އަންނަ މަހު ބަންގްލަދޭޝްގައި ބާއްވަން ހަމަޖެހިފައިވާ އާންމު އިންތިހާބާ ގުޅިގެން އެގައުމަށް ދަތުރުކުރާ ފަރާތްތަކަށް އޮން-އެރައިވަލް ވިސާ ދޫކުރުން މެދުކަނޑާލައިފި އެވެ.
އެގައުމުގެ އާންމު އިންތިހާބު ބާއްވަން ހަމަޖެހިފައިވަނީ ފެބްރުއަރީ 12 ވަނަ ދުވަހު އެވެ. އެހެންކަމުން އޮން-އެރައިވަލް ވިސާ ދޫކުރުން މެދުކަނޑާލާފައިވަނީ މި މަހުގެ 15 ވަނަ ދުވަހުން ފެށިގެން އަންނަ މަހުގެ 15 ނިޔަލަށެވެ. މިއީ އިންތިހާބާ ދިމާކޮށް އެގައުމުގެ ސަލާމަތީ ކަންކަން ވަރުގަދަ ކުރުމުގެ މަގުސަދުގައި އަޅާފައިވާ ފިޔަވަޅެކެވެ.
މިކަމާ ގުޅިގެން ރާއްޖޭގެ ފޮރިން މިނިސްޓްރީން ވަނީ މި މުއްދަތުގައި ބަންގްލަދޭޝް އަށް ދަތުރުކުރަން ބޭނުންވާ ފަރާތްތައް ރާއްޖޭގައި ހުންނަ ބަންގްލަދޭޝްގެ ހައި ކޮމިޝަނުން ވިސާ ނެގުމަށް އިލްތިމާސްކޮށްފަ އެވެ. މީގެ އިތުރުން އޮން އެރައިވަލް ވިސާއާ ގުޅޭ އެންމެހާ ތަފްސީލުތައް ބަންގްލަދޭޝްގެ ސަރުކާރުން ކަނޑައަޅާފައިވާ ހާއްސަ ލިންކު މެދުވެރިކޮށް ބަލާލެވޭނެ ކަމަށް ވެސް މިނިސްޓްރީން ވަނީ ފާހަގަކޮށްފަ އެވެ.
ރާއްޖޭގައި ހުންނަ ބަންގްލަދޭޝްގެ ހައި ކޮމިޝަން ހުންނާނީ ހުޅުމާލެ ފޭސް-1 / ނިރޮޅުމަގު ގޯޅި 16 ޕްލޮޓް 10982 ގައެވެ. ވިސާއާ ބެހޭ މައުލާމާތެއް ސާފުކޮށްލަން ބޭނުންވާ ފަރާތްތައް ހައި ކޮމިޝަންގެ ނަންބަރު 3320859 އަށް ގުޅުއްވައި، ނުވަތަ [email protected] އަށް އީމެއިލް ކުރެއްވުމަށް މިނިސްޓްރީން އިލްތިމާސްކުރެ އެވެ.
ބަންގްލަދޭޝް އަކީ ދިވެހިން ކޮންމެވެސް ވަރަށް ގޮސް އުޅޭ ގައުމެކެވެ. ހާއްސަ ގޮތެއްގައި މެޑިސިން ދާއިރާއިން މަތީ ތައުލީމު ހާސިލް ކުރުމަށް ދިވެހިން ބަންގްލަދޭޝް އަށް ގޮސް އުޅެ އެވެ.
ބަންގްލަދޭޝް އަކީ ބަރުލަމާނީ ނިޒާމުގެ ވެރިކަމެއް އޮންނަ ގައުމެކެވެ. 2024 ވަނަ އަހަރު ފަސް ވަނަ ފަހަރަށް އެގައުމުގެ ބޮޑު ވަޒީރު ކަމުގެ މަގާމާ ހަވާލުވި ޝެއިހް ހަސީނާ، އޮގަސްޓް 05، 2024 ވަނަ ދުވަހު އިސްތިއުފާ ދިނީ ވަޒީފާ ކޯޓާގެ މައްސަލަތަކާ ގުޅިގެން އެގައުމުގެ ދަރިވަރުންތަކެއް ކުރި މުޒާހަރާތައް ހޫނުވެ، ބޮޑެތި މާރަމާރީތަކަށް ބަދަލުވެ އޭރުގެ ސަރުކާރަށް ކޮންޓްރޯލް ނުވާ ހިސާބަށް ދިޔުމުންނެވެ. ހަސީނާ ވަނީ އެދުވަހު އިސްތިއުފާދީ އެގައުމުން ވެސް ފިއްލަވާފަ އެވެ.
