ބައެއް ރަށްރަށުގެ ކައުންސިލްތަކުން ސަރުކާރުން ހިންގަން ބޭނުންވާ މަޝްރޫއުތަކަށް ބިން ހަވާލުނުކުރުމުގެ ސަބަބުން މަޝްރޫއުތަށް ނުފެށި އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ ޕީއެންސީގެ އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރަށްރަށުގައި ކުރިއަށްދާ މަޝްރޫޢުތައް ހިނގާ ގޮތް އެމަނިކުފާނު ބައްލަވާ ކަމަށާއި، އެމަނިކުފާނުގެ އަތްޕުޅަށް މިއަދު ލިބުނު ލިސްޓެއްގައި ބައެއް ރަށްރަށުގައި ފަށަން ހަމަޖެހިފައިވާ ތަރައްގީގެ މަޝްރޫއުތައް ނުފެށި އޮތީ ކީއްވެގެންތޯ ބަލާލިއިރު ގިނައިން ހުރީ ކައުންސިލުން ބިން ހަވާލުނުކޮށްގެން ނުފެށި ހުރި މަޝްރޫއުތައް ކަމަށެވެ.
"އަޅުގަނޑު ބަލަން އެކިއެކި މަޝްރޫއުތައް ހިނގާގޮތް. އެކިއެކި މަޝްރޫއުތައް އެކި ދާއިރާތަކުން ކުރިއަށް ގެންދިޔުމަށް ދިމާވެފައިވާ ދަތިތައް ބަލާލިއިރު މިއަދުވެސް އަޅުގަނޑު އަތަށް ލިބުނު ލިސްޓުގައި އެތައް ރަށެއްގައި މީގެ މަހެއް، ދެމަސް ތިންމަސް ކުރިން ސޮއިކުރެވިފައިވާ މަޝްރޫއުތައް ފަށައިނުގަނެވިގެން އުޅެނީ ކީއްވެތޯ ބަލާލިއިރު ބިން ހަވާލުނުކޮށްގެން. ކައުންސިލުންނޭ ބިން ހަވާލުކުރަނީ." ރައީސް ވިދާޅުވި އެވެ.
ރައީސް ވިދާޅުވީ މިހެން ކަންތައް ކުރުމުގެ ސަބަބުން ގެއްލުންވަނީ ރައްޔިތުންނަށް ކަމަށާއި، އެހެން ވާން ބޭނުން ނުވާ ކަމަށެވެ. އެހެން ކަމުން އެކަންކަން ބަދަލުކުރުމަށް އެ އިހުތިޔާރު ރައްޔިތުންނަށް ކުޑަދުވަސްކޮޅެއްގެ ތެރޭގައި ލިބިގެންދާނެ ކަމަށް ރައީސް ވިދާޅުވި އެވެ.
ރައީސް އިތުރަށް ވިދާޅުވީ ތަރައްގީގެ ކަންކަން ވަރަށް ބާރު ދުވެލީގައި ކުރިއަށް ގެންދިޔުމަށް އެމަނިކުފާނު ބޭނުންފުޅުވެލައްވާ ކަމަށާއި، އެކަން ކުރެވޭނީ ރައްޔިތުންނަށްޓަކައި ކޮންމެ ދުވަހަކު ހިދުމަތްކުރަން ޒިންމާ ހަވާލުކުރެވިފައިވާ މީހުންގެ އެއްބާރުލުން ލިބިގެން ކަމަށެވެ.
ސަރުކާރުން ކުރިއަށް ގެންދަން ރާވާފައިވާ މަޝްރޫއުތަކަށް ބުރެކި ޖައްސައި އެކަންކަމަށް ހުރަސް އަޅާނެ ކައުންސިލަރުން ހޮވުމަކީ ވިސްނުންތެރި ގޮތެއް ނޫން ކަމަށް ވެސް ރައީސް ވިދާޅުވި އެވެ. ރައްޔިތުންނަށްޓަކައި ވައުދުވެފައިވާ ކަންކަން ފުއްދުމަށް އެމަނިކުފާނާ ހަވާލުކޮށްފައިވާ ޒިންމާތައް އަދާކުރުމަށް ކުރިއަށް އޮތް ކައުންސިލް އިންތިހާބުގައި ސަރުކާރަށް އެއްބާރުލުން ދޭނެ ކެންޑިޑޭޓުން ހޮވައިދިނުމަށް ރައީސް ވަނީ އެދިވަޑައިގެންފަ އެވެ.
ލޯކަލް ކައުންސިލް އިންތިހާބު ބޭއްވުމަށް އިލެކްޝަންސް ކޮމިޝަނުން ކަނޑައަޅާފައިވާ ތާރީހަކީ އަންނަ އޭޕްރީލް މަހުގެ ހަތަރު ވަނަ ދުވަހެވެ.
