މަސްވެރިކަމުގެ ސިނާޢަތް ހަރުދަނާކުރުމަށް ސަރުކާރުން ގެންގުޅުއްވާ ހަރުދަނާ ސިޔާސަތުތަކާއެކު، މިފްކޯއަށް މަސްގަތުމަށް ދައުލަތުން ދެމުން އައި ސަބްސިޑީ މިހާރު އެއްކޮށް ހުއްޓާލާފައިވާ ކަމަށް ފިޝަރީސް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، މަސްވެރިކަމުގެ ސިނާޢަތާ ގުޅޭގޮތުން ރައްޔިތުންގެ މަޖިލީހުގެ މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. ޝިޔާމް ފާހަގަކުރެއްވި ގޮތުގައި، މަސްވެރިކަމުގެ ދާއިރާއަށް ހެޔޮ ބަދަލުތަކެއް ފެންނަން ފަށާފައިވަނީ ސަރުކާރުން މި ސިނާޢަތަށް ގެންނަވަމުންދާ އިޞްލާޙީ ބަދަލުތަކުގެ ސަބަބުންނެވެ.

މަސް ބޭރުކުރާ މިންވަރު އިތުރުކުރުމަށް ވޭތުވެދިޔަ ޒަމާންތަކުގައި ގެންގުޅުނު ސިޔާސަތުތަކަށް ބަދަލު އަންނަންޖެހޭކަން ފާހަގަކުރައްވަމުން މިނިސްޓަރު ވިދާޅުވީ، ފާއިތުވި 40 އަހަރު ވަންދެން ފެލިވަރުގައި ހުރި ފެކްޓްރީން އެކަނި ޚިދުމަތް ދެމުން އައިއިރު، ރާއްޖޭގެ މަސް ޕްރޮސެސްކުރުމުގެ ކެޕޭސިޓީ އިތުރުކުރުމަށް އެކަށީގެންވާ މަސައްކަތްތަކެއް ކުރެވިފައި ނުވާ ކަމަށެވެ.

"ކުރީ ސަރުކާރުން މަސް ކިލޯއެއްގެ އަގު 25 ރުފިޔާއަށް ބަދަލު ކުރިއިރު، އެ އަގުގައި މަސް ގަތުމަށް މިފްކޯއަށް ދައުލަތުން ކޮންމެ ކިލޯއަކަށް 13 ރުފިޔާގެ ރޭޓުން އަހަރަކު ބިލިޔަނުން ސަބްސިޑީ ދޭންޖެހޭ. އެ ފައިސާ މެދުވެރިކޮށް އިންފްރާސްޓްރަކްޗަރ އިތުރު ނުކުރެވުނީ ކީއްވެތޯ؟"

މިނިސްޓަރު ޝިޔާމް ސުވާލު އުފެއްދެވިއެވެ.

މިނިސްޓަރު އިތުރަށް ވިދާޅުވީ، މިހާރު ރާއްޖޭގެ އެކި ކަންކޮޅުތަކުގައި ކުރިއަށްދާ މަޝްރޫއުތަކާއެކު، ރާއްޖޭގައި މިހާރު ހުރި 105 ޓަނުގެ ޕްރޮސެސިންގ ކެޕޭސިޓީ ތިން ގުނަ އިތުރު ކުރެވޭނެ ކަމަށެވެ. އަދި ސިޔާސީ ބޭނުމަށް ވޯޓު ހޯދުމަށް ސަބްސިޑީ ދިނުމުގެ ބަދަލުގައި، މިހާރު މިފްކޯއިން މަސްގަންނަނީ ސަރުކާރުގެ އެހީއާ ނުލައި ކަމަށްވެސް ވަޒީރު ވިދާޅުވިއެވެ.

"އަޅުގަނޑު މިއަދު ދަންނަވަން ކެރޭ، އަޅުގަނޑުމެން މިހާރު މިފްކޯއަކަށް މަސްގަންނާކަށެއް ސަރުކާރުން އެންމެ ރުފިޔާއެއްވެސް ނުދެން،"

މިނިސްޓަރު ޝިޔާމް ވިދާޅުވިއެވެ.

ކެޕޭސިޓީ އިތުރުކުރުމުގެ މަސައްކަތުގެ ދަށުން، ހުޅުމާލޭގައި 100 މެޓްރިކް ޓަނުގެ ކަންނެލި ބަންދުކުރާ ކާރުޚާނާއެއް ބިނާކުރުމަށް ބަޔަކާ ހަވާލުކޮށްފައިވާ ކަމަށާއި، ކުރިއަށް އޮތް 18 މަސްދުވަހުގެ ތެރޭގައި އެ ތަން އޮޕަރޭޝަނަށް ގެނެވޭނެ ކަމަށް މިނިސްޓަރު ވިދާޅުވިއެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތައް ގުޅިގެން، މަސްވެރިކަމުގެ ސިނާޢަތަކީ ފައިދާހުރި، ވަށައިޖެހޭ ސިނާޢަތަކަށް ހެދުމަށް ކަމަށްވެސް ޝިޔާމް ފާހަގަކުރެއްވިއެވެ.