ފަހަތުން އަރައި ސާފް ފުޓްސަލް ޗެލެންޖް 2026 ގައި ބޫޓާން 1-3 ގެ ނަތީޖާއިން ބަލިކޮށް ތާވަލުގެ އެއްވަނަ ކަށަވަރުކޮށް ހަ ލައްކަ މީހުން ހަމަނުވާ ދިވެހިރާއްޖެ ފުޓްސަލްގައި ސަރަހައްދީ ރަސްކަން ހޯދައިފި އެވެ.

ތާވަލުގެ އެއްވަނަ ރާއްޖެ އަށް ކަށަވަރުވީ ކުޅުނު ފަސް މެޗުން 15 ޕޮއިންޓު ހޯދައިގެންނެވެ. މެޗަށް ނިކުތުމުގެ ކުރިން ލީގުގެ އެއްވަނަ ކަށަވަރުކުރަން ރާއްޖެއަށް ބޭނުންވާނީ އެންމެ ޕޮއިންޓެކެވެ. މުބާރާތުގައި ބާކީ އެއް މެޗު އަދި އޮތް ނަމަވެސް މިހާތަނަށް ކުޅުނު ހުރިހާ މެޗަކުން ރާއްޖެ ވަނީ މޮޅުވެފަ އެވެ. ފަހު މެޗުގައި ރާއްޖެ ނިކުންނާނީ ސްރީލަންކާއާ ދެކޮޅަށެވެ.

މިއަދުގެ މެޗުގައި ފުރަތަމަ ލަނޑު ޖަހައި ލީޑު ނެގީ ބޫޓާން އިންނެވެ. އޭގެ އިރުކޮޅެއް ފަހުން ރާއްޖެ ޓީމުން ކުޅުނު ރަނގަޅުކޮށް އަބްދުﷲ ޖުނައިދު (ޖެންނޭ) ވަނީ ގޯލެއް ޖަހައި އެއްވަރުކޮށްފަ އެވެ. ފުރަތަމަ ހާފު ނިމުނީ 1-1 އިން އެއްވަރުވެގެންނެވެ.

ދެވަނަ ހާފު ފަށައިގެން އިރުކޮޅެއްތެރޭ ރާއްޖެ ޓީމުން ވަނީ ގޯލެއް ޖަހައި ލީޑު ހޯދާފަ އެވެ. މި ގޯލު ލިބުނު ހިލޭ ޖެހުމަކުން ކާމިޔާބުކުރީ އަހްމަދު ހަމީދު (އައްމަޑޭ) އެވެ. ރާއްޖޭގެ ފަހު ގޯލު ކާމިޔާބުކުރީ މެޗު ނިމެން ހަތަރު މިނެޓަށް ވެފައިވަނިކޮށް ކެޕްޓަން މުހައްމަދު އިމްރާން (އިންމި) އެވެ. މުޅި މުބާރާތުގައި ވެސް އިމްރާންގެ ފަރާތުން ވަނީ މޮޅު ކުޅުމެއް ފެނިފަ އެވެ.

ފުޓްސަލް ޗެލެންޖުގައި ރާއްޖެ މި ހޯދި ކާމިޔާބީއާއެކު ވަކި ރަށެއްގެ ނަން ފާހަގަކުރާ ނަމަ އެންމެ ބޮޑު އުފަލެއް ލިބޭނީ އެ ރަށެއްގެ ހަތަރު ކުޅުންތެރިން ނިސްބަތްވާ ގއ. ދެއްވަދޫ ރައްޔިތުންނެވެ. އެއީ ގައުމީ ޓީމުގެ އަހްމަދު ރާހިލް ރަޝީދު (ރާއްކޮ) އާއި، މުހައްމަދު އިމްރާން (އިންމި) އާއި، އަލީ ހައިޝަމް (ޗުމްޕު) އަދި ހުޒައިފަތު ރަޝީދު (ހުޒޭ) އެވެ. މި ހަތަރު ކުޅުންތެރިންނަކީ މިހާރު ކުރިއަށްދާ ގޯލްޑަން ފުޓްސަލް ޗެލެންޖުގައި ދެއްވަދޫގެ ޓީމު ލިސްޓުގައި ވެސް ތިބި ކުޅުންތެރިންކަން ފާހަގަކޮށްލެވެ އެވެ.

ސާފް އިން ބާއްވަމުން ގެންދާ އެންމެ ފުރަތަމަ ފުޓްސަލް ޗެލެންޖުގައި ރާއްޖެ އަށް މި ލިބުނީ ފަހުރުވެރި ކާމިޔާބީއެއްކަން ފާހަގަކޮށްލެވެ އެވެ. ރާއްޖޭގައި އިންޑޯ ޕިޗެއް ނެތް ނަމަވެސް ކުޅުންތެރިން ސާބިތުކޮށްދިނީ ހިތްވަރާއެކު މަސައްކަތް ކޮށްފިނަމަ ކާމިޔާބީއާ ހަމައަށް ވާސިލްވެވޭނެ ކަމެވެ.