މާލެއަށް ދިމާވެފައިވާ މައްސަލަތައް ހައްލުކުރުމުގައި އެމަނިކުފާނަށް އިތުބާރުކުރައްވާ ޕީއެންސީގެ ޓިކެޓުގައި މާލެ ސިޓީ ކައުންސިލްގެ މޭޔަރުކަމަށް ވާދަކުރައްވަން ނިންމާފައިވާ މޫސާ އަލީ ޖަލީލް އިންތިހާބުކޮށްދެއްވުމަށް ރައީސް އެދިވަޑައިގެންފި އެވެ.
ޕީއެންސީގެ އޮފީސް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މާލޭގެ ތަރައްގީއަށް ކަންކަން ކުރުމުގައި ސަރުކާރަށް ދުވަހުން ދުވަހަށް ކައުންސިލްގެ އެއްބާރުލުން ބޭނުންވާ ކަމަށާއި، ހިތްފަސޭހަ ތަނަކަށް މާލެ ހެދުމަށްޓަކައި ކުރިއަށް އޮތްތާގައި ގިނަ މަސައްކަތްތަކެއް ރާވާފައި އެބަހުރި ކަމަށެވެ. އެހެންކަމުން އެކަންކަން ކުރިއަށް ގެންދިޔުމަށް ޕީއެންސީން ކުރިމަތިލާފައިވާ ކެންޑިޑޭޓުންން އިންތިހާބުކޯށްދިނުން އެދޭ ކަމަށް ރައީސް ވަނީ ވިދާޅުވެފަ އެވެ.
ރައީސް ވިދާޅުވީ އެމަނިކުފާނަށް އިތުބާރުކުރައްވާ މޭޔަރުކަން އެމަނިކުފާނާ ހަވާލުކުރެއްވި ކަމަށާއި ރައީސް ކަމަށް އިންތިހާބުކޮށްދިނުމަށް ވެސް ވަރަށް ގިނަ ރައްޔިތުން ވޯޓު ދެއްވި ކަމަށާއި، މިހާތަނަށް މަސައްކަތްކުރަމުން އަންނަނީ އެ ޒިންމާއާ އެކުގައި ކަމަށެވެ. ރައީސް ވިދާޅުވީ އެކި ގޮތްގޮތުން ރައްޔިތުންނަށްޓަކައި މަސައްކަތްކޮށްދެވިފައި ހުރުމުގެ ސަބަބުން ބޯހިޔާވަހިކަން ކަމުގައި ވިޔަސް އަދި އެހެން މައްސަލައެއް ކަމުގައިވީ ނަމަވެސް އެކަންކަމުގައި ހުރީ ވަރަށް ބޮޑަށް ޝާމިލުވެވިފައި ކަމަށެވެ. އެހެން ކަމުން ދިމާވެފައިވާ ކަންކަން ހައްލުކުރުމަށް އެމަނިކުފާނަށް އެއްބާރުލުން ދޭނެ ކައުންސިލް ޓީމެއް ބޭނުންވާ ކަމަށް ރައީސް ވިދާޅުވި އެވެ.
Advertisement
ރައީސް ވިދާޅުވީ މޫސާ އަލީ ޖަލީލަކީ މާލޭގެ ތަރައްގީއަށް ކުރަން ހަމަޖެހިފައިވާ ކަންކަން ކުރުމަށް އެމަނިކުފާނުގެ ފުރިހަމަ އިތުބާރު ލިބިފައިވާ ފަރާތެއް ކަމަށެވެ. އަދި އެމަނިިކުފާނަކީ ސިޔާސީ ގޮތުން އެކި ކަހަލަ އުނދަގޫ ކުރައްވާނެ ބޭފުޅެއް ނޫން ކަމަށް ވެސް ރައީސް ވިދާޅުވި އެވެ.
"އަޅުގަނޑުމެންގެ ފަރާތުން މޭޔަރު ކަމަށް ކުރިމަތިލާފަ ހުރި ކެންޑިޑޭޓަކީ އަޅުގަނޑުމެން އެއްވެސް މީހަކަށް އެއްވެސް ކަހަލަ އިތުރު ތައާރަފެއް ދޭންޖެހޭނެ ބޭފޫޅެއް ނޫން. ވަރަށް އިހުލާސްތެރި ތެދުވެރި، ވަރަށް ރަނގަޅު ހީވާގި، ވަރަށް ގާބިލް އަޅުގަނޑުމެން އެންމެން ވެސް އެބޭފުޅަކަށްޓަކައި ފަހުރުވެރިވާ ބޭފުޅެއް." ރައީސް ވިދާޅުވި އެވެ.
ރާއްޖޭގެ އެހެން ސިޓީތަކަށް ވެސް މޭޔަރުންގެ ގޮތުގައި ޕީއެންސީގެ ޓިކެޓުގައި ވާދަކުރައްވާ ބޭފުޅުން އިންތިހާބުކޮށްދެއްވުމަށް ރައީސް ވަނީ އެދިވަޑައިގެންފަ އެވެ.
