ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މުވައްޒަފުން އިސްނަގައިގެން، މޯލްޑިވްސް ބްލަޑް ސާވިސަސްއާ ގުޅިގެން ލޭ ހަދިޔާކުރުމުގެ ހާއްސަ ޕްރޮގްރާމެއް މިއަދު ފަށައިފި އެވެ.

މި ޕްރޮގްރާމަކީ އެޗްޑީސީގެ އިޖުތިމާއީ ޒިންމާގެ ދަށުން، ލޭ ބޭނުންވާ ފަރާތްތަކަށް، ހާއްސަކޮށް ތެލެސީމިއާ ކުދިންނަށް އެހީތެރިކަން ފޯރުކޮށްދިނުމުގެ މަގްސަދުގައި ކުރިއަށްގެންދާ ހަރަކާތެކެވެ. މި ހަރަކާތް ކުރިއަށް ދަނީ ހުޅުމާލޭގައި ހުންނަ އެޗްޑީސީގެ މައި އިދާރާގަ އެވެ.

މި ކެމްޕޭނާ ގުޅޭގޮތުން އެޗްޑީސީން ބުނީ، ކުންފުނީގެ ވަރަށް ގިނަ އަދަދެއްގެ މުވައްޒަފުން މި ހަރަކާތުގައި ބައިވެރިވެ ލޭ ހަދިޔާކުރަމުންދާ ކަމަށެވެ. މިއީ ރާއްޖޭގައި ލޭ ލިބުމަށް ހުރި ދަތިތަކަށް ހައްލެއް ހޯދައިދިނުމަށާއި، މުޖުތަމައުގެ ދިރިހުރުމަށް އެހީތެރިވުމުގެ ގޮތުން ކުންފުނިން ދޭ އިސްކަމެއް ކަމަށްވެސް އެ ކުންފުނިން ފާހަގަކުރެ އެވެ.

މޯލްޑިވްސް ބްލަޑް ސާވިސަސްއިން ވަނީ އެޗްޑީސީގެ މުވައްޒަފުން ކުރިއަށްގެންދާ މި އިންސާނީ ހިދުމަތަށް ޝުކުރު އަދާކޮށްފައެވެ. އަދި މިފަދަ ހަރަކާތްތަކުގެ ސަބަބުން ލޭގެ ސްޓޮކް އިތުރުކުރުމަށް ވަރަށް ބޮޑު ބާރަކަށް ވެގެންދާނެ ކަމަށް އެ ސާވިސްއިން މައުލޫމާތު ދެ އެވެ.

އެޗްޑީސީން ދަނީ މުޖުތަމައަށް ފައިދާހުރި މިފަދަ ތަފާތު އިޖުތިމާއީ ހަރަކާތްތައް މެދުނުކެނޑި ހިންގަމުންނެވެ.