ތުރްކިޔޭގެ އިސްތަންބޫލްގެ މަގުމައްޗަށް 37 އަހަރުގެ އުޒްބަކިސްތާނުގެ އަންހެނެއްގެ ކަރު ބުރިކޮށްލުމަށް ފަހު އެއްލާލާފައި ވަނިކޮށް ފެނިއްޖެއެވެ. މިކަން ކުރީ ވެސް އުޒްބަކިސްތާނުގެ ބައެއް ކަމަށް ވާއިރު، ތުރްކިޔޭ ފުލުހުން ވަނީ ހާދިސާ ހިނގިތާ މާގިނަ އިރެއް ނުވަނީސް މިކަމުގައި ބައިވެރިވި އެންމެން ހޯދައި ހައްޔަރުކޮށް، އަދި އެ އަންހެންމީހާގެ ހަށިގަނޑުގެ އިތުރު ބައިތަކެއް އެހެން ތަނަކުން ހޯދާފައެވެ.
ތުރްކީގެ އިސްތަންބޫލްގައި އުޒްބަކިސްތާނު އަންހެނެއްގެ ކަރު ބުރިކޮށްލައި މަގުމައްޗަށް އެއްލާލާފައި ވަނިކޮށް ފެނިގެން ހިންގި ތަޙްޤީޤުގެ ތެރެއިން - މި ހާދިސާ އާއި ގުޅިގެން 3 މީހަކު ވަނީ ހައްޔަރު ކޮށްފަ.
ހޮނިހިރު ދުވަހު މި ހާދިސާ ހިނގީ ތުރްކިޔޭގެ އިސްތަންބޫލްގެ އުމްރާނިޔާ ކިޔާ ޑިސްޓްރިކްޓެއްގައެވެ. ނަމަވެސް ހަށިގަނޑު ފެނުނީ ޝިޝްލީ އިންނެވެ. އެމީހުން ޝިޝްލީ އަށް ދިޔައީ ހަށިގަނޑު ޑިސްޕޯސް ކޮށްލުމަށް ޓެކްސީއެއްގައެވެ. ފަޔާއި ކަރު ބުރިކޮށްލުމަށް ފަހު ސޫޓްކޭހަކަށް އެ އަންހެން މީހާގެ ހަށިގަނޑު ލައިގެން ޓެކްސީގައި ގެންގޮސް އެޅީ ޝިޝްލީގެ މަގުމަތީގައި ބަހައްޓަފައި ހުރި ބޮޑު ޑަސްބިނަކަށެވެ.
ތުރްކިޔޭގެ ޓީވީ ޗެނަލަކުން ރޭ ބުނީ ޑަސްބިނުން އެ ހަށިގަނޑު ފެނުނީ ކަރުދާސް އެއްކުރަމުން ދިޔަ ފަގީރަކަށް ކަމަށާއި އޭނާ އެ ހަށިގަނޑުގައި އަތް ލީ އިރުގައި ހަށިގަނޑުގައި ހޫނުކަން ވެސް ހުރި ކަމަށާއި ވަގުތުން ފުލުހުންނަށް އެންގި ކަމަށެވެ.
ފުލުހުން ވަނީ މާ ގިނަ އިރެއް ނުވެ އެކަން ކުރި އުޒްބަކިސްތާނުގެ ދެމީހުން އެއާޕޯޓުން ހައްޔަރުކޮށްފައެވެ.
ތުރްކިޔޭ އަކީ ކެމެރާތަކުން މުޅި ޤައުމު ގާތްގަނޑަކަށް އެކީއެކަށް ކަވަރުކޮށްފައިވާ ޤައުމެއް ކަމުން، މަގުމަތީގައި ޖަރީމާ ހިިންގާ މީހުން ހޯދުމަކީ އެ ޤައުމުގެ ފުލުހުންނަށް ގިނަފަހަރަށް އެހާ އުނދަގޫ ކަމެއް ނޫނެވެ.
ތަޙްޤީޤަށް އެނގިފައިވާ ގޮތުގައި މި އަންހެންމީހާ މަރައިލީ އޭނާގެ ލޯބިވެރިޔާއެވެ. އެއީ އަރައިރުންވެ ދެމީހުން ހިންގި ޒުވާބެއްގެ ތެރެއިންނެވެ. އަދި އެ އަންހެން މީހާގެ ހަށިގަނޑު ޑިސްޕޯސް ކޮށްލުމަށް މީހަކު ގެނައީ އޭނާގެ ޤާތިލު ނުވަތަ ލޯބިވެރިޔާ ގުޅައިގެންނެވެ. ކަރާއި ފައި ބުރިކޮށްލީ ފޮށްޓަށް ހަށިގަނޑު އަޅައި އެއްލާލަން ފަސޭހަ އަކަށް ކަމަށް ވެސް ތަޙްޤީޤަށް އޭނާ ކިޔައިދީފައިވާ ކަމަށް އިސްތަންބޫލް ފުލުހުން ބުނެއެވެ.
އިސްތަންބޫލް ފުލުހުން ބުނީ މި ހާދިސާ އާއި ގުޅިގެން މިހަތަނަށް 3 މީހަކު ހައްޔަރު ކޮށްފައިވާ ކަމަށެވެ.
