލާސްރޫމް ހިމެނޭއިރު، ކޮންމެ ކްލާހެއްގައި 32 ދަރިވަރުންނަށް ކިޔެވޭނެ އެވެ. ގްރޭޑް އެކަކުން 10 އަށް ތައުލީމު ފޯރުކޮށްދޭ މި މަރުކަޒަކީ 1،500 ކުދިންގެ ޖާގައިގެ ތަނެކެވެ. ނަމަވެސް، ދެ ދަންފަޅިއަށް ބަހާލައިގެން 2،500 ކުދިންނަށް ކިޔަވައިދިނުމުގެ ގާބިލުކަން ހުރި ތަނެއް ކަމަށް އެޑިއުކޭޝަން މިނިސްޓްރީން މައުލޫމާތުދެ އެވެ.

ދަރިވަރުންގެ ކިޔެވުމާއި ކުޅިވަރަށް ބޭނުންވާނެ މަލްޓިޕާޕަސް ހޯލަކާއި، ޓާފް ދަނޑެއްގެ އިތުރުން އިންޑޯ އަދި އައުޓްޑޯ ކުޅިވަރު ކުޅެވޭނެ އިންތިޒާމްތައް މި ސްކޫލުގައި ވަނީ ގާއިމުކޮށްފަ އެވެ. މީގެ އިތުރުން 400 މީހުންގެ އޮޑިޓޯރިއަމަކާއި، ލައިބްރަރީއަކާއި، ކޮމްޕިއުޓަރު ލެބެއްގެ އިތުރުން ސައިންސްގެ ތިން ލެބޯޓްރީއެއް މި ސްކޫލުގައި ހުރެ އެވެ.

ޝަހީދު އަލީ ސްކޫލަކީ ހުޅުމާލެ ދެވަނަ ފިޔަވަހީގައި ބިނާކުރި ދާއިމީ ދެވަނަ ސްކޫލެވެ. މީގެ ކުރިން އެ ސަރަހައްދުގައި އެންމެ ފުރަތަމަ ހުޅުވާފައިވަނީ ސަލާހުއްދީން ސްކޫލެވެ.