ހުޅުމާލެ ތިން ވަނަ ފިޔަވަހީގެ ދަށުން ހިއްކުމަށް ހަމަޖެހިފައިވާ 63 ހެކްޓަރުގެ ބިން ހިއްކައި ނިމިފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެ މަޝްރޫއު ނިމިފައިވާކަން ރައީސް އިއުލާން ކުރެއްވީ ރޭ ބޭއްވި ޕީއެންސީގެ ކެމްޕެއިން އިވެންޓެއްގަ އެވެ. އެ ހަރަކާތުގައި ވާހަކަފުޅު ދައްކަވަމުން ރައީސް ވިދާޅުވީ ހުޅުމާލެ ހިއްކާ ނިމި ގިރާވަރު ފަޅު ހިއްކުމަށް މިހާރު ތައްޔާރުވަމުންދާ ކަމަށެވެ. އެގޮތުން ދެ ޑްރެޖަރު މިހާރު އޮތީ ތައްޔާރަށް އެތަނުގެ ކައިރީގައި ކަމަށާއި އެ ތަނުން ދޫކޮށްފައިވާ ގޯތިތައް ވެސް އަވަހަށް ދޫކުރެވޭނެ ކަމަށް ވިދާޅުވި އެވެ.

ރައީސް ފާހަގަކުރެއްވި ގޮތުގައި އުތުރުތިލަފަޅު ހިއްކަން ވެސް ސަރުކާރުން އަންނަނީ ތައްޔާރުވަމުންނެވެ. އަދި ފުށިދިއްގަރުފަޅު ހިއްކުމުގެ މަސައްކަތް ވެސް ބާރަށް ކުރިއަށްދާ ކަމަށާއި އޭޕްރީލް މަހުގެ ތެރޭގައި ފުށިދިއްގަރުފަޅު އެއްކޮށް ހިއްކައި ނިމޭނެ ކަމަށް ރައީސް ވިދާޅުވި އެވެ. އަދި އެހާ ހިސާބަށް ދާއިރު އެ ތަނުން ގޯތި ލިބޭ މީހުން ކަނޑައެޅޭނެ ކަމަށް ވެސް ވިދާޅުވި އެވެ.

ބިންވެރިޔާ ސްކީމްގެ ދަށުން ހުޅުމާލެއިން ގޯތި ލިބުނު ފަރާތްތަކަށް ގޯތި ދޫކުރުމަށް ހުޅުމާލޭގެ ދެވަނަ ފިޔަވަހީގެ ފަޅުތެރެ ހިއްކުމަށް ނިންމައި އެމަސައްކަތް ފެށީ، 2023 ވަނަ އަހަރުގެ ސެޕްޓެމްބަރު މަހުގެ 22 ވަނަ ދުވަހުއެވެ. ތިން މަރުހަލާއަކަށް ބަހާލައިގެން ކުރިއަށް ގެންދިޔަ އެމަޝްރޫއުގެ ދަށުން ފުރަތަމަ ދެ މަރުހަލާގެ ބިން ހިއްކުމުގެ މަސައްކަތް ހަވާލުކޮށްފައިވަނީ، ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަނާ އެވެ.

އެކި ސަބަބުތަކާއެކު މިމަޝްރޫއުގެ މަސައްކަތް މަޑުޖެހެމުން ދިޔުމުގެ ސަބަބުން ސަރުކާރުންވަނީ، މަސައްކަތް އަވަސް ކުރުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް، ހަވާލުކޮށްފަ އެވެ. އެމްއޭސީއެލް އާ ހަވާލުކޮށްގެން އަލުން ބިން ހިއްކުމުގެ މަސައްކަތް ފަށާފައިވަނީ، މިދިޔަ ނޮވެމްބަރު މަހުގަ އެވެ.

ބިން ހިއްކުމުގެ މަޝްރޫއުތައް އަވަސް ކުރުމުގެ ގޮތުން ސަރުކާރުން ވަނީ ބޮސްކާލިސްގެ ޓްރެއިން ސަކްޝަން ހޮޕާ ޑްރެޖަރު ރާއްޖެ ގެނެސް، ބިން ހިއްކުމުގައި ބޭނުންކުރަން ފަށައިފަ އެވެ. އަދި ކުރިން ބިން ހިއްކުމުގައި އުޅުނު ޑްރެޖަރާ އެކު އާ ޑްރެޖަރު ވެސް ބިން ހިއްކުމުގެ މަސައްކަތުގައި ބޭނުންކޮށް، އެ މަސައްކަތުގެ ސްޕީޑު ވަނީ އަވަސްކޮށްފަ އެވެ.