ސްވިޒަލޭންޑުގެ ދާވޯސްގައި މިހާރު ކުރިއަށްދާ ވޯލްޑް އިކޮނޮމިކް ފޯރަމް (ޑަބްލިއުއީއެފް) ގެ ތެރެއިން، ދިވެހި ކޮންޓެންޓް ކްރިއޭޓަރުންނަށް ޓިކްޓޮކް މެދުވެރިކޮށް އާމްދަނީ ހޯދޭނެ ގޮތްތަކާ ގުޅޭގޮތުން ދިވެހި ސަރުކާރުން މުހިންމު މަޝްވަރާތަކެއް ކުރިއަށް ގެންގޮސްފި އެވެ.

މި މަޝްވަރާތައް ކުރިއަށް ގެންދެވީ އިކޮނޮމިކް މިނިސްޓަރު މުހައްމަދު ސައީދު، ޓިކްޓޮކްގެ މެޓަޕްސާ ސަރަހައްދުގެ ގަވަރުމަންޓް ރިލޭޝަންސް އެންޑް ޕަބްލިކް ޕޮލިސީގެ އިސްވެރިޔާ އެމީރު ގެލެންއާ އެކު ބޭއްވެވި ބައްދަލުކުރެއްވުމުގަ އެވެ. މިއީ ރާއްޖޭގެ ޒުވާނުންނަށް ޑިޖިޓަލް ޕްލެޓްފޯމްތައް މެދުވެރިކޮށް މާލީ މަންފާ ހޯދައިދިނުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ބޭއްވުނު މުހިންމު ބައްދަލުވުމެކެވެ.

އިކޮނޮމިކް މިނިސްޓްރީން ބުނިގޮތުގައި، މި ބައްދަލުކުރެއްވުމުގެ މައިގަނޑު މަގްސަދަކީ ދިވެހި އުފެއްދުންތެރިންނަށް ޓިކްޓޮކް ޕްލެޓްފޯމް މަނިޓައިޒް ކުރެވޭނެ ނުވަތަ އެއިން މާލީ މަންފާ ހޯދޭނެ ފުރުސަތުތައް ފަހިކޮށްދިނުމެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މެނިފެސްޓޯގައި ހިމެނޭ، ޒުވާނުންނަށް ޑިޖިޓަލް އިގްތިސާދެއްގެ ތެރެއިން ފުރުސަތުތައް ހޯދައިދިނުމުގެ ވައުދުގެ ދަށުން ކުރިއަށްގެންދާ މަސައްކަތެކެވެ.

ސައީދު ވިދާޅުވީ، ޓިކްޓޮކް ފަދަ ބައިނަލްއަގުވާމީ ޕްލެޓްފޯމްތަކާއެކު މިފަދަ ގުޅުންތައް ގާއިމުކުރުމަކީ ދިވެހި އުފެއްދުންތެރިންނަށް ދުނިޔޭގެ ބާޒާރުގެ ދޮރުތައް ހުޅުވި، ރާއްޖޭގެ އިގްތިސާދަށް ކުރިއެރުން ލިބޭނެ ކަމެއް ކަމަށެވެ. އަދި މި މަސައްކަތުގައި އަމަލީ ނަތީޖާއަކާ ހަމައަށް ދިއުމަށްޓަކައި ޓިކްޓޮކްގެ ރީޖަނަލް އޮފީސްތަކާ ވާހަކަދައްކަން ފަށާފައިވާ ކަމަށާއި، މިކަމުގައި ޗައިނާ ސަރުކާރުގެ އެހީތެރިކަމަށްވެސް އެދިފައިވާނެ ކަމަށް މިނިސްޓަރު ފާހަގަކުރެއްވި އެވެ.

މީގެ ކުރިންވެސް މިފަދަ މަޝްވަރާތަކެއް ސަރުކާރުން ވަނީ ކުރިއަށް ގެންގޮސްފަ އެވެ. އެގޮތުން ޓިކްޓޮކްގެ މަތީ ފަންތީގެ ވަފުދެއް މީގެކުރިން ރާއްޖެއަށް ޒިޔާރަތްކޮށް، އިކޮނޮމިކް މިނިސްޓްރީއާއެކު ފަންނީ މަޝްވަރާތަކެއް ބާއްވާފައިވެ އެވެ. ސަރުކާރުގެ އަމާޒަކީ ކުރިއަށް އޮތް ތަނުގައިވެސް މި ގުޅުން އިތުރަށް ބަދަހިކޮށް، ދިވެހި ޒުވާނުންނަށް އާމްދަނީ ހޯދޭނެ ފަހި މަގުތަކެއް ހުޅުވައިދިނުން ކަަމަށްވެސް މިނިސްޓަރު ފާހަގަކުރި އެވެ.