ދިވެހިރާއްޖޭގައި މަކަރާއި ހީލާތުން ހިންގާ ސްކޭމްގެ މައްސަލަތަކުގެ ތެރެއިން އެންމެ ބޮޑަށް އިތުރުވަމުންދަނީ އޮންލައިން ވިޔަފާރިއާއި ކަރެންސީ އެކްސްޗޭންޖް ކުރުމުގެ ނަމުގައި ހިންގާ ސްކޭމްތައް ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.

އެގޮތުން، ސްކޭމްގެ އެކި މައްސަލަތަކުގެ ތެރެއިން އެންމެ ގިނައީ އީ-ކޮމާސް ނުވަތަ އޮންލައިން ވިޔަފާރިތައް މެދުވެރިކޮށް ހިންގާ މަކަރާއި ހީލާތުގެ މައްސަލަތަކެވެ. ޖުމްލަ 1,500 އަށްވުރެ ގިނަ އީ-ކޮމާސް މައްސަލަ ހުށަހެޅިފައިވާއިރު، އޭގެ ތެރެއިން 821 މައްސަލައަކީ ސީދާ އޮންލައިންކޮށް މުދާ ނުވަތަ ހިދުމަތް ހޯދުމުގެ ނަމުގައި ފައިސާ ފޭރިގަނެފައިވާ މައްސަލަތަކެވެ. އާންމުކޮށް ސޯޝަލް މީޑިއާ ޕްލެޓްފޯމްތަކާއި މާކެޓްޕްލޭސްތައް މެދުވެރިކޮށް ކުރާ ވިޔަފާރިތަކުގައި މިފަދަ ކަންކަން ހިނގާ މިންވަރު އިތުރުވުމަކީ ބޮޑު ކަންބޮޑުވުމެކެވެ.

މި ލިސްޓުގެ ދެވަނައަށް އެންމެ ގިނައީ ކަރެންސީ އެކްސްޗޭންޖް ކުރުމުގެ ނަމުގައި ހިންގާ ސްކޭމްތަކެވެ. މިފަދަ 244 މައްސަލައެއް ފުލުހުންނަށް ހުށަހެޅިފައިވާއިރު، ފައިސާ ބަދަލުކުރުމުގެ މުއާމަލާތް ކުރުމުގައި ރައްޔިތުން ނުދަންނަ ފަރާތްތަކަށް އިތުބާރުކޮށް ފައިސާ ފޮނުވުމުގެ ސަބަބުން ގިނަ ބަޔަކު ވަނީ ގެއްލުމާ ކުރިމަތިލާންޖެހިފައެވެ.

މީގެ އިތުރުން، ދާދި ފަހަކަށް އައިސް މުޅިން އާ ބާވަތެއްގެ ސްކޭމެއް ތައާރަފުވެފައިވާކަން ފުލުހުން ފާހަގަކުރިއެވެ. އެއީ ރިސޯޓުތަކާއި، ހޮޓާތަކާއި އަދި ކުއްޔަށް ތަންތަން ދޫކުރާ ފަރާތްތަކަށް އަމާޒުކޮށްގެން ހިންގާ 'ބުކިން ކެންސަލޭޝަން ރިފަންޑް ސްކޭމް' އެވެ. މި ސްކޭމްގައި ބުކިންއެއް ހެދުމަށް ފަހު، ބުކިން ކެންސަލްކޮށް ފައިސާ އަނބުރާ ދިނުމަށް އެދި ފޭކް ބޭންކް ސްލިޕް ފޮނުވައިގެން ވިޔަފާރިވެރިން އަތުން ފައިސާ ހޯދައެވެ. 

މިފަދަ އައު އުކުޅުތަކުން ސަލާމަތްވުމަށްޓަކައި އޮންލައިން މުޢާމަލާތްތައް ކުރުމުގައި ކަމާބެހޭ ފަރާތްތަކުން ދޭ އިރުޝާދުތަކަށް ބޯލަނބައި، އިތުރަށް ސަމާލުވުމަށް ފުލުހުން ވަނީ އިލްތިމާސްކޮށްފައެވެ.