މިއަހަރުގެ ދިރާސީ އަހަރު ފެށެންވާއިރަށް ރާއްޖޭގެ ސްކޫލުތަކުގެ މަރާމާތުތަކަށް 20 މިލިއަން ރުފިޔާ ހަރަދުވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން މިނިސްޓަރު ވިދާޅުވީ ފާއިތުވި ދެ އަހަރަކީ ސްކޫލްތަކުގެ މަރާމާތުތަކަށް އެންމެ ބޮޑު ހަރަދައެއް ކުރެވުނު އަހަރުތައް ކަމަށާއި އަދި މިއަހަރު އެކަނިވެސް 20 މިލިއަން ރުފިޔާ ހަރަދުވާނެ ކަމަށެވެ. މިނިސްޓަރު ވިދާޅުވީ ސްކޫލްތަކުގެ މަރާމާތުގެ މަސައްކަތަކީ މިނިސްޓްރީން ދިރާސީ އާ އަހަރަށް އެންމެ ބޮޑު އިސްކަމެއް ދީގެން ކުރާކަން ކަމަށެވެ.
މިނިސްޓަރު ވިދާޅުވީ މަރާމާތުތަކަށްޓަކައި ސްކޫލުތަކުން މިނިސްޓްރީގައި އެދުނު ހުރިހާ ކަމަކަށް ވާނީ ހުއްދަދީފައި ކަމަށާއި، އެހެން ކަމުން ބޮޑެތި މަސައްކަތްތަކެއް ވެސް ސްކޫލްތަކުގައި އެބަ ކުރިއަށްދާ ކަމަށެވެ.
Advertisement
"ލިބުނު ހުރިހާ ރިކުއެސްތުތަކަށް އަޅުގަނޑު ވާނީ މިހާރު ހުއްދަ ދީފައި. އަދި އިލެކްޓްރިކް އަޕްގްރޭޑިން މަސައްކަތްތަކަށް ބެލިއަސް ބައެއް ސްކޫލްތަކުގައި ހުރި ލޫވާތައް އެއްކޮށް ބަދަލުކުރުން ކަމުގައި ވިޔަސް ދޮރުތައް ބަދަލުކުރުން ކަމުގައި ވިޔަސްމެ. އެހެންވީމަ ސްކޫލްތަކުގައި އެބަ ހިނގާ ވަރަށް ބޮޑެތި މަރާމާތުގެ މަސައްކަތްތައް." މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ސްކޫލްތައް ހުޅުވުމުގެ ކުރިން މަރާމާތައްޓަކައި ކޮންމެހެން ނިންމަންޖެހޭ ކަންކަން ނިމިގެންދާނެ ކަމަށެވެ. މިއަހަރުގެ ދިރާސީ އާ އަހަރު ހުޅުވަން ހަމަޖެހިފައިވަނީ މި މަހުގެ 27 ވަނަ ދުވަހުގަ އެވެ.
