ހުޅުމާލޭގައި އެމްޑަބްލިޔުއެސްސީން ގާއިމުކުރާ 5,000 ޓަނުގެ ދެވަނަ ފެން ޕްލާންޓުގެ މަސައްކަތް ނިންމައި އަންނަ މަހުގެ ތެރޭގައި ބޭނުންކުރަން ފެށޭނެ ކަމަށް އެ ކުންފުނީގެ މެނޭޖިން ޑިރެކްޓަރު އަބްދުލް މަތީން މުހައްމަދު ހާމަކުރައްވައިފިއެވެ.
މާލެ ސަރަހައްދުގެ ފެނުގެ ހިދުމަތް ފުޅާކުރުމަށްޓަކައި ދުވާލަކު 10,000 ޓަނުގެ ފެން އުފެއްދޭނެ އިމާރާތެއް ބިނާކުރުމުގެ އަމަލީ މަސައްކަތް ފަށާފައިވަނީ އޮގަސްޓް 2025ގަ އެވެ. މީގެ އިތުރުން މާލެ އާއި ހުޅުމާލޭގައި ފެން ރައްކާކުރާނެ އިތުރު ވަސީލަތްތަކާއި ޕްލާންޓްތައް ގާއިމުކުރުމުގެ މަސައްކަތްވެސް އެ ކުންފުނިން ދަނީ ކުރަންނެވެ.
ޕީއެސްއެމްގެ 'ރާއްޖެ މިއަދު' ޕްރޮގްރާމްގައި ވާހަކަދައްކަވަމުން މަތީން ވިދާޅުވީ، އެމްޑަބްލިއުއެސްސީގެ އެންމެ ބޮޑު އަމާޒަކީ ރައްޔިތުންނަށް ބޭނުންވާ ފެނުގެ ޔަގީންކަން ކަށަވަރުކޮށްދިނުން ކަމަށެވެ. މިގޮތުން ފެން އުފެއްދުމުގެ ގާބިލުކަން އިތުރުކުރުމަށް ކުރެވޭ މަސައްކަތުގެ ތެރެއިން 5،000 ޓަނުގެ އެއް ޕްލާންޓް މިދިޔަ އަހަރު ބޭނުންކުރަން ފަށާފައިވާކަން އޭނާ ފާހަގަކުރެއްވި އެވެ.
މަތީން އިތުރަށް ވިދާޅުވީ، ހުޅުމާލޭގައި މިހާރު ކުރިއަށްދާ 5،000 ޓަނުގެ ދެވަނަ ޕްލާންޓުގެ މަސައްކަތް މަހެއްހާ ދުވަހުގެ ތެރޭގައި ނިމުމުން، ޖުމްލަ 10,000 ޓަނުގެ ފެން އިތުރަށް އުފެއްދޭނެ ކަމަށެވެ. މީގެ ސަބަބުން ސްކޫލްތައް ހުޅުވޭ ދުވަސްވަރާއި ރޯދަމަހު ފެނަށް އޮންނަ ބޮޑު ޑިމާންޑަށް ފުރިހަމައަށް އިޖާބަދެވޭނެ ކަމަށް އޭނާ ވިދާޅުވި އެވެ.
އެމްޑަބްލިޔުއެސްސީގެ މަގުސަދަކީ މެދުކެނޑުމެއްނެތި ސާފު ބޯފެނާއި ނަރުދަމާގެ ހިދުމަތް ދެމެހެއްޓެނިވި ގޮތެއްގައި ފޯރުކޮށްދިނުމެވެ. މި މަސައްކަތުގެ ދަށުން މިދިޔަ އަހަރު ހުޅުމާލޭގައި ވަނީ ރާއްޖޭގެ އެންމެ ބޮޑު ފެން ތާނގީ ކަމަށްވާ 10,000 ޓަނުގެ ތާނގީއެއް ބަހައްޓާފަ އެވެ. މިއާއެކު ހުޅުމާލޭގައި ފެން ރައްކާކުރެވޭ މިންވަރު ވަނީ 22,600 ޓަނަށް މަތިވެފަ އެވެ.
މީގެއިތުރުން، މާލޭގައި 13,000 ޓަނުގެ ދެ ތާނގީ ބެހެއްޓުމުގެ މަސައްކަތް މި މަހު ފެށުމަށް ތައްޔާރުވަމުންދާއިރު، މިދިޔަ އަހަރުގެ ޖޫން މަހު މާލޭގައި 1,000 ޓަނުގެ އާރުއޯ ޕްލާންޓެއް ބަހައްޓައި މިހާރު ދަނީ ބޭނުންކުރަމުންނެވެ.
