މާލޭގެ ފިހާރައަކުން ސިނގިރޭޓު ފޮެށްޓެއް ގަތް މީހަކަށް ހަނދާނުން ފިލައިގެން ނުދާނެ ވަރުގެ ލަނޑެއް ލިބިއްްޖެ އެވެ.
ފޭސްބުކް ޕޭޖެއްގައި ހިއްސާކުރި ޕޯސްޓެއްގައި ބުނެފައިވަނީ ޑްރެގަން ޒޯން ކައިރީ ހުންނަ ފިހާރަޔަކުން މީހަކު ސިނގިރޭޓު ފޮށްޓެއް ގަތް ކަމަށްށާއި، އަދި އެ ސިނގިރޭޓު ފޮށްޓަށް ހުރީ ސިނގިރޭޓުގެ ބަދަލުގައި ފުޅިމަދު އަޅާފައި ކަމަށެވެ. މިޕޯސްޓުގައި ބުނެފައިވަނީ އެމީހާ އެސިނގިރޭޓު ފޮށި ގަތީ ރޭ 11 ޖެހި އިރު ޑްރެގަން ޒޯން ކައިރީ ހުންނަ "ކުރެދި މާޓް" ނަމަކަށް ކިޔާ ފިހާރައަކުން ކަމަށެވެ.
އެ ޕޯސްޓާއެކު އެމީހާ ގަތް ސިނގިރޭޓު ފޮށީގެ ފޮޓޯވެސް ވަނީ ހިއްސާކޮށްފަ އެވެ. އެ ފޮޓޯތަކުން ފެންނަނީ 'ކެމަލް ހާޑް' ސިނގިރޭޓު ފޮށްޓެއްގެ ތެރެއަށް ފުޅިމަދު ގަނޑެއް ލައްވައި އެ ފުޅިމަދަށް އިސްކުރު ޖަހާފައި ހުއްޓަ އެވެ.
Advertisement
އަދި އެޕޯސްޓްގައި އިތުރަށް ބުނެފައި ވަނީ މިދުވަސްވަރު ސިނގިރޭޓު އެހާ އަގު ބޮޑުކޮށް މީހުން ގަންނަ އިރު، ސިގުރޭޓް ވިއްކުމުގައި ސްކޭމް ކުރުމަކީ ބަލައިގަނެވޭނެ ކަމެއް ނޫން ކަމަށެވެ.
އަދި އާއްމުންގެ ގިިނަ ބައެއްގެ ސަމާލުކަން ވެސް އެ ޕޯސްޓަށް ލިބިފައިވާއިރު ގިނަ ބަޔަކު ދަނީ އެކި ގޮތްގޮތަށް އެ ޕޯސްޓަށް ކޮމެންޓު ކުރަމުންނެވެ. ކޮމެންޓް ކުރި ގިނަމީހުންނަށް އެކަން ވީ މަޖާ ކަމަކަށެވެ. އަދި ގިނަ އަދަދެއްގެ ބަޔަކު ވަނީ އެ ކަމުން އިބުރަތް ހާސިލުކޮށް ސިނގިރޭޓު ބުއިން ހުއްޓާލަން ނަސޭހަތް ދީފަ އެވެ.
"މިފަހަރު ތިއޮތީ ފޮށީގެ ބޭރުގަ ލިޔެފަ އޮތް އިންޒާރު ފޮށީގެ އެތެރެއިން ފެންނަން. ތި ބޮއެގެން ވާނީ ގެއްލުން، އަވަހަށް ހުއްޓާލާ،" އެކަކު ބުންޏެވެ. "އަދިވެސް ވާނެ ބޯން ތަނަކުން އެއްޗެއް ހުރިއްޔާ،" އެހެން ކޮމެންޓެއްގައި މީހަކު ބުންޏެވެ.
އެހެން މީހެއްގެ ކޮމެންޓެއްގައި ބުނެފައިވަނީ ތިއޮތީ ނަސީބު ލައްވާލާފައި ކަމަށެވެ. އަދި އެއީ ސިހުރެއް ކަމަށްވެސް މީހަކު ވަނީ ކޮމެންޓެއްގައި ބުނެފަ އެވެ.
މިއީ މަފަދަ ކަމެއް ހިނގި ފުރަތަމަ ފަހަރެވެ. ވިޔަފާރިއެއް ކުރުމުން ސްކޭމް ކުރުމަކީ ގޯހެކެވެ. ނަމަވެސް ގިނަ ބަޔަކަށް މިކަން މިފަހަރު މިވީ ބޮޑު މަޖާ ގަނޑަކަށެވެ. ފޮށި ގަތް މީހާއަށް އިބުރަތަކަށެވެ.
ރާއްޖޭގައި ދުންފަތުގެ އިސްތިއުމާލު ކުރުން ހުއްޓުވުމަށް ސަރުކާރުން އަންނަނީ ތަފާތު ފިޔަވަޅުތަކެއް އަޅަމުންނެވެ. އޭގެ ތެރޭގައި ޖެނެރޭޝަނަލް ބޭން އާއި، ވޭޕް ބޭން ކުރުމާއި އަދި ސިނގިރޭޓުން ނަގާ ޑިއުޓީ އިތުރު ކުރުން ހިމެނެވެ. އެގޮތުން ސަރުކާރުން ވަނީ ދުންފަތާއި ސިނގިރޭޓުން ނަގާ ޓެކްސް 1 ނޮވެމްބަރު 2024 އިން ފެށިގެން ބޮޑުކޮށްފަ އެވެ. ހަމަ އެހެންމެ ޖެނެރޭޝަނަލް ބޭންއަކީ ވެސް ދިވެހިންގެ މެދުގައި ދުންފަތުގެ އިސްތިއުމާލު ކުރުން މަދު ކުރުމަށްޓަކައި އަޅާފައިވާ ފިޔަވަޅެއްކެވެ. އެގޮތުން 2007 ވަނަ އަހަރުގެ ފަހުން އުފަންވީ އެއްވެސް ދިވެހި ރައްޔިތަކު ދުންފަތުގެ އިސްތިއުމާލު ކުރުން މިހާރު މަނާވާނެ އެވެ.
