މި ސަރުކާރުން ވަނީ ގައުމީ ތަރައްގީގެ މައި ތަނބުގެ ގޮތުގައި ތައުލީމު އިސްކޮށްފައި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ، މިއަދު ފާހަގަކުރަމުންދާ ބައިނަލްއަގުވާމީ ތައުލީމީ ދުވަހާއި ގުޅުވައިގެން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގަ އެވެ.

ރައީސުލްޖުމްހޫރިއްޔާގެ ޕޯސްޓްގައި ވިދާޅުވެފައިވަނީ ބައިނަލްއަގުވާމީ ތައުލީމީ ދުވަސް ފާހަގަކުރަމުންދާއިރު، ތައުލީމަކީ ދެމެހެއްޓެނިވި ތަރައްގީއާއި ދުނިޔޭގެ ކުރިއެރުމުގެ ބިންގާކަން ހަނދާންކުރަންޖެހޭ ކަމަށެވެ. އަދި ތައުލީމަކީ ގައުމީ ތަރައްގީގެ މައި ތަނބު ކަމުގައި މިސަރުކާރުން ކަނޑައަޅާފައިކަމަށާއި ތައުލީމީ ނިޒާމަކީ އެންމެންގެ ބައިވެރިވުން ހިމެނޭ، މުހިންމު، އަދި ބަދަލުތަކެއް ގެނުވައިދޭ ނިޒާމަކަށް ހަދައި ތަޢުލީމީ ކަންކަމުގައި ޒުވާނުންގެ ބައިވެރިވުން އިތުރުކޮށް ބާރުވެރިކުރުމަށް ސަރުކާރުން ވެފައިވާ ވައުދުތައް ފުއްދުމަށް މަސައްކަތް ކުރައްވަމުން ގެންދަވާކަމަށް ރައީސް ވިދާޅުވި އެވެ.

ރައީސް ވިދާޅުވީ ފާއިތުވި ދެ އަހަރުގެ ތެރޭގައި، ހިލޭ ފުރަތަމަ ޑިގްރީއަށް ކިޔަވައިދޭ ސްކީމުގެ ދަށުން 6,000 އަށްވުރެ ގިނަ ދަރިވަރުން ތައުލީމު ހާސިލުކޮށްފައިވާކަމަށެވެ. އަދި ދަރިވަރުންގެ ލޯނުގެ ގޮތުގައި އެއް ބިލިއަނަށްވުރެ ގިނަ ރުފިޔާ ސަރުކާރުން ދޫކޮށްފައިވާކަމަށް ވެސް ރައީސް ވިދާޅުވި އެވެ.

ދަރިވަރުންނަށް އިންވެސްޓްކޮށް، ތައުލީމީ ފުރުސަތުތައް ފުޅާކުރުމަކީ ހަމައެކަނި ވަކިވަކި ފަރުދުންގެ މުސްތަގުބަލު ބައްޓަންކުރުންމ ނޫންކަމަށާއި، އެއީ މުއްސަނދި، ހަމަހަމަކަން ގާއިމުވެފައިވާ، އަދި ކަންކަމަށް ކުރިމަތިލުމުގެ ގާބިލުކަން ހުރި ގައުމެއް ބިނާކުރުންކަމަށް ރައީސް ވިދާޅުވި އެވެ.

އެންމެން ގުޅިގެން ކުރާ މަސައްކަތުން، އުނގެނުމަށް މަސައްކަތްކުރާ ކޮންމެ ކުއްޖަކަށްވެސް ކުރިއަރައި ދިއުމުގެ ފުރުސަތު ހޯދައިދީ، ގައުމީ ތަރައްގީގައި ބައިވެރިވުމުގެ މަގު ފަހިކޮށްދެވޭނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ދެއްވާފަ އެވެ.