އެމެރިކާއިން އިރާނަށް ބާރު ފޯރުވުމާ ދެކޮޅު ހައްދަވާ ކަމަށާއި، އެހެންނަމަވެސް އިރާންގެ ސަރުކާރާ ދެކޮޅަށް މުޒާހަރާ ކުރާ ޒުވާނުންނަށް ތާއިދުކުރާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މި މޭރުމުން ވިދާޅުވީ އީރާނުގެ ރައްޔިތުން އެ ގައުމުގެ ސަރުކާރާ ދެކޮޅަށް މިހާރު ކުރަމުންދާ މުޒާހަރާތަކުގައި، މުސްލިމުންގެ ހައިސިއްޔަތުން ތިބެންވީ އީރާނުގެ ރައްޔިތުންނާއެކު ކަމަށާއި އެ ގައުމުގެ އިސްލާމީ ދައުލަތާއެކީ އެކުގައިނޫން ކަމަށް ވިދާޅުވެ، ނަޝީދު އެކްސްގައި ކުރެއްވި ޕޯސްޓަށް ސްރީލަންކާގައި ހުންނަ އިރާންގެ އެމްބަސީން ރައްދުދިނުމާ ގުޅިގެންނެވެ.
އީރާންގައި މިހާރު ކުރަމުންދާ މުޒާހަރާތަކުގެ ފަހަތުގައި އެމެރިކާ އާއި އިސްރާއީލް އޮތްކަމަށް އީރާނުން އަންނަނީ ތުހުމަތު ކުރަމުންނެވެ. އެކަމަށް ނުސީދާ ބަހުން ރައްދުދެއްވަމުން ނަޝީދު ވިދާޅުވީ މިކަމަކީ ރާއްޖޭގެ މާޒީ ވެސް ހަނދާންކޮށްދޭ ކަމެއް ކަމަށެވެ. އެގޮތުން ކުރީގެ ރައީސް މައުމޫން އަބްދުލްގައްޔޫމާއި ދެކޮޅަށް އޭރުގެ އިދިކޮޅު އެކްޓިވިސްޓުން އިހުތިޖާޖު ކުރުމުން، އެއީ ކްރިސްޓިއަން މިޝަނަރީންގެ އެހީގައި ކުރާ ކަމެއްގެ ގޮތުގައި ރައީސް މައުމޫން ސިފަކުރައްވާ ކަަމަށް ނަޝީދު ވިދާޅުވި އެވެ.
އިރާންގެ ޒުވާނުން ތަހައްމަލްކުރަމުންދާ އަނިޔާތައް އެނގިވަޑައިގަންނަވާ ކަމަށާއި، ހައްގުތަކަށްޓަކައި މަސައްކަތްކޮށް ވަކާލާތުކުރާ އިރާނުގެ ޒުވާނުންނާއެކު ސާބިތުކަމާއެކު ހުންނަވާނެ ކަމަށް ނަޝީދު އިތުރަށް ވިދާޅުވި އެވެ.
އިރާންގެ ރައްޔިތުން އެ ގައުމުގެ ސަރުކާރާ ދެކޮޅަށް މިހާރު ކުރަމުންދާ މުޒާހަރާ އެ ގައުމުގެ އެކި ސިޓީތަކަށް ވަނީ ފުޅާވެފަ އެވެ. މި މުޒާހާރާގައި، މުޒާހަރާކުރާ ބައިވެރިންނާއި ސަލާމަތީ ބާރުތަކާ ދެމެދު ކުރިމަތިލުންތަކެއް ހިނގައި މަދު މީހަކު ނަމަވެސް ވަނީ މަރުވެފަ އެވެ. މި މުޒަހަރާ ހުއްޓުވުމަށް އިރާނުގެ ސަރުކާރުން އަންނަނީ ހަރުކަށި ފިޔަވަޅުތަކެއް އަޅަމުންނެވެ.
މަސްރަހު ގޯސްވެފައިވާ މި ދަނޑިވަޅުގައި އެމެރިކާއިންވެސް ވަނީ އިރާނަށް ވަރުގަދަ އިންޒާރުތަކެއް ދީފަ އެވެ. އެގޮތުން މުޒާހަރާކުރާ މީހުންނަށް ހަމަލާދޭނަމަ، އީރާނަށް ހަމަލާ ދޭނެކަމަށް އެމެރިކާއިން ވަނީ ބުނެފަ އެވެ.
