އަންނަ މަހު ބާއްވަން ހަމަޖެހިފައިވާ ބަންގްލަދޭޝްގެ އާންމު އިންތިހާބާ ގުޅިގެން އޮން އެރައިވަލް ވިސާ ދިނުން މެދުކަނޑާލާން ނިންމި ނިންމުން އެގައުމުގެ ސަރުކާރުން ބާތިލުކޮށްފި އެވެ.

އޮން އެރައިވަލް ވިސާ ދިނުން މެދުކަނޑާލަން ބަންގްލަދޭޝްގެ ސަރުކާރުން ނިންމާފައިވާތީ ރާއްޖޭގެ ފޮރިން މިނިސްޓްރީން ވަނީ އެ ހާލަތުގައި ވިސާ ހޯދުމަށް ހަދަންޖެހޭ ގޮތް އިއްޔެގެ ވަގުތެއްގައި އާންމުކޮށްފަ އެވެ. ނަމަވެސް ނިންމުން ބަދަލުކޮށްފައިވާތީ މިނިސްޓްރީން ވަނީ އެކަން ބާތިލުކޮށްފިކަން ބަންގްލަދޭޝް ސަރުކާރުން އަންގާފައިވާ ކަމަށް ބުނެފަ އެވެ.

އާންމު އިންތިހާބާ ގުޅިގެން އޮން އެރައިވަލް ވިސާ ދިނުން ކުރިން މެދުކަނޑާލަން އޮތީ މާދަމާ އިން ފެށިގެން އަންނަ މަހުގެ 15 ވަނަ ދުވަހުގެ ނިޔަލަށެވެ. ބަންގްލަދޭޝް ސަރުކާރުން އެކަން އެގޮތަށް އޭރު ހަމަޖެއްސީ އިންތިހާބަށް ސަލާމަތީ ފިޔަވަޅުތައް ވަރުގަދަ ކުރުމުގެ މަގްސަދުގަ އެވެ.

ބަންގްލަދޭޝް ސަރުކާރަކީ މިވަގުތު ވަގުތީ ސަރުކާރެކެވެ. އެގައުމުގެ އިންތިހާބީ ބޮޑުވަޒީރު ޝެއިހް ހަސީނާއާ ދެކޮޅަށް އެގައުމުގައި ކުރި މުޒާހަރާތައް ހޫނުވެ މާރަމާރީތަކަށް ބަދަލުވެ ބޮޑެތި ލޭއޮހޮރުވުންތައް ހިނގާފައިވާތީ އެކަމަނާ މަގާމުން އިސްތިއުފާ ދީފައިވަނީ 2024 ވަނަ އަހަރުގެ އޮކްޓޫބަރު މަސް ތެރޭގަ އެވެ. އިސްތިއުފާ ދެއްވުމަށްފަހު އެކަމަނާ ވަނީ ގައުމު ދޫކޮށް ފިއްލަވާފަ އެވެ.