ރާއްޖޭގެ ހުރިހާ ރަށަކަށް މެދުނުކެނޑި އެމްބިއުލާންސްގެ ހިދުމަތް ދިނުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، 56 ރަށަކަށް ހާއްސަކުރި އެމްބިއުލާންސްތައް އެ ރަށްތަކަށް ފޮނުވުމުގެ އަމަލީ މަސައްކަތް ފަށައިފި އެވެ.

މި މަޝްރޫއަށް ބޭނުންވާ އެމްބިއުލާންސް ހޯދުމުގެ މަސައްކަތް ކޮންޓްރެކްޓާ ފައިނޭންސްގެ އުސޫލުގެ ތެރެއިން ހަވާލުކޮށްފައިވަނީ އެމްޕީއެލްއާ އެވެ. އެ ކުންފުންޏާއި ހަވާލުކުރި މަސައްކަތުގެ ތެރެއިން ޖުމްލަ 56 އެމްބިއުލަންސް ރާއްޖެ ގެނެސް ރަށްރަށަށް ފޮނުވުމުހެ މަސައްކަތް މިހާރު ވަނީ ފަށާފަ އެވެ.

މި މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަތޮޅުތަކަށް ކުރެއްވި ދަތުރުފުޅުތަކުގައި، ރަށްރަށުގެ ކައުންސިލްތަކާއި މުއައްސަސާތަކުން ފާހަގަކުރި ސިއްހީ ދާއިރާގެ މައްސަލަތަކަށް ހައްލެއް ހޯއްދަވައިދެއްވުމަށް ފެއްޓެވި މަސައްކަތެކެވެ. ސިއްހީ ނިޒާމުގައި ހުރި އެންމެ ބޮޑު އެއް ގޮންޖެހުމަކީ އެމްބިއުލާންސްގެ ހިދުމަތް ދެމެހެއްޓެނިވި ގޮތެއްގައި ނުލިބުން ކަމަށްވާތީ، އެކަން ހައްލުކުރުމަށް ސަރުކާރުން އަންނަނީ މަސައްކަތް ކުރަމުންނެވެ.

އެގޮތުން އެމްޕީއެލް އާއި ހަވާލުކުރި މި މަޝްރޫއުގެ ފުރަތަމަ ފިޔަވަހީގެ ދަށުން ގެނައި 56 އެމްބިއުލާންސްގެ ތަޅުދަނޑި މިހާރު ވަނީ ރަށްތަކާ ހަވާލުކޮށްފަ އެވެ. އެމްޕީއެލްއިން ބުނާގޮތުގައި މި މަސް ނިމުމުގެ ކުރިން ހުރިހާ ރަށަކަށް އެމްބިއުލާންސްތައް ފޯރުކޮށްދީ ނިންމާލެވޭނެ އެވެ. މި މަޝްރޫއަށް ޖުމްލަ 65.3 މިލިއަން ރުފިޔާ ވަނީ ހަރަދުކޮށްފަ އެވެ.

މީގެ އިތުރުން، މިއަހަރުގެ ތެރޭގައި އިތުރު 31 ރަށަކަށް އާ އެމްބިއުލާންސް ހޯދުމާއި، މާލެ ސަރަހައްދާއި އެހެނިހެން ސިޓީތަކުގައި ޕެރަމެޑިކް ހިދުމަތް ދިނުމަށް ބޭނުންވާ 10 އެމްބިއުލާންސް ގެނައުމުގެ މަސައްކަތް ކުރިއަށްދާނެ ކަމަށް ހެލްތް މިނިސްޓްރީން މައުލޫމާތު ދެއެވެ.