މިފްކޯއިން 10 ކިލޯގެ ކަންނެލި 20 ރުފިޔާއަށް ގަންނަން ފަށައިފި އެވެ.

މިފްކޯގެ ސީއީއޯ އަދި މެނޭޖިން ޑިރެކްޓަރު ފަރުހަތު ޝަހީރު ސޮއިކުރައްވާ މިފްކޯގެ ފިޝަރީޒް ކޮމްޕްލެކްސްތަކަށް ފޮނުއްވި މެމޯއެއްގައި ވިދާޅުވީ، 20 ޖެނުއަރީ 2026 ވަނަ ދުވަހުން ފެށިގެން މިފްކޯގެ ސެންޓަރުތަކަށާއި ބޯޓުފަހަރަށް ބޮޑު ކަންނެލި ގަންނަމުން ގެންދާނީ 10 ކިލޯއާއި 15 ކިލޯއާ ދެމެދުގެ ކަންނެލި 20 ރުފިޔާއަށް އަދި 15 ކިލޯއަށްވުރެ މަތީގެ ކަންނެލި 25 ރުފިޔާއަށް ކަމަށެވެ.

މިފްކޯއިން މި ނިންމުން ނިންމާފައިވާއިރު މި މަހުގެ 11 ވަނަ ދުވަހު ކަނޑުއޮތްގިރި އަނބުރާ އޮޕަރޭޝަނަށް ގެނެސް މިފްކޯއިން ވަނީ ރަސްމީކޮށް ބޮޑު ކަންނެލި ގަންނަން ފަށައިފަ އެވެ. ކަނޑުއޮތްގިރި އަނބުރާ އޮޕަރޭޝަނަށް ގެނެސް މިފްކޯއިން ބޮޑު ކަންނެލި ގަންނަން ފަށާފައި މިވަނީ ބޮޑު ކަންނެލީގެ މަސްވެރިކަމުގައި އުޅޭ ފަރާތްތަކަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމުގެ ގޮތުންނެވެ.

ބޮޑު ކަންނެލި މަސްވެރިކަމަކީ ރާއްޖޭގެ މަސްވެރިކަމުގެ ސިނާއަތުގައި ވަރަށް ބޮޑު ހިއްސާއެއް އޮންނަ ފަރާތްތައް ނަމަވެސް އެ ފަރާތްތަކަށް ދިމާވެފައިވާ އެންމެ ބޮޑު ގޮންޖެހުމަކީ މިފްކޯއަށް ބޮޑު ކަންނެލި ނުކިރުމެވެ. އެހެން ނަމަވެސް ކަނޑުއޮތްގިރި އަނބުރާ އޮޕަރޭޝަނަށް ގެނެސް މިފްކޯއިން ވަނީ ރަސްމީކޮށް ބޮޑު ކަންނެލި ގަންނަން ފެށުމާއެކު މިކަމަށް ވެސް މި ވަނީ އެދެވޭ ހައްލެއް ލިބިގެން ގޮސްފަ އެވެ.

މަސްވެރިކަމުގެ ސިނާއަަތަށް ދިމާވެފައިވާ ގޮންޖެހުންތައް ހައްލުކޮށްދެއްވުމަށް މި ސަރުކާރުން އަންނަނީ ގިނަ މަސައްކަތްތަކެއް ކޮށްދެއްވަމުންނެވެ.