ޣައްޒާގައި ބަންދުކޮށްފައި ތިބި ރަހީނުން ދޫކޮށްލުމަށް ކުރިއަށްދާ މަޝްވަރާތަކަކީ "އިންތިހާއަށް ނާޒުކު" މަޝްވަރާތަކެއް ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ކަށަވަރުކޮށްދެއްވައިފި އެވެ.
ހުކުރު ދުވަހު ބޭއްވި ސަރުކާރުގެ ބައްދަލުވުމެއްގައި ނަތަންޔާހޫ ފާހަގަކުރެއްވި ގޮތުގައި އިސްރާއީލުން ދަތުރުކުރަނީ ނާޒުކު މަޝްވަރާތަކެއް ކަމަށާއި، ހައްލު ކުރެވޭނެ ދާއިރާތަކާއި މުއާމަލާތް ނުކުރެވޭ ސަލާމަތީ ކަންތަކެއްވެސް އެބަހުރި ކަމަށެވެ. އޭނާ ވަނީ ދިފާއީ ގޮތުންނާއި ނުވަތަ ސީދާ އަމާޒުކޮށް އެއްވެސް އިންޒާރެއް ކުރިމަތިވާނަމަ އެކަން ހައްލުކުރުމަށް އިސްރާއީލުން ތައްޔާރަށް އޮތްކަން ތަކުރާރުކޮށް ވިދާޅުވެފަ އެވެ. އަދި ހަނގުރާމަ ހުއްޓާލުމާއި ރަހީނު ބަދަލުކުރުމާއި ޣައްޒާ އަލުން ބިނާކުރުމުގެ ޕްލޭނެއް ކަނޑައަޅާފައިވާ މެއި 27 ގެ އުސޫލުތަކަށް ވެސް ނަތަންޔާހޫ އިޝާރާތް ކުރައްވައި، މި އުސޫލުތަކަކީ އިސްރާއީލުގެ ސަލާމަތަށް މުހިންމު އުސޫލުތަކެއް ކަމަށް ފާހަގަކުރެއްވި އެވެ. މިސްރާއި ގަތަރާއި އެމެރިކާ ފަދަ މެދުވެރިން ބައިވެރިވާ މި މަޝްވަރާތައް ކުރިއަށްދަނީ އިސްރާއީލުން ޣައްޒާގައި ބޮޑު އަސްކަރީ ޖަރީމާއެއް ހިންގަމުންމުންދާއިރުއެވެ. އޭގެ ސަބަބުން 40 ހާހަށްވުރެ ގިނަ މީހުން ޝަހީދުވެފައިވެއެވެ.
