ސަރުކާރުގެ ބޯހިޔާވަހިކަމުގެ ސްކީމުގެ ދަށުން ބިމާއި ގޯއްޗަށް އެދި ހުށަހަޅާ ފަރާތްތަކުން މާލޭގައި ދިރިއުޅުނު މުއްދަތު ސާބިތުކޮށްދިނުމަށްޓަކައި ހުށަހެޅިދާނެ ލިޔެކިޔުންތައް ހައުސިން މިނިސްޓްރީން އާންމުކޮށްފި އެވެ.
"ބޯހިޔާވަހިކަން އެންމެނަށް" މި ޕްރޮގްރާމުގެ ދަށުން މާލެ ސިޓީގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ބިމާއި ގޯއްޗަށް އެދި ހުށަހެޅުމަށް ސަރުކާރުން ހުޅުވާލީ މިދިޔަ އާދީއްތަ ދުވަހު އެވެ. އެގޮތުން ޖުމްލަ 7،900 ފުލެޓަށާއި 15،000 ގޯއްޗަށް އެދި ހުށަހެޅުމުގެ ފުރުސަތު ވަނީ ހުޅުވާލާފަ އެވެ.
މިނިސްޓްރީން އާންމުކޮށްފައިވާ ގޮތުގައި، މާލޭގައި ދިރިއުޅުނުކަމުގެ މުއްދަތު ސާބިތުކޮށްދިނުމަށް ތިރީގައިވާ ބަޔާންކޮށްފައިވާ ލިޔެކިޔުންތައް ހުށަހެޅިދާނެ އެވެ. އެއީ؛
- ވަޒީފާގެ ލިޔުން
- ޕެންޝަން ލިޔުން
- މާލޭގައި ދިރިއުޅެފައިވާ ގޭގެ ވެރިފަރާތުން ދީފައިވާ ނޮޓޮރައިޒްކޮށްފައިވާ އެޕިޑެޓިވް
- މާލެ ނުވަތަ ގްރޭޓާ މާލެ ސަރަހައްދުގެ ސުކޫލަކުން/ތައުލީމީ މަރުކަޒަކުން ކިޔަވާފައިވާކަން އިނގޭ ލިޔުން
- ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކާއި މައުލޫމާތުން މާލޭގައި ދިރިއުޅުނުކަން ސާބިތުވާނަމަ، އެ އިދާރާއަކުން ދީފައިވާ ލިޔުން
މިނިސްޓްރީން ބުނީ އިދާރާއަކުން ދޫކުރާ ލިޔުން ބަލައިގަނެވޭނީ އެ އިދާރާއަކުން ރަސްމީކޮށް ބަލަހައްޓާ މައުލޫމާތުން މާލޭގައި އުޅެފައިވާ މުއްދަތު ސާބިތުވާނަމަ އެވެ. ރަށު ކައުންސިލުން ނުވަތަ އަތޮޅު ކައުންސިލަކުން މާލޭގައި ދިރިއުޅެފައިވާ މުއްދަތު ބަޔާންކޮށް ދޫކުރާ ލިޔުމަކީ އެ ކައުންސިލެއްގައި ބަލަހައްޓާ މައުލޫމާތުގެ މައްޗަށް ބިނާކޮށް ސާބިތުކޮށް ނުދެވޭ ލިޔުމެއް ކަމުގައިވާނަމަ އެ ލިޔުމަކީ ބަލައިގަނެވޭނެ ލިޔުމެއް ނޫން ކަމަށްވެސް މިނިސްޓްރީން ވަނީ ހާމަކޮށްފަ އެވެ.
މިއީ މީގެ ކުރީގައި ވެސް އާންމު ގޮތެއްގައި މާލޭގައި ދިރިއުޅުކަން ސާބިތުކޮށްދިނުމުގެ ގޮތުން ހުށަހެޅޭނެ ލިޔެކިޔުންތައްކަން ފާހަގަކޮށްލެވެ އެވެ.
ހައުސިން މިނިސްޓަރު މުއްތަލިބު ވިދާޅުވި ގޮތުގައި މި ސަރުކާރުގެ މި ފަސް އަހަރުގެ ދައުރު ނިމުމުގެ ކުރިން މާލެ ސަރަހައްދުގައި އަޅަން ނިންމާފައިވާ 7،900 ހައުސިން ޔުނިޓު އަޅައި އެތަންތަނަށް މީހުން ވަދެވޭވަރު ކުރާނެ ކަމަށެވެ. މިނިސްޓަރު ވިދާޅުވި ގޮތުގައި އެ މަޝްރޫއަށް ބޭނުންވާ ފައިނޭންސް ވެސް މިހާރު ވަނީ ހަމަޖެހިފަ އެވެ.
މާލޭގެ ތޮށްޖެހުން ކުޑަކުރުމުގެ ގޮތުން ސަރުކާރުން ދޫކުރާ ބިންތައް ދޫކުރަން ހަމަޖެހިފައިވަނީ ބާރު ސްޕީޑެއްގައި މިހާރު ހިއްކަމުންދާ ރަސްމާލެ އިންނެވެ. ސަރުކާރުން ލަފާ ކުރާގޮތުގައި އަންނަ އޭޕްރީލް މަހުގެ ނިޔަލަށް ރަސްމާލެ އެއްކޮށް ހިއްކައި ނިމޭނެ އެވެ.
މިދިޔަ ސަރުކާރުން މާލެ ރައްޔިތުންނަށް ދީފައިވާ ގޯތި ދިނުމުގެ ގޮތުން ހިއްކަން ފަށާފައިވާ ހުޅުމާލެ ފޭސް 3 ގެ މުޅި ޖުމްލަ %98 ބިން މިހާރު ވަނީ ހިއްކާފަ އެވެ.
