މި އަހަރު މަސްދަޅު ކޭސް ނެގުމަށް، ކިއުގައި ގިނައިރު ހޭދަކުރަން ނުޖެހޭނެ ކަމަށް ސިޓީސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
މިނިސްޓަރު ޝަރީފް މި މޭރުމުން ވިދާޅުވީ މިއަދު ރަށްވެހި މާލަމުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ. މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމަށް ވަޑައިގަތީއްސުރެ ކޮންމެ އަހަރަކު ވެސް ރައްޔިތުންނަށް ރޯދަ ހަދިޔާގެ ގޮތުގައި ކޮންމެ ވެސް މިންވަރެއް ސަރުކާރުގެ ފަރާތުން ހަދިޔާކުރައްވަމުން ގެންދަވާ ކަމަށެވެ.
އެގޮތުން މިދިޔަ އަހަރާއި މި އަހަރުވެސް ސަރުކާރުން ނިންމާފައިވަނީ ރާއްޖޭގެ ކޮންމެ ގޭބިސީއަކަށް 48 ދަޅު ހިމެނޭ މަސްދަޅު ކޭސް ބެހުމަށް ކަމަށް މިނިސްޓަރު ވަނީ ވިދާޅުވެފަ އެވެ.
މިނިސްޓަރު ޝަރީފް ވިދާޅުވީ މިއަދު 12:00 އިން ފެށިގެން ޕޯޓަލް މެދުވެރިކޮށް ހުރިހާ ފަރާތްތަކަށްވެސް ޓޯކަން ނެގުމަށް ރަޖިސްޓްރީ ހުޅުވާލެވިގެންދާނެ ކަމަށެވެ. އަދި މި މަސްދަޅު ކޭސް ނެގުމުގައި އެއްވެސް ފަރާތަކުން ކިއުގައި ޖެހެން ނުޖެހޭނެ ކަމަށް މިނިސްޓަރު ވިދާޅުވި އެވެ.
"އަޅުގަނޑުމެން މި ބަލަނީ މިދިޔަ އަހަރެކޭ އެއްގޮތަށް މި އަހަރު ވެސް ޕޯޓަލް މެދުވެރިކޮށް މި އިންތިޒާމު ހަމަޖައްސައިދިނުން،" --- މިނިސްޓަރު ޝަރީފް ވިދާޅުވި އެވެ.
މަސްދަޅު ކޭސް ބެހުމުގެ މަސައްކަތް ކުރުމަށް ރާވާފައިވަނީ އަންނަ ހޮނިހިރު ދުވަހުގެ ރޭގަނޑު 20:30 އިން ފެށިގެން ކޮންމެ ރެއެއްގެ 11:00 އާއި ހަމައަށް ހުކުރު ދުވަސް ފިޔަވައި ކޮންމެ ދުވަހަކު އެވެ. މިނިސްޓަރު ޝަރީފް ވިދާޅުވީ އަންނަ ފެބްރުއަރީ މަހުގެ 11 ވަނަ ދުވަހުގެ ކުރިން މަސްދަޅު ކޭސް ބެހުމުގެ މަސައްކަތް ނިންމާލެވޭނެ ކަމަށް އުންމީދު ކުރައްވާ ކަމަށެވެ.
މިނިސްޓަރު ޝަރީފް ވިދާޅުވީ، މާލޭ ސިޓީގައި މަސްދަޅު ކޭސް ބެހުމުގެ މަސައްކަތް ކުރިއަށްގެންދިއުމުގައި ބަލާނީ ގޭބިސީގެ ގޮތުގައި ވަކި ކަރަންޓު މީޓަރު ނަންބަރެއް ލިބިފައިވާ ކޮންމެ ބަޔަކީ ވެސް މީގެ ތެރޭގައި ހިމެނޭނެ ބައެއް ކަމަށެވެ. އަތޮޅުތެރޭގެ ރަށްރަށުގައި މަސްދަޅު ކޭސް ބެހުމުގެ މަސައްކަތް ކުރިއަށްގެންދިއުމުގައި ބަލާނީ އެ ރަށްރަށުން މިނިސްޓްރީން ހޯދާފައިވާ ގޭބިސީތަކުގެ ލިސްޓުގައިވާ ގޮތުގެ މަތިން މަސްދަޅު ކޭސްތައް ބެހުމުގެ މަސައްކަތްކުރިއަށް ގެންދިއުމަށް ކަމަށް މިނިސްޓަރު ވިދާޅުވި އެވެ.
