ކުރިއަށް އޮތް ރަމަޟާން މަހު ބާޒާރުގައި ތަކެތީގެ އަގު އެއްވަރެއްގައި ހިފެހެއްޓުމަށާއި، ރާއްޖޭގެ ހުރިހާ ރަށްތަކެއްގެ ރައްޔިތުންނަށް ބޭނުންވާ އަސާސީ ބާވަތްތައް ހެޔޮ އަގުގައި ލިބޭނެ އިންތިޒާމު ކަށަވަރު ކުރުމަށް ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާ ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު ސައީދު ވިދާޅުވީ، ރަމަޟާން މަސް ފެށުމުގެ ކުރިން ރާއްޖޭގެ ހުރިހާ ސިޓީތަކާއި، 3,000 އަށް ވުރެ ބޮޑު އާބާދީއެއް އޮންނަ ރަށްތަކުގެ އިތުރުން މީހުން ދިރިއުޅޭ ހުރިހާ ރަށެއްގައި އެސްޓީއޯ މެދުވެރިކޮށް އަސާސީ ތަކެތި ފަސޭހައިން ލިބޭނެ އިންތިޒާމު ހަމަޖެހިގެންދާނެ ކަމަށެވެ. މީގެ އިތުރުން، ބާޒާރުގައި ތަކެތީގެ އަގަށް އަންނަ ބަދަލުތައް ގާތުން ދެނެގަތުމަށްޓަކައި ކޮންމެ ދުވަހަކު 162 ބާވަތެއްގެ މުދަލުގެ އަގު ސަރުކާރުން މޮނީޓަރު ކުރަމުން ގެންދާނެ ކަމަށްވެސް މިނިސްޓަރު ފާހަގަކުރެއްވި އެވެ.
އެގޮތުން، ސަރުކާރުން މިހާރު ވަނީ އަސާސީ ކާބޯތަކެތީގެ ގޮތުގައި ބަލާ މުދަލުގެ ލިސްޓަށް ބަދަލުތަކެއް ގެނެސްފަ އެވެ. އެގޮތުން ކުރިން ހިމެނޭ ހަނޑޫ، ހަކުރު އަދި ފުށުގެ އިތުރުން، މިހާރު ވަނީ ތަރުކާރީ އާއި މޭވާގެ ބައެއް ބާވަތްތައް ހިމެނޭހެން ޖުމްލަ 23 ބާވަތެއް އެ ލިސްޓަށް އިތުރުކޮށްފަ އެވެ.
މިނިސްޓަރު އިތުރަށް ވިދާޅުވީ، ރާއްޖޭގައި އޮތް މިނިވަން ވިޔަފާރީގެ އުސޫލުތަކަށް ސަރުކާރުން އިހުތިރާމު ކުރާނެ ކަމަށެވެ. ނަމަވެސް، ރައްޔިތުންނަށް އަތްނުފޯރާ މިންވަރަށް ތަކެތީގެ އަގު އުފުލިގެންދާއިރު ސަރުކާރުން ބަލަން ނުތިބޭނެ ކަމަށާއި، އަގުތައް ކޮންޓްރޯލް ކުރުމަކީ ސަރުކާރުގެ ޒިންމާއެއް ކަމަށެވެ.
ކުދި ވިޔަފާރިތަކަށް ފުރުސަތު ދިނުމުގެ ގޮތުން، އަސާސީ ބާވަތްތައް ފޯރުކޮށްދިނުމުގައި ސަރުކާރުން އެންމެ ބޮޑު އިސްކަމެއް ދެއްވާނީ ހޯލްސޭލްކޮށް މުދާ ދޫކުރުމަށް ކަމަށްވެސް މިނިސްޓަރު ވިދާޅުވި އެވެ. މީގެ ބޭނުމަކީ ރަށްރަށުގެ ކުދި ފިހާރަތަކަށް މުދާ ލިބުން ފަސޭހަކޮށްދީ، ރައްޔިތުންނަށް އެންމެ އެކަށީގެންވާ އަގުތަކެއްގައި ތަކެތި ފޯރުކޮށްދިނުންކަމަށް ވެސް މިނިސްޓަރު ފާހަގަކުރެއްވި އެވެ.
