ޑާކް ވެބްގައި ގިނަ އަދަދެއްގެ އިންސްޓަގްރާމް ޔޫޒަރުންގެ މައުލޫމާތުތައް ލީކުކޮށްލައިފި ކަމަށް ސެކުއިރިޓީ މާހިރުން ތުހުމަތުކޮށްފި އެވެ.
ރިޕޯޓުތައް ބުނާ ގޮތުން 17.5 މިލިއަން އިންސްޓަގްރާން ޔޫޒަރުންގެ މައުލޫމާތުތައް ލީކުކޮށް ޑާކް ވެބް ވެބްސައިޓުތަކުގައި ވަނީ ހިއްސާކޮށްފަ އެވެ. މި ހަބަރު ފެންމަތިވާން ފެށީ ސައިބާ ސެކުރިޓީގެ ތަޖުރިބާކާރުންނަށް އެ ޑޭޓާތައް ފާހަގަވެ މީސްމީޑިއާގައި އެކަމާ ބެހޭގޮތުން ފެންމަތިވާން ފެށުމުންނެވެ.
ލީކުވެފައިވާ މައުލޫމާތުތަކުގެ ތެރޭގައި ޔޫޒާނޭމް، އީމެއިލް އެޑްރެސް، ފޯން ނަންބަރު އަދި ޔޫޒާ އައިޑީގެ ތަފްސީލް ވެސް އެކުލެވޭ ކަމަށް މާހިރުން ބުނެ އެވެ. ނަމަވެސް ޕާސްވޯޑުތަކެއް ލީކުވެފައިވާ ކަމެއް އަދި ފާހަގަކުރެވިފައިނުވާ ކަމަށާއި، މިހާރު އެމީހުންނަށް ލިބިފައިވާ މައުލޫމާތުތައް ބޭނުންކޮށްގެން ފޭކް އީމެއިލްތަކާއި، މެސެޖު ނުވަތަ ކޯލުތަކެއް ކޮށްފާނެ ކަމުގެ ބިރު އެބައޮތް ކަމަށް ވެސް މާހިރުން ބުނެ އެވެ.
ސެކިއުރިޓީ މާހިރުން ގަބޫލުކުރާ ގޮތުގައި މި ޑޭޓާތައް އެއްކޮށްފައިވަނީ ސީދާ އިންސްޓަގްރާމްގެ ސާވަރުތަކަށް ވަދެގެން ނޫން ނަމަވެސް ކުރީގެ ސިސްޓަމް އެކްސެސް ސްކްރެޕްކޮށްގެން ނުވަތަ ނަހަމަގޮތުގައި ބޭނުންކޮށްގެން ކަމަށް ވެދާނެ އެވެ. ނަމަވެސް އެކަން ރަސްމީކޮށް އަދި ކަށަވަރުވެފައެއް ނުވެ އެވެ.
މިހާތަނަށް އިންސްޓަގްރާމްގެ ވެރިފަރާތް ކަމަށްވާ މެޓާ އިން މިކަމާ ގުޅޭގޮތުން އެއްވެސް ބަޔާނެއް ނެރެފައެއް ނުވެ އެވެ. މިކަމުގެ ސަބަބުން މިކަމަކީ ކިހާ ސީރިއަސް މައްސަލައެއްތޯ ނުވަތަ ނޫންތޯ އަދި ސާފެއް ނޫނެވެ. މީގެ ކުރިން ވެސް މިފަދަ މައްސަލަތައް ހިނގާފައިވާއިރު ޔޫޒަރުންނަށް ބޮޑެތި ގެއްލުންތަކެއް ލިބިފައި އެބަހުއްޓެވެ.
މި ހާދިސާއަށް ފަހު ބައެއް އިންސްޓަގްރާން ޔޫޒަރުންގެ ފަރާތުން އެކައުންޓް ރިސެޓް ކުރަން އީމެއިލް ލިބެމުންދާ ކަމަށާއި އާދަޔާ ހިލާފު ލޮގިން އެކްޓިވިޓީތައް ފެންނަ ކަމަށް ރިޕޯޓުތައް ދަނީ ކުރަމުންނެވެ.
ޕާސްވޯޑް ބަދަލުކޮށް، ޓޫ ފެކްޓަރ އޮތެންޓިކޭޝަން އޮންކޮށް، މެލްވެއާ ލިންކްތަކަށް ކްލިކް ނުކުރުމާއި ޒާތީ މައުލޫމާތު އެންޓާ ކުރުމަށް އެދޭ އީމެއިލް ނުވަތަ މެސެޖުތަކަށް ސަމާލުކަން ދިނުމަށް މާހިރުން ދަނީ ލަފާދެމުންނެވެ.
