ހަފްތާއެއްގެ ތެރޭގައި މާލެ ސިޓީ، ސިނަމާލެ ބްރިޖް އަދި ހައިވޭ ހިމެނޭ ސަރަހައްދުގައި ޖުމްލަ 67 މަގުމަތީ އެކްސިޑެންޓް ހިނގާފައިވާ ކަމަށް ރިޕޯޓް ކޮށްފައިވާ ކަމަށް ފުލުހުން ބުނެފި އެވެ.
ފުލުހުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، މި މަހުގެ ހަތަރު ވަނަ ދުވަހުން ފެށިގެން 10 ވަނަ ދުވަހާ ހަމައަށް އެންމެ ގިނަ އެކްސިޑެންޓް ހިނގާފައިވަނީ މާލެ ސިޓީގަ އެވެ. އެގޮތުން މާލެ ސިޓީގައި 56 އެކްސިޑެންޓެއް ހިނގާފައިވާ ކަމަށް ފުލުހުންނަށް ރިޕޯޓުކޮށްފައިވާއިރު ބްރިޖް އަދި ހައިވޭ ހިމެނޭ ސަރަހައްދުގައި 11 އެކްސިޑެންޓެއް ހިނގާފައިވާ ކަމަށް ރިޕޯޓުކޮށްފައިވެ އެވެ.
ފުލުހުން އާންމުކޮށްފައިވާ ތަފާސްހިސާބުތަކުން ދައްކާގޮތުގައި އެއް ދުވަހެއްގެ ތެރޭގައި އެންމެ ގިނަ އެކްސިޑެންޓް ހިނގާފައިވާ ކަމަށް ރިޕޯޓްކޮށްފައިވަނީ މި މަހުގެ ހަ ވަނަ ދުވަހު އެވެ. އެ ދުވަހު ޖުމްލަ 13 އެކްސިޑެންޓެއް ހިނގާފައިވާ ކަމަށް ރިޕޯޓުކޮށްފައިވާއިރު ދެވަނައަށް އެންމެ ގިނަ އެކްސިޑެންޓް ހިނގާފައިވާ ކަމަށް ރިޕޯޓުކޮށްފައިވަނީ މި މަހުގެ ހަތްވަނަ ދުވަހު އެވެ. އެ ދުވަހު 12 އެކްސިޑެންޓެއް ހިނގާފައިވާ ކަމަށް ރިޕޯޓުކޮށްފައިވެ އެވެ. އާންމު ގޮތެއްގައި އެކްސިޑެންޓް ހިނގަނީ ދުވާލުގެ ވަގުތުތަކުގައި ކަމަށްވެސް ފުލުހުން އާންމުކޮށްފައިވާ ތަފާސްހިސާބުތަކުން ދައްކަ އެވެ.
މި މުއްދަތުގައި އާންމު ގޮތެއްގައި ހިނގާފައިވަނީ ސައިކަލާއި ސައިކަލު ޖެހިގެން ހިނގި އެކްސިޑެންޓްތަކާއި، ސައިކަލާއި ކާރު ޖެހިގެން ހިނގި އެކްސިޑެންޓްތަކެވެ. މިއިން ކޮންމެ ބާވަތަކުން 19 އެކްސިޑެންޓް ރިޕޯޓްކޮށްފައިވެ އެވެ. މީގެ އިތުރުން ފުލުހުންނަށް ރިޕޯޓްކޮށްފައިވާ ގިނަ އެކްސިޑެންޓްތަކުގައި ދުއްވަން ތިބޭ މީހުންނަށް ބޮޑެތި އަނިޔާތަކެއް ލިބުމުގެ ބަދަލުގައި ލިބިފައިވަނީ އުޅަނދުތަކަށް ލިބުނު ގެއްލުންތަކެވެ. އޭގެ ތެރެއިން 66 އެކްސިޑެންޓުގައި ދުއްވަން ތިބޭ މީހުންނަށް ލިބިފައިވަނީ ކުދި އަނިޔާތަކާއި ކުދި ގެއްލުންތަކެވެ. އެހެންނަމަވެސް، މާލޭ ސަރަހައްދުގައި ހިނގި އެކްސިޑެންޓެއްގައި މީހަކަށް ސީރިއަސް އަނިޔާތަކެއް ލިބިފައިވާ ކަމަށް ފުލުހުން ވަނީ ބުނެފަ އެވެ.
މަގުމަތީގެ އެކްސިޑެންޓްތައް މަދުކުރުމަށް މަގުމަތި ބޭނުންކުރާ ހުރިހާ ފަރާތްތަކުން ވެސް ސަމާލުވެ، ޒިންމާދާރުވުމަށް ފުލުހުން ވަނީ އިލްތިމާސްކޮށްފަ އެވެ. އެގޮތުން އެކްސިޑެންޓްތައް މަދުކޮށް، އެންމެންނަށް ރައްކާތެރި މަގުތަކެއް ގާއިމުކުރުމަށްޓަކައި، އުޅަނދުފަހަރު ދުއްވާއިރު މަގުމައްޗަށް ސަމާލުކަން ދިނުމަށާއި، ޓްރެފިކް ގަވާއިދުތަކަށް ބޯލެނބުމަށާއި، މަޑުން އުޅަނދު ދުއްވުމުގެ މުހިންމު ކަމަަށް ފުލުހުން ވަނީ އަލިއަޅުވާލައިފަ އެވެ.