މިނިސްޓްރީން އެއްކުރި މައުލޫމާތަށް ބަލާއިރު، އަތޮޅުތަކުގައި ޖުމްލަ 56،918 ގޭބިސީގެ ގޮތުގައި ރަޖިސްޓްރީކޮށްފައިވާ ކަމަށާއި މާލޭ ސަރަހައްދުގައި ޖުމްލަ 61،755 ގޭބިސީ ރަޖިސްޓްރީ ކޮށްފައިވާކަން އެނގޭ ކަމަށް މިނިސްޓަރު ޝަރީފް ވިދާޅުވި އެވެ. އެހެން ކަމުން ޖުމްލަ 118،673 ގޭބިސީއަކަށް މަސްދަޅު ކޭސް ލިބޭނެ ކަމަށް މިނިސްޓަރު ޝަރީފް ވިދާޅުވި އެވެ.
މާލޭ ސަރަހައްދުގައި ޖުމުލަ 15 ތަނަކުން މަސްދަޅު ކޭސް ބެހުމުގެ އިންތިޒާމުތައް ހަމަޖެހިފައިވާއިރު މާލޭގެ އަށް ތަނަކުން، ވިލިމާލޭގެ އެއް ތަނަކުން އަދި ހުޅުމާލޭގެ ހަ ތަނަކުން މަސްދަޅު ކޭސް ލިބޭނެ އިންތިޒާމު ވަނީ ހަމަޖެހިފަ އެވެ.
މާލޭގައި މަސްދަޅު ކޭސް ލިބޭނެ އިންތިޒާމު ހަމަޖެހިފައިވާ ތަންތަން:
- މިފްކޯ މަރުކަޒު
- ސޯޝަލް ސެންޓަރު
- އެމްޓީސީސީ ސޯމިލް
- ހެންވޭރު ބޯޅަ ދަނޑު
- ގަލޮޅު ބޯޅަ ދަނޑުގެ ހަތަރު ފަރާތް
ހުޅުމާލޭގައި މަސްދަޅު ކޭސް ލިބޭނެ އިންތިޒާމު ހަމަޖެހިފައިވާ ތަންތަން:
- އުމަރު ޒާހިރު ބިލްޑިން
- ޕޮލްކޯ ޓަވަރު
- މުހައްމަދު ގާސިމް ޕްރީސުކޫލް
- ކާމިލް ދީދީ ސްކޫލް
- ހިޔާ ޓަވަރު 10
- ވިނަރެސް ފްލެޓް
މީގެ އިތުރުން ވިލިމާލޭ ވެމްކޯ ސައިޓުން މަސްދަޅު ކޭސް ލިބޭނެ އިންތިޒާމު ހަމަޖެހިފައިވާ ކަމަށް މިނިސްޓަރު ޝަރީފް ވަނީ ވިދާޅުވެފަ އެވެ.
މިނިސްޓަރު ޝަރީފް ވިދާޅުވީ، ރާއްޖޭގެ ހުރިހާ ގޭބިސީއަކަށް ވެސް މަސްދަޅު ކޭސް ލިބޭނެކަން ކަށަވަރުކުރައްވާނެ ކަމަށެވެ. މިކަމާ ގުޅިގެން އެއްވެސް ޝަކުވާއެއް އޮތްނަމަ 7741446 ގުޅުއްވުމަށް މިނިސްޓަރު ވަނީ އެދިވަޑައިގެންފަ އެވެ.
