ފަހަކަށް އައިސް ނަގަން ޖެހޭ ހުއްދަތައް ނުނަގައި އެކި ކަންކަމަށް ބޭނުންކުރާ ބޭސް އެތެރެކޮށް އޮންލައިން ޕޭޖުތަކުގައި އިސްތިހާރުކޮށް، ވިއްކަމުންދާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން އިލްތިމާސްކޮށްފި އެވެ.
އެމްއެފްޑީއޭއިން މިއަދު ނެރުނު ބަޔާނެއްގައި ބުނީ ރާއްޖެއަށް ބޭސް އިމްޕޯޓުކޮށް ވިއްކޭނީ، ބޭހާއިބެހޭ ގަވާއިދުގައިވާ ގޮތުގެ މަތިން އެ އޮތޯރިޓީގެ ބޭސް އިމްޕޯޓުކުރާ އަދި ވިއްކާ ފަރާތެއްގެ ގޮތުގައި ރަޖިސްޓްރީކޮށް ހުއްދަ ލިބިފައިވާ ފަރާތްތަކަށް އެކަނި ކަމަށެވެ.
އެހެން ނަމަވެސް ފަހަކަށް އައިސް ނަގަންޖެހޭ ހުއްދަތައް ނުނަގައި އެކި ކަންކަމަށް ބޭޏުންކުރާ ބޭސް އެތެރެކޮށް، ތަފާތު އޮންލައިން ޕޭޖްތަކުގައި އިޝްތިހާރުކޮށް ވިއްކަމުން ގެންދާކަން އެ އޮތޯރިޓީއަށް ފާހަގަކުރެވިފައިވާ ކަމަށެވެ.
އެގޮތުން، ލޭގައި ހަކުރު ހުންނަ މިންވަރު ދަށްކުރުމަށް ބޭނުންކުރާ "ސެމަގްލުޓައިޑް" ނަމަކަށް ކިޔާ ބޭހަކީ ހަށިިގަނޑުގެ ބަރުދަން ލުއިކުރާ ބޭހެއް ކަމަށާއި، ހަމުގެ މައްސަލަތަކުގައި ބޭނުންކުރާ "އެޒެލައިކް އެސިޑް" އަކީ މޫނުގެ ހަންގަނޑު ރީތިކޮށް އަލިކުރާ ބޭހެއް ކަމަށް ބުނެ، އޮންލައިން ޕޭޖްތަކުގައި އިޝްރިހާރުކޮށް، ވިއްކަމުން ގެންދާ ކަމަށް ފާހަގަކުރެވިފައިވާ ކަމަށް އެ އޮތޯރިޓީން ނެރެފައިވާ ބަޔާނުގައި ވަނީ ބުނެފަ އެވެ.
އެމްއެފްޑީއޭއިން ބުނީ މިފަދަ ބޭސްތަކަކީ ކޮންމެހެން ބޭނުން ކުރަންޖެހޭ ހާލަތުގައި އެކަމެއްގެ ހާއްސަ ޑޮކްޓަރު ލިޔެދިނުމުން ނޫނީ ބޭނުންކޮށްގެން ނުވާނެ ބޭސްތަކެއް ކަމަށެވެ. އަދި ފާމަސީތަކުން ވެސް މިފަދަ ބޭސްތައް ދޫކުރެވޭނީ ޑޮކްޓަރުން ލިޔެދީފައިވާ ބޭސްސިޓީއަށް ކަމަށް އެމްއެފްޑީއޭގެ އެ ބަޔާނުގައި ވަނީ ބުނެފަ އެވެ.
ޑޮކްޓަރުގެ ލަފަޔާއި އިރުޝާދާ ނުލައި އެފަދަ ބޭސްތައް ބޭނުންކުރުމުން ހީވެސް ނުކުރާ ފަދަ ހިތާމަވެރި ހާލަތަކަށް ހުށަހެޅުމަކީ ދުރުގައިވާ ކަމެއް ނޫނެވެ. --- އެމްއެފްޑީއޭގެ ބަޔާނުގައި ބުނެފައިވެ އެވެ.
އެމްއެފްޑީއޭއިން ނަގަންޖެހޭ ހުއްދަ ނުނަގައި ރާއްޖެއަށް ބޭސް އެތެރެކޮށް، ވިއްކާ ފަރާތްތަކާމެދު ފިޔަވަޅު އަޅާނެ ކަމަށް އެ އޮތޯރިޓީން ވަނީ ބުނެފަ އެވެ.
