ކުރިއަށް އޮތް ލޯކަލް ކައުންސިލް އިންތިހާބުގައި ޕީއެންސީގެ ކެންޑިޑޭޓުންނަށް ތާއީދުކުރުމަށް ޖުމްހޫރީ ޕާޓީގެ ކައުންސިލުން ފާސްކޮށްފި އެވެ.

މިއަދު ބޭއްވި އެ ޕާޓީގެ ކައުންސިލް ބައްދަލުވުމުގައި އެ ޕާޓީގެ ލީޑަޝިޕުން ނިންމާފައިވަނީ ހަމައެކަނި މާމިގިލީ ދާއިރާ އަށް ކެންޑިޑޭޓުން ނެރުމަށެވެ. މާމިގިލީ ދާއިރާއަކީ އެ ޕާޓީގެ ލީޑަރު ގާސިމް އިބްރާހީމް މަޖިލީހުގައި އިންތިހާބުވެފައިވާ ދާއިރާ އެވެ.

ކައުންސިލުން ދެން ނިންމާފައިވަނީ އެހެން ރަށްތަކަށާއި ސިޓީތަކަށް ވާދަކުރައްވާ ޕީއެންސީގެ ކެންޑިޑޭޓުންނަށް ތާއީދު ކުރުމަށެވެ. ކައުންސިލް ބައްދަލުވުމުގެ ރިޔާސަތު ބެލެހެއްޓެވީ ގާސިމް އިބްރާހީމެވެ.

ޕީއެންސީގެ މިހާރު މި ހިނގަމުންދާ ސަރުކާރާއެކު ޖޭޕީން ކޯލިޝަނެއް ހަދާފައި ނެތްނަމަވެސް މި ސަރުކާރުގެ ސިޔާސަތުތަކަށް ގާސިމް އިބްރާހިމް ދަނީ ތައުރީފުކުރައްވަމުންކަން ފާހަގަކޮށްލެވެ އެވެ. ރައީސުލްޖުމްހޫރިއްޔާ، މިދިޔަ އަހަރު މާމިގިލީ ދާއިރާ އަށް ކުރެއްވި ރަސްމީ ދަތުރުފުޅުގައި ވެސް ގާސިމް އިބްރާހިމް ބައިވެރިކުރެއްވިކަން ފާހަގަކޮށްލެވެ އެވެ.

ކައުންސިލް އިންތިހާބުގައި ވާދަކުރެއްވުމަށް މިހާރު ފުރުސަތު ހުޅުވާލާފައިވާއިރު، އިންތިހާބު ބާއްވަން އިލެކްޝަނުން ކަނޑައަޅާފައިވާ ތާރީހަކީ އޭޕްރިލް 4 ވަނަ ދުވަހެވެ.