ސައިބާ ސެކިއުރިޓީ އެންޑް ރެޒިލިއެންސްގެ ދާއިރާއިން މަތީ ފަންތީގެ ތަމްރީންތަކެއް ހާސިލުކުރުމަށްޓަކައި 15 ދިވެހިންގެ ވަފުދެއް އޮސްޓްރޭލިއާއަށް ފުރައިފި އެވެ. މި މަހުގެ 19 އިން ފެށިގެން ފެބްރުއަރީ މަހުގެ 3 ވަނަ ދުވަހުގެ ނިޔަލަށް ކުރިއަށްދާ މި ޕްރޮގްރާމަކީ ރާއްޖޭގެ ސައިބާ ސަލާމަތާއި ރައްކާތެރިކަން ވަރުގަދަކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ހިންގޭ މުހިންމު ހަރަކާތެކެވެ.
މި ތަމްރީނު ޕްރޮގްރާމް ކުރިއަށްގެންދަނީ ރައީސުލްޖުމްހޫރިއްޔާގެ އޮފީހާއި، ސައިބަރ ސެކިއުރިޓީ އެޑިޔުކޭޝަން އެންޑް ރިސާޗްގެ ދާއިރާއިން ބައިނަލްއަގުވާމީ ފެންވަރުގައި ފާހަގަކޮށްލެވޭ އޮސްޓްރޭލިއާގެ އެޑިތު ކޯވަން ޔުނިވަސިޓީ (އީ.ސީ.ޔޫ) ގުޅިގެންނެވެ. މި ޕްރޮގްރާމްގެ ހުރިހާ ހަރަދެއް ބަލަހައްޓަނީ އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާޒް އެންޑް ޓްރޭޑް (ޑީ.އެފް.އޭ.ޓީ) ގެ "އޮސްޓްރޭލިއާ އެވޯޑްސް 2026" ގެ މާލީ އެހީތެރިކަމުގެ ދަށުންނެވެ.
މި ތަމްރީނުތައް ކުރިއަށްދާނީ އެޑިތު ކޯވަން ޔުނިވަސިޓީގެ އިތުރުން ވެސްޓާން އޮސްޓްރޭލިއާގެ ސައިބާ ސެކިއުރިޓީއާ ގުޅުންހުރި މުއައްސަސާތަކުގަ އެވެ. މި ޕްރޮގްރާމްގައި ބައިވެރިންނަށް އެޑްވާންސް ސައިބާ ގަވަރނަންސް، ޑިޖިޓަލް ރިސްކް މެނޭޖްމަންޓް، އިންސިޑެންޓް ރެސްޕޮންސް ކޯޑިނޭޝަން އަދި ރެސިލިއަންސް ޕްލޭނިންގ ފަދަ މުހިންމު ދާއިރާތަކުން އަމަލީ ތަޖުރިބާއާއި އިލްމު ލިބިގެންދާނެ އެވެ.
Advertisement
މި ޕްރޮގްރާމާ ގުޅޭގޮތުން މި މަހުގެ 13 ވަނަ ދުވަހު ރައީސުލްޖުމްހޫރިއްޔާގެ އޮފީހުގައި ވަނީ ހާއްސަ ބައްދަލުވުމެއް ބާއްވާފަ އެވެ. މި ބައްދަލުވުމުގައި އޮސްޓްރޭލިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖެސަޕާއި، ނޭޝަނަލް ސެކިއުރިޓީ އެޑްވައިޒަރ އިބްރާހީމް ލަތީފާއި، ހޯމް މިނިސްޓްރީގެ ސްޓޭޓް މިނިސްޓަރ ޑރ. މުހައްމަދު ކިނާނަތު ބައިވެރިވެވަޑައިގެންނެވި އެވެ. އަދި އެޑިތު ކޯވަން ޔުނިވަސިޓީގެ މަންދޫބުން އޮންލައިންކޮށް މި ބައްދަލުވުމުގައި ބައިވެރިވެ، ޕްރޮގްރާމްގެ މަގްސަދުތަކާއި އެކަޑެމިކް މޮޑިއުލްތަކާ ބެހޭ މައުލޫމާތު ހިއްސާކުރެއްވި އެވެ.
ސަރުކާރުން ދެކޭގޮތުގައި މި ތަމްރީނު ޕްރޮގްރާމަކީ "މޯލްޑިވްސް 2.0" ވިޝަންގެ ދަށުން، ރާއްޖޭގެ ޑިޖިޓަލް އިންފްރާސްޓްރަކްޗާ ވަރުގަދަކޮށް، ޑިޖިޓަލައިޒޭޝަން އެޖެންޑާ ކުރިއެރުވުމަށް އެޅިގެންދާ ވަރަށް މުހިންމު ފިޔަވަޅެކެވެ. މި ޕްރޮގްރާމަށް ފުރުމުގެ ކުރިން ބައިވެރިން ވަނީ ބޭނުންވާ އިރުޝާދުތައް ހިމެނޭ ޕްރީ ޑިޕާޗާ ބްރީފިން އެއްވެސް ފުރިހަމަކޮށްފަ އެވެ.
