ގިނަ އަދަދެއްގެ ޓޫރިސްޓުން ގޮވައިގެން ކ. މާފުއްޓަށް ދަތުރުކުރަމުންދިޔަ ލަކުޑި ފެރީއެއް ފަރަށް އަރައިފި އެވެ.

މެރިން ޕޮލިސް އިން ސޯޝަލް މީޑިއާގައި ކުރި ޕޯސްޓެއްގައި ބުނެފައިވާ ގޮތުން އެ ފެރީ ފަރަށް އެރީ މިއަދު 11:24 ހާއިރު އެނބޫދޫ ފަރަށެވެ. ފެރީ ފަރަށް އަރަން ދިމާވީ އޭގެ އިންޖީނު ހުއްޓިގެން ކަމަށް އެ ޕޯސްޓުގައި ވަނީ ބުނެފައެވެ.

ފުލުހުން ބުނީ އެ ފެރީން ދަތުރުކުރި އެންމެންވެސް ރައްކާތެރިކަމާއެކު ސަލާމަތް ކޮށްފައިވާ ކަމަށެވެ. އެގޮތުން ފެރީން 67 ޓޫރިސްޓުންނާއި، ތިން ދިވެހިންނާއި ބިދޭސީ ދެ ފަޅުވެރިން ދަތުރުކުރި ކަމަށް ފުލުހުން ބުންޏެވެ.

ފުލުހުން ބުނީ އެ ފެރީ ފުންކުރުމުގެ މަސައްކަތް އުޅަނދުގެ ވެރިފަރާތާ ގުޅިގެން ކުރަމުން އަންނަ ކަމަށެވެ.

މާލެ އާއި ގުޅި އަދި މާފުއްޓާ ދެމެދު، ހުކުރު ދުވަސް ފިޔަވާ ކޮންމެ ދުވަހަކު ކޮޅަކަށް އެއް ދަތުރު ކުރާ މި ދޯނި ފެރީއަކީ އަދިވެސް ގިނަ ބަޔަކު ދަތުރުކުރާ އަދި މުދާ އުފުލުމަށް ވެސް ބޭނުންކުރާ އެމްޓީސީސީގެ ފެރީއެކެވެ.