އާ ދިރާސީ އަހަރުގެ ކިޔެވުން ފެށުމުގެ ކުރިން ރާއްޖޭގެ ހުރިހާ ސްކޫލަކަށް ބޭނުންވާ ޓެކްސްޓް ފޮތްތައް ފޯރުކޮށްދީ ނިންމާލެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.
އާ އަހަރަށް ތައްޔާރުވުމުގެ މަސައްކަތްތަކާ ގުޅޭގޮތުން މައުލޫމާތު ދެއްވަމުން މިނިސްޓަރު ވިދާޅުވީ، ފޮތްތައް ފޮނުވުމުގައި ބައެއް ދަތިތަކާއި ގޮންޖެހުންތައް ހުރި ނަމަވެސް، ކަނޑައެޅިފައިވާ ތާރީހަށް މަސައްކަތް ނިންމާލެވޭނެ ކަމަށެވެ.
ސްކޫލްތަކަށް ބޭނުންވާ ފޮތްތައް ފޮނުވުމުގެ އަމަލީ މަސައްކަތް މިދިޔަ ޑިސެމްބަރު މަހުގެ ކުރީކޮޅު ފަށާފައިވާއިރު، މިހާތަނަށް އަތޮޅުތަކުގެ 60 އިންސައްތަ ރަށްތަކަށް ފޮތްތައް ފޮނުވާ ނިމިފައިވާ ކަމަށް މިނިސްޓަރު ފާހަގަކުރެއްވި އެވެ. އަދި މާލޭގެ ގިނަ ސްކޫލްތަކުގައި މިހާރު ދަރިވަރުންނަށް ފޮތްތައް ބަހަން ފަށާފައިވާކަން ވެސް މިނިސްޓަރު ހާމަކުރެއްވި އެވެ.
ކޮންމެ ރަށަކަށްވެސް ފޮތް ފޮނުވަނީ އެ ސްކޫލަކަށް އެ އަހަރަކު އަލަށް ވަންނަ ދަރިވަރުންނާއި ތިބި ދަރިވަރުންގެ އަދަދަށް ރިއާޔަތްކޮށްގެންނެވެ.
މި މަސައްކަތުގައި ކުރިމަތިވެފައިވާ ބައެއް ގޮންޖެހުންތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، ކުރިން އަރަބިއްޔާ ސްކޫލްގެ ގުދަނުގައި ކުރަމުންދިޔަ މަސައްކަތްތައް އަމީނިއްޔާ ސްކޫލަށް ބަދަލުކުރުމާ ގުޅިގެން ޖާގައިގެ ދަތިކަން ކުރިމަތިވެފައިވާ ކަމަށެވެ. މީގެ އިތުރުން މާލޭގެ އުތުރު ބަނދަރު ސަރަހައްދުގައި ކުރިއަށްދާ މަސައްކަތްތަކުގެ ސަބަބުން، އަތޮޅުތަކަށް ފޮނުވާ ތަކެތި ބޯޓުފަހަރަށް ބަރުކުރުމުގައި ވެސް އުނދަގޫތަކެއް ހުރިކަން މިނިސްޓަރު ފާހަގަކުރެއްވި އެވެ.
މިނިސްޓަރު ވިދާޅުވީ މިކަންކަމާއެކުވެސް 100 އިންސައްތަ ޔަގީންކަން ދެއްވާކަމަށާއި ސްކޫލް ހުޅުވުމުގެ ކުރިން ފޮތްތައް ހަވާލުކުރާނެކަމުގެ ޔަގީންކަން ވެސް ދެއްވާކަމަށެވެ.
ފޮތްތައް ފޯރުކޮށްދިނުމުގެ އިތުރުން، ސްކޫލްތަކުގެ މަރާމާތުގެ މަސައްކަތްތަކާއި މުދައްރިސުން ހަމަކުރުމުގެ މަސައްކަތްތައް ވެސް ވަރަށް ބާރަށް ކުރިއަށްދާކަމަށް މިނިސްޓްރީން ފާހަގަކުރި އެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ ދިރާސީ އާ އަހަރުގެ ކިޔެވުން ފެށޭއިރު، ސްކޫލްތަކަށް ބޭނުންވާ ހުރިހާ ވަސީލަތްތަކާއި އިންތިޒާމުތައް ފުރިހަމަވެފައި ހުރުމަށްކަމަށް މިނިސްޓްރީން ބުންޏެވެ.
