ސިފައިންގެ ވަޒީފާއިން ރިޓަޔަރވުމަށްފަހު ދައުލަތުގެ އެހެން މަގާމުތައް އަދާކުރާ ފަރާތްތަކަށް ރިޓަޔަރމަންޓް އެލަވަންސް ނުލިބޭ ގޮތަށް "ސިފައިންގެ ރިޓަޔަރމަންޓް ގަވާއިދު" އިސްލާހުކޮށްފި އެވެ.

ޑިފެންސް މިނިސްޓްރީން މިދިޔަ ޑިސެމްބަރު މަހުގެ 21 ވަނަ ދުވަހު މި އިސްލާހު ގެނެސްފައިވަނީ ސަރުކާރުގެ ހަރަދުތައް ކުޑަކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަންގަވާފައިވާ އެންގެވުމާ އެއްގޮތްވާ ގޮތުގެ މަތިންނެވެ.

އަލަށް އަމަލުކުރަން ފެށި ގަވާއިދުގައިވާ ގޮތުން ރިޓަޔަރމަންޓް އިނާޔަތް ލިބޭ ގޮތަށް ވަޒީފާއިން ވަކިވެފައިވާ މީހަކު އަލުން ދައުލަތުގެ މަގާމަކަށް އިންތިހާބުވެއްޖެ ނަމަ ނުވަތަ ދައުލަތުގެ އިދާރާއެއްގައި ނޫނީ ސަރުކާރު ހިއްސާވާ ކުންފުންޏެއްގެ ވަޒީފާއެއް އަދާކުރާނަމަ، އެ އާ ވަޒީފާގައި ދެމިހުންނަ މުއްދަތުގައި އެ މީހަކަށް ރިޓަޔަރމަންޓް އިނާޔަތެއް ނުލިބޭނެ އެވެ. މި އިނާޔަތް އަލުން ލިބެން ފަށާނީ އެ ވަޒީފާއިން ވަކިވާ މަސް ނިމުމަށްފަހު، ދެން ފެށޭ މަހުން ފެށިގެންނެވެ.

މި އިސްލާހުގައި ބަޔާންކޮށްފައިވާ ގޮތުގައި، ރިޓަޔަރވެފައިވާ މީހަކު އިންތިހާބީ މަގާމަކާ ނުވަތަ ދައުލަތުގެ އެހެން މަގާމަކާ ހަވާލުވުމަށްފަހު، އެކަން ޕެންޝަން އޮފީހަށް ނުވަތަ އެ އިނާޔަތް ދޭ އިދާރާއަކަށް އަންގަން ޖެހޭނެއެވެ. އެކަން ނާންގާ އޮތުމުގެ ސަބަބުން އިނާޔަތް ލިބެމުން ގޮސްފައިވާނަމަ، އެ ފައިސާ އަނބުރާ ދައުލަތަށް ދައްކަން ޖެހޭނެ ކަމަށްވެސް ގަވާއިދުގައިވެ އެވެ.

ހުޅުމާލެ ފޭސް އެކެއްގެ ރައްޔިތުންނާ ބައްދަލުކުރެއްވުމަށް ރެހެންދި ސްކޫލްގައި ބޭއްވި ބައްދަލުވުމުގައި ރައީސް މުއިއްޒު ވިދާޅުވީ، ރިޓަޔަރޑް ބޭފުޅުން މަގާމުތަކަށް އައްޔަންކުރުމުން އެލަވަންސާއި މުސާރަ ލިބިގެން ދައުލަތުގެ ހަރަދު ބޮޑުވާ މައްސަލައަށް ހައްލެއް ގެނައުމަށް ކަމާބެހޭ ހުރިހާ އިދާރާތަކަށް އަންގާފައިވާނެ ކަމަށެވެ. މިއީ ރައްޔިތުންގެ ހިޔާލާ އެއްގޮތަށް، އަދި އެމަނިކުފާނުވެސް ގަބޫލުކުރައްވާ ހަމައެއް ކަމަށް ރައީސް ފާހަގަކުރެއްވި އެވެ.

މި އާ އިސްލާހަކީ މިހާރު ރިޓަޔަރކޮށްފައި ތިބި އެންމެންގެ މައްޗަށްވެސް ހިނގާނެ ބަދަލެކެވެ. ސިފައިންގެ އިތުރުން، ފުލުހުންގެ ރިޓަޔަރމަންޓް އުސޫލަށްވެސް މިދިޔަ މަހުގެ 25 ވަނަ ދުވަހު ވަނީ މިފަދަ ބަދަލެއް ގެނެސްފަ އެވެ.