އެމެރިކާއިން އީރާނަށް ހަމަލާ ދީފާނެ ކަމަށް ބެލެވޭތީ، އިޒުރޭލުން ދިފާއީ ކަންކަން އިތުރަށް ވަރުގަދަކޮށް ސަލާމަތީ ފިޔަވަޅުތައް އިތުރުކޮށްފި އެވެ.

އިޒުރޭލުގެ މީޑިއާތަކުން ބުނާ ގޮތުގައި އެމެރިކާއިން އީރާނަށް ހަމަލާއެއް ދީފިނަމަ އެ ހަމަލާއަށް ރައްދު ދިނުމުގެ ގޮތުން އީރާނުގެ ވެރިން ދަނީ އިޒުރޭލަށް ހަމަލާ ދިނުމަށް ރާވަމުންނެވެ.

ހަނގުރާމައިގެ ބައެއް ތަޖުރިބާކާރުން ލަފާކުރާގޮތުގައި އީރާނަށް އެމެރިކާއިން ދޭ ހަމަލާގެ ރައްދުގައި އީރާނުން އެންމެ ފުރަތަމަ އަމާޒަކަށް ހަދާނީ އިޒުރޭލެވެ. އޭގެ ފަހުން ގަލްފުގައި ގާއިމުކޮށްފައިވާ އެމެރިކާގެ މަރުކަޒުތަކެވެ.

އިޒުރޭލުގެ ދިފާއީ ވުޒާރާއިން ބުނާގޮތުގައި އިޒުރޭލުގެ ވައިގެ ސިފައިން ވަނީ އެމެރިކާއިން އީރާނަށް ދޭ ހަމަލާތަކާ ގުޅިގެން ސަރަހައްދުގައި އުފެދޭނެ ނުރައްކާތަކަށް ފުރިހަމައަށް ތައްޔާރުވެގެންނެވެ.

އީރާނުގެ މިސައިލު ހަމަލާތަކުން ސަލާމަތްވުމަށްޓަކައި އިޒުރޭލުގެ އެއާލައިންތަކުން ވަނީ އިޒުރޭލުގެ ފަސިންޖަރުން އުދުހޭ ބޯޓުތައް ދުނިޔޭގެ އެކި ކަންކޮޅުތަކަށް ބަދަލުކުރުމުގެ މަސައްކަތް ފަށާފަ އެވެ. އިޒުރޭލުގެ މިނިސްޓަރު އޮފް ޓްރާންސްޕޯޓް ބުނިގޮތުގައި މީގެ ކުރިން ވެސް ބައެއް ބޯޓުތައް ސައިޕްރަސް، އެތެންސް، ތައިލެންޑް، އެމެރިކާ އަދި ޔޫރަޕްގެ އެހެން ގައުމުތަކަށް ވަނީ ބަދަލުކޮށްފަ އެވެ.

އިޒުރޭލުގެ ދިފާއީ ވަޒީރު ލެފްޓިނެންޓް ޖެނެރަލް އީޔަލް ޒަމީރު ބުނީ އެގައުމުގެ ސަލާމަތަށް ނުރައްކާވާ ކޮންމެ ދުޝްމަނަކާ ދެކޮޅަށް ފިޔަވަޅު އެޅުމަށް އިޒުރޭލުން އޮތީ ފުރިހަމައަށް ތައްޔާރުވެގެންނެވެ.

އިޒުރޭލުގެ ސިފައިންގެ ވެރިޔާ ވެސް ވަނީ "ކުއްލި ހަނގުރާމައެއް" ފެށިދާނެކަމަށް ބުނެ، ސިފައިން ތައްޔާރަށް ތިބި ކަމަށް ވެސް ބުނެފަ އެވެ. ވިދާޅުވެފައެވެ.