ހައްޔަރުކޮށް ބަންދުގައި ބަހައްޓައިގެން މީހަކު ކޯޓަށް ހާޒިރުކޮށްދިނުމަށް ކްރިމިނަލް ކޯޓުން ފުލުހުންގެ މުއައްސަސާއަށް އަމުރުކޮށްފި އެވެ.
ފުލުހުންގެ ފަރާތުން ބުނެފައިވަނީ ކްރިމިނަލް ކޯޓަށް ހުށަހެޅިފައިވާ މައްސަލައަކާ ގުޅިގެން އެ ކޯޓަށް ހާޒިރުކުރަން ބޭނުންވެ، ނަމަވެސް ކޯޓަށް ހާޒިރުކުރެވިފައިނުވާތީ ހދ. ވައިކަރަދޫ / މިލާފަރު، އަލީ ރަޝީދު (28އ) ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން އޭނާ ހޯދުމުގެ މަސައްކަތް ކުރަމުންދާ ކަމަށެވެ.
އޭނާ ކޯޓަށް ހާޒިރުކޮށްދިނުމަށް ފުލުހުންގެ މައްޗަށް އަމުރުކޮށްފައިވަނީ 14 ޖެނުއަރީ 2026 ވަނަ ދުވަހުގެ ހެނދުނު 09:00 އަށެވެ. އަލީ ރަޝީދު ކޯޓަށް ހާޒިރުކުރަނީ އޭނާގެ މައްޗަށް ދައުވާކުރާ އަދަބެއް ތަންފީޒުކޮށްދިނުމަށް އެދި ހުށަހަޅާ މައްސަލައަކާ ގުޅިގެންނެވެ.
Advertisement
މިދިޔަ އަހަރު މެއި މަހުގެ 16 ވަނަ ދުވަހުގެރޭ މާފަންނު ލެމަންގްރާސް މަގުގައި އެ މަގުން ދިޔަ އަންހެނަކު ހިފަހައްޓައި، ހަނި ގޯޅިއެއްތެރޭ ހުރި ކޮޓަރިއަކަށް ވައްދާ އަންހެން މީހާ ރޭޕްކުރަން އުޅުމުގެ ތުހުމަތުގައި އަލީ ރަޝީދު އަދި ހދ. ނޭކުރަންދޫ / ވިނަރެސް، އާދަމް ވިޝާން (18އ) ވަނީ އޭރު ހައްޔަރުކޮށްފަ އެވެ. އަދި އެ މަހުގެ 26 ވަނަ ދުވަހު މި ރޭޕްކުރަން އުޅުނު ކަމުގެ ތުހުމަތުގައި މި ދެމީހުންގެ މައްޗަށް ވަނީ ދައުވާކޮށް ކޯޓަށް ފޮނުވައިފަ އެވެ.
ގަދަކަމުން އެ އަންހެންމީހާ ގެންދާތަން ފެންނަ ވީޑިއޯގެ ސްކްރީންޝޮޓެއް---
ޖުމްލަ ފަސް ފަހަރެއްގެ މަތިން ކޯޓުގެ މުއްދަތު އިތުރުކުރުމަށްފަހު ޕީޖީގެ އެދިލެއްވުމަކަށް އޭރު މި ދެމީހުން ވަނީ ދޫކޮށްލާފަ އެވެ. ސަބަބެއް ކަމަށް ޕީޖީ އޮފީހުން ބުނެފައިވަނީ އެމީހުން ދޫކޮށްލަން އެދުނު މައިގަނޑު ސަބަބަކީ ރޭޕްކުރަން އުޅުނު ކަމުގެ ބޮޑު ދައުވާއެއް ކުރެވޭނެ ވަރުގެ ހެކި ނެތުމުން ކަމަށެވެ. ނަމަވެސް އެ ދެމީހުން އޭރު ދޫކޮށްލީ ރޭޕްކުރަން އުޅުނު އަންހެން މީހާއާ ބައްދަލުކޮށް އަދި ހެއްކަށް ނުފޫޒު ފޯރުވަން މަސައްކަތް ނުކުރުމަށް ޝަރުތުކޮށްފަ އެވެ.
އޭނާއާ ބެހޭ އެއްވެސް މައުލޫމާތެއް ލިބިފައިވާނަމަ ފުލުހުންގެ އިދާރާގެ ކަސްޓޯޑިއަލް ނަންބަރު 9991442 އަށް ގުޅުއްވައި މައުލޫމާތު ހިއްސާކޮށްދިނުމަށް ފުލުހުން އިލްތިމާސްކުރެ އެވެ.
