ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުގައި ހަދާފައިވާ ސީޕްލޭން ޗެކްއިން ކައުންޓަރުތައް ބޭނުންކުރަން ފަށައިފި އެވެ.
އެމްއޭސީއެލްއިން ބުނީ އާ ޓާމިނަލުގެ ސީޕްލޭން ޗެކްއިން އޭރިއާ އަކީ ޖާގަ ތަނަވަސް ތަނެއް ކަމަށެވެ. އެގޮތުން ސީ ޕްލޭން ކައުންޓަރުތައް ހަދާފައިވަނީ ޓާމިނަލްގެ ގޭޓް ހަތަރެެއްގެ އެތެރެއިން ގާތްގަނޑަކަށް 600 އަކަމީޓަރުގެ ސަރަހައްދެއްގަ އެވެ. ރާއްޖޭގެ ރީތިކަން ފެންނަ ގޮތަށް ޑިޒައިންކޮށްފައިވާ މިތަނުގައި ރާއްޖޭގައި ސީޕްލޭންގެ ހިދުމަތް ދޭ ހަތަރު އޮޕަރޭޓަރުންނަށް ޖުމުލަ 24 ކައުންޓަރު ހަދާފައިވެ އެވެ.
މިއީ، ޓާމިނަލް 2ގެ ސީޕްލޭން ޗެކްއިން ސަރަހައްދާއި ހިލާފަށް މުޅިތަން އެއާ ކޮންޑިޝަން ކޮށްފައިވާ ޖާގައިގެ ގޮތުން ތަނަވަސް އަދި ފަސިންޖަރުންނަށް އިށީނދެލައިގެން ތިބެވޭ ގޮތަށް ހަދާފައިވާ ސަރަހައްދެކެވެ. އޭގެ އިތުރުން އާ ޓާމިނަލުން ސީޕްލޭން ޗެކްއިން ސަރަހައްދަށް ވެހިކަލް ކައިރި ކުރުމަށް އިތުރު ސްލޮޓްތަކެއް ވެސް ވަނީ ކަނޑައަޅައިފަ އެވެ.
އެމްއޭސީއެލް އިން ބުނީ އާ ޓާމިނަލުގެ ސީޕްލޭން ޗެކްއިން ކައުންޓަރު ބޭރުގައި ފަސިންޖާ ބަސްތަކަށް ނުވަ ސްލޮޓް، ލަގޭޖް ވެހިކަލްތަކަށް 10 ސްލޮޓް އަދި ސްޓޭންޑްބައި ވެހިކަލްތަކަށް 11 ސްލޮޓް ކަނޑައަޅާފައިވާ ކަމަށެވެ.
އާ ޓާމިނަލުގެ ސީޕްލޭން ކައުންޓަރުތަކުގެ ހިދުމަތް ފަށާފައިވާއިރު އެ މަސައްކަތުގައި ސީޕްލޭނަށް ޗެކިންވާ ފަރާތްތައް، ސީޕްލޭން ޓާމިނަލަށް ގެންދިއުމަށްޓަކައި އޮޕަރޭޓަރުން ބޭނުން ކުރާނެ ބަސް ރޫޓުތައްވެސް ވަނީ ކަނޑައަޅާފަ އެވެ. ބަސް ރޫޓުތައް ކަނޑައެޅުމާއެކު އެއާޕޯޓުގެ އާ ޓާމިނަލުގެ އެރައިވަލް ގޭޓް ހަތަރެއްގެ ދެކުނު ޕާކިން ޒޯން ބޭނުން ކުރާނީ، ސީޕްލޭން އޮޕަރޭޓަރުންނަށާއި އެމްއޭސީއެލް ސްޓާފް ބަސްތައް ޕާކް ކުރުމަށް ކަމަށް އެމްއޭސީއެލް އިން ވަނީ ކަނޑައަޅާފަ އެވެ.
ރާއްޖެއަކީ، ދުނިޔޭގެ އެންމެ ބޮޑު ސީޕްލޭން އޮޕަރޭޝަން އޮންނަ ގައުމު ކަމަށްވާއިރު، އާ ޓާމިނަލުން ހިދުމަތް ފެށުމުން އެ ހިދުމަތް ބޭނުން ކުރާ ފަރާތްތަކަށް ހިދުމަތް ހޯދުމުގައި އެތައް ގުނައެއް ފަސޭހަވާނެ އެވެ.
