އީރާނުގެ މައްސަލައިގައި މުޅި މެދުއިރުމަތި އެލާޓް ވެފައިވާ ދަނޑިވަޅުގައި އިސްރާއީލުގެ ޖާސޫސީ އިދާރާ ކަމަށްވާ މޮސާދުގެ އެންމެ އިސް ވެރިޔާ ޑޭވިޑް ބާނިއާ މިއަދު އެމެރިކާއަށް ގޮސްފިއެވެ. އޭނާ އެމެރިކާ އަށް ދިޔައީ އީރާނާއި ބެހޭ ގޮތުން އެމެރިކާގެ ޖާސޫސީ އިދާރާތަކާއި އަދި އެމެރިކާ ސަރުކާރުގެ ކަމާބެހޭ ފަރާތްތަކާއި އެކު މަޝްވަރާ ކުރުމަށް ކަމަށް އިސްރާއީލުގެ ޓީވީން ބުންޏެވެ.
ވޮޝިންޓަނާއި އީރާނާއި ދެމެދު ޑިޕްލޮމެޓިކް ޗެނަލްތަކުން މަޝްވަރާ ކުރުމަށް އެމެރިކާ އިން މެދުއިރުމައްޗަށް ޚާއްޞަ ކޮށްފައިވާ މަންދޫބު ސްޓީވް ވިޓްކޯފް އާއި އެކު ވެސް މޮސާޑް ގެ ވެރިޔާ މަޝްވަރާ ކުރާނެ ކަމަށް ޚަބަރު ލިބެއެވެ. މި މަޝްވަރާތައް އޮންނާނީ މިއާމީގައި ކަމަށް ބެލެވެއެވެ.
ރިޕޯޓުތައް ބުނާ ގޮތުގައި މޮސާދުން އެމެރިކާގެ ވެރިންނާއި އެކު ކުރާ މި މަޝްވަރާތަކުގައި ބޮޑަށް އަލިއަޅުވާލާނީ ތެހެރާނުގެ ނިއުކްލިއާ ޕްރޮގްރާމާއި، މިސައިލް ކެޕޭސިޓީއާއި، މެދުއިރުމައްޗަށް ފެތުރިފައިވާ އީރާނުން ކޮންޓުރޯލްކުރާ މިލިޝިއާތަކާއި، އީރާނުގެ އެތެރޭގައި ހިނގަމުންދާ މުޒާހަރާތަކާއި އަދި އެ މުޒާހަރާތަކާއި ގުޅިގެން އީރާނުގެ ސަރުކާރުން މިހާރު އަމަލުކުރަމުންދާ ގޮތުގެ މައްޗަށެވެ.
ބާނިއާގެ ޝެޑިއުލްގެ ތަފްސީލުތައް ރަސްމީކޮށް ހާމަކޮށްފައި ނުވި ނަމަވެސް، އެމެރިކާ އާއި އިސްރާއީލުގެ މަސްދަރުތަކުން ބުނާ ގޮތުގައި މި ދަތުރުގެ ބޭނުމަކީ މެދުއިރުމަތީގައި ބޮޑުވަމުން އަންނަ ނުތަނަވަސްކަން މެނޭޖްކުރާނެ ގޮތަކާ ބެހޭ ގޮތުން އިސްރާއީލާއި ވޮޝިންޓަނާއި ދެމެދު މަޝްވަރާ ކުރުމެވެ.
