ސާފް ފުރަތަމަ ފުޓްސަލް ޗެމްޕިއަންޝިޕްގެ ތަށި ރާއްޖެއިން ކާމިޔާބުކުރުމާ ގުޅިގެން، ގައުމީ ފުޓްސަލް ޓީމަށް މަރުހަބާ ކިޔުމަށް މާދަމާ ރޭ ހަވާ އެރުވުމާއެކު ހާއްސަ ހަރަކާތްތަކެއް ބޭއްވުމަށް ސަރުކާރުން ނިންމައިފި އެވެ.
މި މުބާރާތުގެ ޗެމްޕިއަންކަން ރާއްޖެއިން ހޯދީ ކުޅުނު ހުރިހާ މެޗަކުން މޮޅުވެ، ސަތޭކަ އިންސައްތަ ރެކޯޑަކާ އެކުގަ އެވެ. ސްޕޯޓްސް މިނިސްޓްރީން ބުނި ގޮތުގައި، ގައުމީ ފުޓްސަލް ޓީމު ރާއްޖެ އައުމަށް ހަމަޖެހިފައިވަނީ މާދަމާ ރޭ 19:45ގަ އެވެ. ވެލާނާ އިންޓަނޭޝަނަލް އެއާޕޯޓުގެ ވީއައިޕީން ޓީމަށް މަރުހަބާ ކިޔުމަށް ހަމަޖެހިފައިވަނީ މިނިސްޓްރީ އާއި އެފްއޭއެމްގެ އިސް އޮފިޝަލުންނެވެ. އެއަށްފަހު ޓީމުގެ ކުޅުންތެރިންނާއި އޮފިޝަލުން މާލެ އައުމަށް ހަމަޖެހިފައިވަނީ ހާއްސަ ލޮރީއެއްގަ އެވެ.
މާދަމާ ރޭ 22:00 ގައި އާޓިފިޝަލް ބީޗުގައި ބާއްވާ ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޓީމާ ބައްދަލުކުރައްވައި މަރުހަބާ ވިދާޅުވާނެ އެވެ. މި ރަސްމިއްޔާތުގައި ތަށި ހަވާލުކުރުމާއި، ތިން މިނިޓުގެ ހަވާ އެރުވުމުގެ ހަރަކާތެއް ކުރިއަށްދާނެ އެވެ. މީގެ އިތުރުން ރައީސުލްޖުމްހޫރިއްޔާ ގައުމާ މުހާތަބު ކުރައްވާނެ ކަމަށްވެސް މިނިސްޓްރީން ބުންޏެވެ.
ބެންކޮކްގައި ކުރިއަށްދިޔަ މި މުބާރާތުގެ ފަހު މެޗުގައި މިއަދު ރާއްޖެއިން ވަނީ ސްރީލަންކާގެ މައްޗަށް 5-2 ގެ ނަތީޖާއަކުން ކުރިހޯދާފަ އެވެ. މި މެޗުގައި ކެޕްޓަން މުހައްމަދު އިމްރާން ދެ ލަނޑު ޖެހިއިރު، ހުޒައިފަތު ރަޝީދު އާއި ހުސައިން ސުހައިލް ކޮންމެ ކުޅުންތެރިއަކު ލަނޑެއް ޖެހި އެވެ. އަނެއް ލަނޑަކީ ލަންކާ ކުޅުންތެރިއެއްގެ އަތުން ބައިކޮޅަށް ވަން ލަނޑެކެވެ. ލީގު އުސޫލުން ކުޅުނު މި މުބާރާތުގައި ރާއްޖެއިން ވަނީ ކުޅުނު ހަ މެޗުން ވެސް މޮޅުވެ 18 ޕޮއިންޓް ހޯދާފަ އެވެ. މިއީ ސަރަހައްދީ ފެންވަރުގެ މުބާރާތަކުން ރާއްޖޭގެ ފުޓްސަލް ޓީމު ހޯދި ފުރަތަމަ ބޮޑު ކާމިޔާބީއެވެ.
