މާތްﷲގެ ހަޒުރަތުން ވާތްގާއި މަދަދު ހޯދާ މީހާ ނާއުންމީދުވާން ނުޖެހޭނެ ކަމަށް މިއަދުގެ ހުކުރު ހުތުބާގައި ބުނެފި އެވެ.
ހުކުރު ހުތުބާގައި މި މޭރުމުން ބުނީ ކީރިތި ރަސޫލާ މުހައްމަދު صلى الله عليه وسلمގެ އިސްރާއާއި މިއުރާޖުގެ ދަތުރުފުޅަށް އަލިއަޅުވާލަމުންނެވެ. ހުތުބާގައި ބުނީ، އިސްރާއާއި މިއުރާޖުގެ ދަތުރުފުޅަކީ އެކަލޭގެފާނު އިސްލާމީ ދައުވަތު ދެއްވުމުގައި އުފުއްލަވަމުން ގެންދެވި ބުރަތަކަށާއި އެކަމަށްޓަކައި ތަހައްމަލުކުރެއްވި ދަތިތަކަށާއި، ކެތްތެރިވެ ވަޑައިގަތް ކެތްތެރިވެ ވަޑައިގަތުމަށް މާތްﷲ ދެއްވެވި މަތިވެރި އިނާމެއް ކަމަށެވެ.
އިސްރާއާއި މިއުރާޖުގެ ދަތުރުފުޅަކީ އެކަލޭގެފާނުގެ ނިޔަނެތި އަދި މަދަދުވެރި އަނބިކަނބަލުން ހަދީޖަތުގެފާނާއި އެކަލޭގެފާނަށް ހިމާޔަތް ދެއްވުމުގައި ހުންނެވި ލޮބުވެތި ބޮޑުބޭބޭފުޅު އަވަހާރަވުމުގެ ސަބަބުން ލިބިވަޑައިގަތް ހިތާމައަށް ދެއްވެވި ތަސައްލީއެއް ކަމަށާއި، މި ހާދިސާއިން އެނގެނީ ކޮންމެ އުނދަގޫކަމަކާ އެކު ފަސޭހަ ކަމެއް ވާނޭ ކަން ކަމަށް ހުތުބާގައި ވަނީ ބުނެފަ އެވެ.
އިސްރާއާއި މިއުރާޖުގެ ދަތުރުފުޅުން، ހިތުގެ ތާހިރުކަމާއި، ސަލާމަތްތެރިކަމާއި، އީމާންކަމުން ފުރިގެންވުމުގެ މުހިއްމުކަމުން އިބުރަތް ލިބިގަންނަންޖެހޭ ކަމަށް ހުތުބާގައި ވަނީ ބުނެފަ އެވެ. މީގެ އިތުރުން އެއްވެސް ކަމަކާ ކުރިމަތިލާންވާނީ ސަލާމަތް ހިތަކާއި ފުރިހަމަ އީމާންކަމާއެކުގައި ކަމަށްވެސް ހުތުބާގައި ވަނީ ބުނެފަ އެވެ.
ހަގީގީ އެކުވެރިންނާއި ރަހުމަތްތެރިން އެނގޭނީ ކުރިމަތިވާ ބޮޑެތި ކަންކަމުން ކަން ފާހަގަކުރަމުން ހުތުބާގައި ބުނީ ކީރިތި ރަސޫލާ، އިސްރާއާއި މިއުރާޖުގެ ވާހަކަފުޅުތައް މައްކާގެ އަހުލުވެރިންގެ ގާތުގައި ދެއްކެވުމުން، އެކަލޭގެފާނު ދޮގުކުރެއްވުމުގައްޔާއި، މުއުމިނުންގެ ހިތްތަކުގައި އެކަލޭގެފާނާ މެދު ޝައްކު އުފެއްދުމަށް މުޝްރިކުން އަވަސްވެގަތް ކަމަށެވެ. އެހެން ނަމަވެސް އެ ނާޒުކު ދަނޑިވަޅުގައި އެއްވެސް ޖެހިލުންވުމަކާއި ނުލައި ސާބިތުކަމާއެކު އެކަލޭގެފާނުގެ ބަސްފުޅުތައް އަބޫބަކުރުގެފާނު ތެދުކުރެއްވި ކަމަށްވެސް ހުތުބާގައި ވަނީ ބުނެފަ އެވެ.
މީގެ އިތުރުން އިންސާނާ ކުރާ ކޮންމެ ހެޔޮ ކަަމަކަށް މާތްﷲ މަތިވެރި ސަވާބާއި ދަރުމަދެއްވާނެ ކަން އިސްރާއާއި މިއުރާޖުގެ ދަތުރުފުޅުން ކަށަވަރުވާ ކަމަށްވެސް ހުތުބާގައި ވަނީ ބުނެފަ އެވެ.
