ނަމާދާމެދު ރައްކާތެރިވާ ބައެއްގެ ގޮތުގައި ދަރިން ތަރުބިއްޔަތު ކުރަންޖެހޭ ކަމަށް މިއަދުގެ ހުކުރު ހުތުބާގައި ބުނެފި އެވެ.

މިއަދުގެ ހުކުރު ހުތުބާގައި، ނެތުމުގެ ތެރެއިން އިންސާނާ އުފައްދަވައި ދުނިޔޭގެ ހަޔާތަށް ފޮނުއްވުމުގެ މަގްސަދަކީ މާތްﷲ އަށް އަޅުކަން ކުރުން ކަމަށް ވަނީ ބުނެފަ އެވެ. ނަމާދުކުރުމަކީ ދީނުގެ ތަނބުކަމަށާއި ގިޔާމަތް ދުވަހު އެންމެ ފުރުތަމަ ހިސާބުބެއްލެވޭ އަޅުކަމަކީ ނަމާދު ކަމަށް ހުތުބާގައި ވަނީ ބުނެފަ އެވެ.

ހުކުރު ހުތުބާގައި، ނަމާދާމެދު ދަރިންގެ ހިތްތަކުގައި ލޯބިޖައްސުވައި ނަމާދަށް ރައްކާތެރިވާ ބައެއްގެ ގޮތުގައި ދަރިން ތަރުބިއްޔަތު ކުރަންޖެހޭ ކަމަށާއި، އެކަމުގައި އިހުމާލުވެއްޖެނަމަ ދިރިއުޅުމުގެ އުފާވެރިކަން ގެއްލި، އާހިރަތުގައި ހިތާމައާ ކުރިމަތިލާންޖެހޭނެ ކަމުގައި ވަނީ ބުނެފަ އެވެ.

ދަރިންނަކީ މާތްﷲ ދެއްވާފައިވާ ނިއުމަތެއްކަން ފާހަގަކުރަމުން ހުތުބާގައި ބުނީ، ފިރިމީހާއަކީ އަނބިމީހާގެ ބެލެހެއްޓުންތެރިޔާ ކަމަށާއި، އަދި އަނބިމީހާ އަކީ އޭނާގެ ފިރިމީހާގެ ގޭގެ ކަންތައްތަކާއި ދަރިންގެ ބެލެހެއްޓުންތެރިޔާ ކަމަށެވެ. ދަރިން ނަމާދަށް އަހުލުވެރިކުރުމަށް މަސައްކަތް ނުކޮށް އިހުމާލުވެއްޖެނަމަ ދެމަފިރިންވެސް އެކަމުގައި ފާފަވެރިވާނެ ކަމަށް ހުތުބާގައި ވަނީ ބުނެފަ އެވެ.

އެހެން ކަމުން ދަރިންނަކީ ނަމާދަށް ލޯބިކުރާ ބަޔަކަށް ހެދުމަށްޓަކައި އެ ދަރިންގެ މައިންގެ ގޮތުގައި ދީންވެރި ތަގުވާވެރި މައިން އިހުތިޔާރުކުރުމުގެ މުހިއްމުކަމަށް ހުތުބާގައި ވަނީ އަލިއަޅުވާލައިފަ އެވެ.

ދަރިން މި މަތިވެރި ވާޖިބަށާއި ފިރިހެން ދަރިން މިސްކިތުގައި ނަމާދު ގާއިމުކުރުމަށް ލޯބިޖެއްސުމަށްޓަކައި ނަމާދުކުރާ މީހުންނަށް ހުރި ދަރުމަޔާއި ސަވާބުގެ ވާހަކަތައް ކިޔައިދީ، ދަރިންގެ ހިތްތަކުގައި ނަމާދާމެދު ލޯބި ޖެއްސުމަށް މަސައްކަތް ކުރުމަށް ހުތުބާގައި ވަނީ ނަސޭހަތްތެރިވެފަ އެވެ.