ކުދި އަދި ރިޖެކްޓް ކަންނެލި މިފްކޯއަށް ގަންނަން ފެށުމަކީ ރަނގަޅު ފެށުމެއް ކަމަށް ބޮޑު ކަންނެލި މަސްވެރިންގެ ޔޫނިއަނުން ބުނެފި އެވެ.
ބޮޑު ކަންނެލި މަސްވެރިންގެ ޔޫނިއަނުން އެކްސްގައި ހިއްސާކުރި ޕޯސްޓެއްގައި ބުނީ، ކުދި އަދި ރިޖެކްޓް ކަންނެލި މިފްކޯއަށް ގަންނަން ފެށުމަކީ ރަނގަޅު ފެށުމެއް ކަމުގައި ދެކޭ ކަަމަށެވެ. އަދި ކުރިއަށް އޮތްތަނުގައި، މަޝްވަރާ ކުރެވުނު އަގު ކުދި އަދި ރިޖެކްޓް ކަންނެއްޔަށްދީ ސަރުކާރުގެ ރިޔާސީ ވައުދާއި އެއްގޮތަށް މިފްކޯއަށް ބޮޑު ކަންނެލި ވީހާވެސް އަވަހަކަށް ގަންނަން ފެށުމަކީ އުއްމީދެއް ކަމަށްވެސް އެ ޔޫނިއަނުން ވަނީ ބުނެފަ އެވެ.
ބޮޑު ކަންނެލި މަސްވެރިންގެ ޔޫނިއަނުން މި މޭރުމުން ބުނެފައިމިވަނީ ކަނޑުއޮތްގިރި އަލުން އަނބުރާ އޮޕަރޭޝަނަށް ގެނެސް، މިފްކޯއަށް ރަސްމީކޮށް ބޮޑު ކަންނެލި ގަންނަން ފެށުމާ ގުޅިގެންނެވެ. އެގޮތުން 15 ކިލޯއަށްވުރެ މަތީގެ ބޮޑު ކަންނެއްޔެއް 25 ރުފިޔާގެ މަގުން މިފްކޯއަށް ގަތުމަށް ވަނީ ނިންމައިފަ އެވެ.
މިފްކޯއަށް ބޮޑު ކަންނެލި ގަތުމަށް ވާންޖެހޭ ތައްޔާރީތައް ނިންމައި ބޮޑު ކަންނެލި ގަންނަން ފަށާފައި މިވަނީ ބޮޑު ކަންނެލީގެ މަސްވެރިކަމުގައި އުޅޭ ފަރާތްތަކަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމަށް ސަރުކާރުން ކުރާ މަސައްކަތްތަކުގެ ތެރޭގައި ހިމަނައިގެންނެވެ.
ކަނޑުއޮތްގިރީގައި ބޮޑު ކަންނެލި ގަންނަން ފެށުމާ ގުޅިގެން ފިޝަރީޒް މިނިސްޓަރު އަހުމަދު ޝިޔާމާއި، މިފްކޯގެ ސީއީއޯ ފަރުހަތު ޝަހީރު ކަނޑުއޮތްގިރީގެ މަސައްކަތް ކުރިއަށްދާގޮތް ވަނީ ބައްލަވާލައްވައިފަ އެވެ.
