ރާއްޖޭގެ ސިއްޙީ ދާއިރާއަށް ގިނަ އަހަރުތަކެއްވަންދެން ހިދުމަތް ކުރެއްވުމަށްފަހު ހެލްތު ޕްރޮޓެކްޝަން އޭޖެންސީގެ ޑިރެކްޓާ ޖެނެރަލް މައިމޫނާ އަބޫބަކުރު ރިޓަޔާކުރައްވަން ނިންމަވައިފި އެވެ.
މައިމޫނާއަކީ ރާއްޖޭގެ ސިއްހީ ދާއިރާއަށް މުހިއްމު ހިދުމަތްތަކެއް ކޮށްދެއްވާފައިވާ ބޭފުޅެކެވެ. އެގޮތުން އެޗްޕީއޭގެ ޑިރެކްޓާ ޖެނެރަލްގެ މަގާމަށް 2016 ވަނަ އަހަރުގެ އައްޔަނުވުމަށްފަހު ވޭތުވެދިޔަ ނުވަ އަހަރުގެ ތެރޭގައި މައިމޫނާ ވަނީ އާންމު ސިއްހަތުގެ ދާއިރާއިން މުހިއްމު މަސައްކަތްތަކެއް ކުރައްވާފަ އެވެ.
އެގޮތުން މައިމޫނާގެ މަސައްކަތް އެންމެ ބޮޑަށް ފާހަގަވެގެންދިޔައީ ކޮވިޑް-19ގެ ދުވަސްވަރުގަ އެވެ. ކޮވިޑުން ސަލާމްތްވުމަށް ސަރުކާރުން ނިންމެވި ނިންމެވުންތަކާއި އާންމުންގެ މެދުގައި އޮތް ކަންބޮޑުވުންތަކަށް ހައްލެއް ގެނައުމަށް ސައްހަ މައުލޫމާތު ގެނެސްދެއްވުމުގައި ފާހަގަކޮށްލެވޭ ދައުރެއް މައިމޫނާ ވަނީ އަދާކުރައްވާފަ އެވެ. މުޅި ދުނިޔެ ހުއްޓުމަކަށް ގެނައި ބަލިން ރާއްޖެ ސަލާމަތްވުމަށް ކުރި މަސައްކަތަށް ޑަބްލިއުއެޗްއޯއިން ވެސް ތައުރީފުކޮށްފައިވެ އެވެ.
ރާއްޖޭގެ ސިއްހީ ދާއިރާއިން 1990 ވަނަ އަހަރު ހިދުމަތަށް ނުކުންނެވުމަށްފަހު ވޭތުވެދިޔަ 35 އަހަރުގެ ތެރޭގައި މައިމޫނާވަނީ ސިއްހީ ދާއިރާގެ އެކި މަގާމުތައް ފުރުއްވާފަ އެވެ.
އެނގިފައިވާ ގޮތުގައި މައިމޫނާ ވަކިވެވަޑައިގަންނަވާނީ މި މަހުގެ 29 ހިސާބުގައި އާލީ ރިޓަޔާމަންޓަކުންނެވެ. އެޗްޕީއޭގެ ޑިރެކްޓާ ޖެނެރަލްގެ މަގާމުން ރިޓަޔާކުރެއްވި ނަމަވެސް ރާއްޖޭގެ ސިއްހީ ދާއިރާއަށް ބޭނުންވާ މުހިއްމު ކަންކަމުގައި، ބޭނުންވާ ހާލަތްތަކުގައި ހިދުމަތް ކުރެއްވުމުގައި މައިމޫނާ ދެމިހުންނަވާނެ ކަމަށް މައުލޫމާތު ލިބެއެވެ.
