މާލެ-ހުޅުމާލެ ހައިވޭގެ ޓްރެފިކް ލައިންތައް އާ ކުރުމުގެ މަސައްކަތް މިރެއިން ފެށިގެން ކުރިއަށްގެންދަން ނިންމާފައިވާ ކަމަށް ފުލުހުން ބުނެފި އެވެ.
ފުލުހުން ބުނީ މި މަސައްކަތް ނިމެންދެން ކޮންމެ ރެއަކު ދަންވަރު 12:00 އިން ފެށިގެން ހެދުނު 6:00 ހަމަޔަށް ކުރިއަށްދާނެ ކަމަށެވެ. އަދި މި މަސައްކަތް ކުރާނީ ހައުސިން ޑިވެލޮޕްމަންޓް ކޯޕަރޭޝަނުން ކަމަށާއި މަސައްކަތް ކުރިއަށްދާ ވަގުތު ތަކުގައި ހައިވޭ ބޭނުންކުރާ ފަރާތްތަކުން އެކަމަށް ސަމާލުވުމަށް ފުލުހުން ވަނީ ބުނެފަ އެވެ.
ހައިވޭގައި ކުރަހާފައި ހުރި ގިނަ ޓްރެފިކް ލައިންތައް މިހާރު ހުރީ ވަރަށް ބޮޑަށް ފޮހެވިފަ އެވެ. ބައެއް ސަރަހައްދުތަކުގައި ދެ ލޭން ވަކި ކުރަން ކުރަހާފައި ހުންނަ ލައިން އެއްގޮތަކަށް ފެންނާކަށްވެސް ނެތެވެ. ހައިވޭގެ ޓްރެފިކް ލައިންތަކުގެ ތުރުން ހައިވޭގެ ރެއިލިން ދަގަނޑުތަކުގައިވެސް މިހާރު ހުރީ ވަރަށް ބޮޑަށް ދަބަރު ޖަހައިފަ އެވެ.
މާލެ އާއި ހުޅުލެ އަދި ހުޅުމާލެ ގުޅުވައިދޭ ހައިވޭ ބަލަހައްޓައި މަރާމާތުކުރުމުގެ މަސައްކަތް ހަވާލުކޮށްފައި އޮންނަނީ އެޗްޑީސީއާ އެވެ. ހައިވޭ އަކީ އާއްމުކޮށްވެސް ގިނަ އަދަދެއްގެ މީހުން ބޭނުންކުރާ ތަނަކަށް ވާއިރު ހާއްސަކޮށް ރޯދަމަހު ހަވީރު ހައިވޭގައި ޓްރެފިކް ބާރު ބޮޑުވެ އެވެ.
