އީރާނުގައި މިހާރު ކުރިޔަށްދާ މުޒާހަރާތަކުގައި މިއަދުގެ ހެނދުނާއި ހަމަޔަށް އާންމު ރައްޔިތުންގެ 200 މީހުން މަރާލައިފި ކަމަށް ބުނެ އިސްރާއީލުގެ މީޑިއާތަކުން ދޮގު ހަބަރު ފަތުރަން ފަށައިފިއެވެ.
އިސްރާއީލުގެ މީޑިއާތަކުން ހަބަރު ފަތުރާ ގޮތުގައި އީރާނުގައި އޮތް އިސްލާމީ ވެރިކަމާއި ދެކޮޅަށް ކުރަމުންދާ މުޒާހަރާތައް ހުއްޓުވުމަށް ތެހެރާނު ސަރުކާރުން ގެންދަނީ ގަސްދުގައި މީހުން މަރަމުންނެވެ. އަނެއްކޮޅުން ޔަހޫދީން ފަންޑުކުރާ ޓައިމް މެގަޒިން އިން ވެސް ހަބަރު ފަތުރަނީ ވަރަށް ޒިންމާދާރުކަން ކުޑަކޮށެވެ. ނަން ނުޖެހުމަށް ޝަރުތުކޮށް ތެހެރާނުގެ ޑޮކްޓަރަކު ބުންޏޭ ކިޔައި އެ މީޑިއާއިން ހަބަރު ފަތުރާ ގޮތުގައި، ތެހެރާނުގެ ހަ ހޮސްޕިޓަލެއްގައި މަދުވެގެން 217 މީހުން މަރުވެފައިވާ ކަމަށް ރެކޯޑްކޮށްފައިވެއެވެ. އޭގެތެރޭގައި ގިނައީ ފުލުހުން ގަސްދުގައި ބޮލަށް ބަޑި ޖަހައި މަރައިލި މީހުންނެވެ.
މީގެ އިތުރުން އސްރާއީލުގެ މީޑިއާތަކުން ބުނަނީ 10 ހާހެއްހާ މީހުން ހައްޔަރުކޮށް 5000-8000 މީހުންނަށް އީރާނު ފުލުހުން ވަނީ އަނިޔާ ކޮށްފައި ކަމަށެވެ.
ނަމަވެސް އީރާނުގެ އިތުބާރުހުރި މަސްދަރުތަކުން ބުނަނީ މުޒާހަރާތައް ހޫނުކުރުމަށް ސަރުކާރާއި އިދިކޮޅު އެޖެންޓުންތަކުގެ ނިވަލުގައި މުޒާހަރާގެ ބައިވެރިން ގެންދަނީ މީހުންނަށް ހަމަލާދީ މަރަމުންނެވެ. އަދި ސަލާމަތީ ބާރުތަކާއި ކުރިމަތިލަމުން ކަމަށާއި، ސަލާމަތީ ބާރަުތަކުން ހަމަލާ ދެނީ ދިފާއުގައި ކަމަށެވެ. އީރާނުގެ މީޑިއާތަކުން ބުނީ ޑިސެންބަރު ފަހުކޮޅުން ފެށިގެން 45 މީހުން މަރުވެފައިވާ ކަމަށާއި، 2000 އެއްހާ މީހުން ހައްޔަރުކޮށްފައިވާއިރު، މުޒާހަރާތަކުގެ ފުރިހަމަ ޒިންމާ ސަރުކާރުން ނަގާ ކަމަށެވެ.
ސުޕްރީމް ލީޑަރު އާޔަތުالله އަލީ ޚާމަނާއީ ވަނީ މުޒާހަރާ ތަކާއި ބޭރުގެ ދުޝްމަނުންނާއި ގުޅުން އެބައޮތް ކަމަށާއި، އެމެރިކާގެ ރައީސް ޑޮނަލްޑް ޓްރަމްޕްގެ އަތުގައި އީރާނުގެ ރައްޔިތުންގެ ލޭ “ހޭކިފައި”ވާ ކަމަށެވެ.
އީރާނުގައި މުޒާހަރާ ކުރަމުން ގެންދަމީ އެތައް ޒަމާނެއް ވަންދެން އެމެރިކާ އާއި ހުޅަނގުން އެ ޤައުމާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން މުދަލުގެ އަގު ބޮޑުވުން ފަދަ ކަންތަކާއި ގުޅިގެންނެވެ. މުޒާހަރާތައް ފެށީ އެމެރިކާ އަޑީގައި އޮވެގެން ކަމަށް ތެހެރާނުން ތުހުމަތު ކުރެއެވެ.
