މިއަހަރުގެ ރޯދަމަހާ ދިމާކޮށް ހަދިޔާއެއްގެ ގޮތުން ސަރުކާރުން ރައްޔިތުންނަށް ދިނުމަށް ނިންމާފައިވާމަސްދަޅު ކޭސްތައް އަންނަ ބުރާސްފަތި ދުވަހުގެ ކުރިން އުފައްދައި ނިންމާލެވޭނެ ކަމަށް މޯލްޑިވްސް ފިޝަރީޒް އިންޑަސްޓްރިއަލް ކޮމްޕެނީ (މިފްކޯ) އިން މިއަދު ހާމަކޮށްފި އެވެ.
މިފްކޯއިން ބުނީ، ރޯދަ ހަދިޔާގެ ގޮތުގައި ބެހުމަށް ހަމަޖެހިފައިވާ 118،977 މަސްދަޅު ކޭހުގެ ތެރެއިން މިހާތަނަށް 115،078 ކޭސް ތައްޔާރުކޮށް ނިމިފައިވާ ކަމަށެވެ. މިއީ މުޅި ޕްރޮޑަކްޝަންގެ 96.7 އިންސައްތައެވެ. މިހާރު ބާކީ އޮތީ 3،899 މަސްދަޅު ކޭސް ތައްޔާރުކުރުމުގެ މަސައްކަތް ކަމަށާއި، ޖެނުއަރީ 22 ގެ ކުރިން މި ހުރިހާ ކޭހެއް އުފައްދައި ނިންމާލެވޭނެ ކަމަށް އެ ކުންފުނިން ބުންޏެވެ.
ރޯދަ ހަދިޔާގެ ގޮތުގައި ކޮންމެ ގޭބިސީއަކަށް ދިނުމަށް ހަމަޖެހިފައިވަނީ އާންމުކޮށް ބޭނުންކުރާ 180 ގްރާމްގެ 48 ދަޅު ހިމެނޭ މަސްދަޅު ކޭހެކެވެ. މިދިޔަ އަހަރުވެސް ސަރުކާރުން ވަނީ ކޮންމެ ގޭބިސީއަކަށް މަސްދަޅު ކޭހެއް ހަދިޔާކޮށްފަ އެވެ. އޭގެ ކުރީ އަހަރު ރޯދަ ހަދިޔާގެ ގޮތުގައި ދީފައިވަނީ 10 ކިލޯގެ ފުށާއި 10 ކިލޯގެ ހަނޑުލެވެ.
މި އިންތިޒާމުގެ ދަށުން ގޭބިސީއެއްގެ ގޮތުގައި ބަލާނީ ވަކިން ކައްކައި، ކައިބޮއި އަދި ދިރިއުޅޭ ދިވެހި އާއިލާތަކެވެ. ކޮންމެ ގޯއްޗަކުންވެސް ފޯމު ފުރަން ޖެހޭނީ އެ ގޯއްޗެއްގައި ހިމެނޭ ހުރިހާ ގޭބިސީތައް ހިމަނައިގެން އެއް ފޯމެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރޯދަމަހާ ދިމާކޮށް ބަހާ މަސްދަޅު ކޭސްތައް ބަހަން ފަށާނެ ސީދާ ތާރީހެއް އަދި ރަސްމީކޮށް ހާމަކޮށްފައެއް ނުވެ އެވެ. ނަމަވެސް، މިފްކޯއިން އަންނަނީ އެ ތާރީހަށް ހުރިހާ ތަކެއްޗެއް ތައްޔާރުކޮށް ނިންމުމަށް ބާރުސްޕީޑުގައި މަސައްކަތް ކުރަމުންކަން އެ ކުންފުނިން ފާހަގަކުރި އެވެ.
