ހުޅަނގުގެ ދަތިކުރުމުގެ ފިޔަވަޅުތަކުގެ ސަބަބުން ރަޝިޔާގައި ޓެލެގްރާމް މެސެޖިން އެޕް އިން ދޫކުރާ ގާތްގަނޑަކަށް 500 މިލިއަން ޑޮލަރުގެ ބޮންޑް ފްރީޒް ވެފައިވާ ކަމަށް ޚަބަރުތައް ބުނެފިއެވެ.

ޓެލެގްރާމް އިން ފާއިތުވި އަހަރުތަކުގައި ގިނަ ޢަދަދަކަށް ބޮންޑް އޮފާތަކެއް ނެރެފައިވާއިރު އޭގެ ތެރޭގައި މިދިޔަ އަހަރުގެ މެއި މަހު 1.7 ބިލިއަން ޑޮލަރުގެ ބޮންޑް އޮފާއެއް ވެސް ދޫކޮށްފައި ވެއެވެ.

މި އަހަރު މުއްދަތު ހަމަވާ ގިނަ ބޮންޑްތައް އެކުންފުނިން އަނބުރާ ގަނެފައިވާއިރު، ގާތްގަނޑަކަށް 500 މިލިއަން ޑޮލަރު އަދިވެސް އޮތީ ރަޝިޔާގެ ނޭޝަނަލް ސެޓްލްމަންޓް ޑިޕޮސިޓަރީ (އެންއެސްޑީ) ގައި ބްލޮކްކޮށްފައެވެ. މި ފައިސާތައް ބްލޮކް ކުރީ ދުނިޔޭގެ މާލީ އިދާރާތަކުންނެވެ. އެމެރިކާ އާއި ޔޫރަޕިއަން ޔޫނިއަނުންނާއި އިނގިރޭސީވިލާތުންނެވެ. އިންވެސްޓަރުންނަށް މި ފައިސާ ލިބޭނެ ހަމަ އެއްގޮތއް ވެސް ނުވިއެވެ. ރަޝިއާގެ އެންއެސްޑީ އަށް ދަތިކުރުމުގެ ފިޔަވަޅު އަޅާފައިވާތީ މި ފައިސާތައް މޫވް ކުރެވޭ ގޮތެއް ވަނީ ނުވެފައެވެ. ރަޝިއާގެ އެންއެސްޑީ އާއި ދެކޮޅަށް މި ފިޔަވަޅުތައް އެޅީ ޔޫކްރޭނު ހަނގުރާމަ އާއި ގުޅިގެންނެވެ.

ޓެލެގްރާމް އިން ބުނީ މިދިޔަ އަހަރުގެ ފުރަތަމަ ކުއާޓަރުގައި އާމްދަނީ ވަނީ %65 އަށްވުރެ އިތުރުވެ 870 މިލިއަން ޑޮލަރަށް އަރާފައެވެ. އެހެންނަމަވެސް ރިޕޯޓްތައް ބުނާ ގޮތުގައި އެ ކުންފުންޏަށް 222 މިލިއަން ޑޮލަރުގެ ގެއްލުމެއް ލިބިފައިވާއިރު، އޭގެ ކުރީ އަހަރުގެ މި މުއްދަތުގައި 334 މިލިއަން ޑޮލަރުގެ ސާފު ފައިދާއެއް ލިބިފައިވެއެވެ.

ސެއިންޓް ޕީޓާސްބާގަށް އުފަން ޑޫރޯވް 2014 ވަނަ އަހަރުން ފެށިގެން ދިރިއުޅެނީ ރަޝިއާއަކު ނޫނެވެ. ޑުބާއީގައެވެ. ސަބަބަކީ އޭނާ އުފެއްދި ވެބްސައިޓެއްގެ ޔޫޒަރ ޑޭޓާ ރަޝިޔާގެ ގާނޫނު ތަންފީޒުކުރާ ފަރާތްތަކާއި ހިއްސާ ކުރުމަށް ޕްރެޝަރު ކުރި ކަމަށް ބުނެއެވެ. އޭގެ މާގިނަ ދުވަހެއް ނުވެ އޭނާ ޓެލެގްރާމް އުފެއްދެވި އިރު، ފަހުން އެ ކުންފުނި ދުބާއީއަށް ބަދަލުކުރިއެވެ.

ފްރާންސް އަދި ޔޫއޭއީގެ ރައްޔިތުކަން ވެސް ލިބިފައިވާ ޑޫރޯވްގެ މައްސަލައެއް 2024 ވަނަ އަހަރުން ފެށިގެން ފްރާންސްގައި ދަނީ ތަހުގީގު ކުރަމުންނެވެ. އެއީ ރަޝިޔާ އާއި ގުޅުންހުރި މުހިންމު މަޢުލޫމާތުތަކެއް ޓެލެހްރާމުން ނުދީގެންނެވެ.

ފާހަގަކޮށްލަން ޖެހޭ ކަމަކީ މިދިޔަ އަހަރުގެ އޮގަސްޓް މަހުން ފެށިގެން ރަޝިޔާއިން ވަނީ ޓެލެގްރާމް އާއި ވަޓްސްއެޕްގައި ވޮއިސް އަދި ވީޑިއޯ ކޯލްތައް ބްލޮކް ކުރަން ފަށާފައެވެ.