ބިދޭސީ މަސައްކަތްތެރިން ގެންގުޅޭ ސައިޓުތަކުގެ ތެރެއިން ޕްރޮޖެކްޓް މުއްދަތު ހަމަވެފައިވާ ސައިޓްތައް އަލުން ރަޖިސްޓްރީކުރުމަށް ހޯމްލޭންޑް މިނިސްޓްރީން އަންގައިފި އެވެ.

ހޯމްލޭންޑް މިނިސްޓްރީން ކުރި އިއުލާނެއްގައި ބުނީ ބިދޭސީންނަށް ދޫކުރާ ހުއްދަތަކާއި އެމީހުންގެ ކަންކަން ބެލެހެއްޓުމަށްޓަކައި މިހާރަށްވުރެ ހަރުދަނާ ނިޒާމެއް ގާއިމުކުރުމުގެ މަސައްކަތް ކުރަމުންދާ ކަމަށެވެ.

އެގޮތުން އެކްސްޕެޓް ސިސްޓަމްގައިވާ މައުލޫމާތަށް ބަލާއިރު ޕްރޮޖެކްޓްގެ މުއްދަތު ހަމަވެފައިވާ ސައިޓުތައް، މިއަދުން ފެށިގެން "ޕެންޑިން ސައިޓް ކްލިއަރެންސް" ހާލަތަށް ބަދަލުކުރެވޭނެ ކަމަށާއި ރަޖިސްޓްރީކޮށްފައިވާ ސައިޓުތަކުގެ ތެރެއިން އެއް އަހަރަށްވުރެ ގިިނަ ދުވަސްވަންދެން ކޯޓާ ބޭނުންކޮށްފައިނުވާ ތަންތަން، މި މަހުގެ 25 ވާ އާދިއްތަ ދުވަހުން ފެށިގެން "އިން-އެކްޓިވް" ސައިޓުތަކުގެ ގޮތުގައި ކަނޑައެޅޭނެ ކަމަށް އެ މިނިސްޓްރީން ބުންޏެވެ.

ބިދޭސީންނާ ގުޅޭ މައްސަލަތައް ހައްލުކުރުމަށްޓަކައި ދައުލަތުގެ ކަމާބެހޭ ހުރިހާ އިދާރާތަކެއް ގުޅިގެން މިހާރު އަންނަނީ މަސައްކަތްތަކެއް ކުރަމުންނެވެ. މިގޮތުން، ރާއްޖޭގައި ބިދޭސީން ވަޒީފާ އަދާކުރުމުގެ ކަންކަން ހަރުދަނާކުރުމަށްޓަކައި ހުއްދަ ދޫކުރުމުގެ ނިޒާމަށް ވަނީ ބޮޑެތި އިސްލާހުތަކެއް ގެނެސްފަ އެވެ. މިހާރުގެ އުސޫލު އޮންނަ ގޮތުން، ބިދޭސީން ގެނައުމަށްޓަކައި މަސައްކަތްކުރާ ސައިޓުތައް ޕްރޮޖެކްޓް އުސޫލުން ރަޖިސްޓްރީ ކުރަންޖެހެ އެވެ.

ހޯމްލޭންޑް މިނިސްޓްރީން ވަނީ މުއްދަތު ހަމަވެފައިވާ ސައިޓުތައް އަލުން އެކްޓިވް ކުރުވުމަށްޓަކައި، ބޭނުންވާ ލިޔެކިޔުންތައް އާކޮށް އެކްސްޕެޓް ސިސްޓަމް މެދުވެރިކޮށް އަޕްޑޭޓްކުރުމަށް ވަޒީފާދޭ ފަރާތްތަކަށް އަންގާފަ އެވެ.

ބިދޭސީން ގެނައުމަށްފަހު އެކަށީގެންވާ ބެލެހެއްޓުމެއް ނެތި ދޫކޮށްލާ މައްސަލައާއި، ވަކި މަސައްކަތްތަކަކަށް ސައިޓުތައް ރަޖިސްޓްރީކޮށްގެން ނަހަމަ ފައިދާ ހޯދާ މައްސަލަ ވަނީ ބޮޑުވެފަ އެވެ. މިފަދަ ކަންކަން ހުއްޓުވައި، ރާއްޖޭގެ މަސައްކަތުގެ މާހައުލަކީ ގަވާއިދަށް ތަބާވާ ތަނަކަށް ހެދުމަށްޓަކައި، އުސޫލުތައް އިސްލާހުކޮށް ނިޒާމު ހަރުދަނާކުރުމުގެ މަސައްކަތް ސަރުކާރުން ދަނީ ކުރަމުންނެވެ. .

މީގެ އިތުރުން ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށްޓަކައި ހޯމްލޭންޑް މިނިސްޓްރީއާއި އިމިގްރޭޝަން ގުޅިގެން އަންނަނީ ހާއްސަ މަސައްކަތްތަކެއް ކުރަމުންނެވެ. މިގޮތުން ބިދޭސީންގެ ބަޔޯމެޓްރިކްސް ނެގުމުގެ މަސައްކަތް ކުރަމުންދާއިރު، މިހާތަނަށް 181,093 މީހުންގެ މައުލޫމާތު ވަނީ އެއްކުރެވިފަ އެވެ. އަދި މި މައުލޫމާތު ފޯރުކޮށްނުދޭ ފަރާތްތައް ޑީޕޯޓްކުރުމަށްވެސް މިހާރު ވަނީ ނިންމާފަ އެވެ.