15 މިނެޓުގެ ކުރު ވަގުތުކޮޅަކަށް ފަހު ރައްޔިތުންގެ މަޖިލީހުގެ މިއަދުގެ ޖަލްސާ ނިންމާލައިފި އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ދައުރުން ބޭރުން މިހާރު ބާއްވަމުން ގެންދާ ޖަލްސާތަކަކީ ވަކި މަސައްކަތްތަކަކަށް ހާއްސަކުރެވިގެން، މަޖިލީހުގެ 31 މެމްބަރަކު ސޮއިކުރައްވައި ހުށަހެޅުއްވި ހުށަހެޅުއްވުމަކާ ގުޅިގެން ބާއްވަމުން ގެންދާ ޖަލްސާތަކެއް ކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ރައީސްކަމުގެ މަގާމަށް، މި ސަރުކާރުގެ އެންމެ ފުރުތަމަ އެގްރިކަލްޗާ މިނިސްޓަރު ޑރ. އައިޝަތު ރަމީލާ އައްޔަންކުރެއްވުމަށް ވަނީ ފާސްކޮށްފަ އެވެ. އެ މަގާމަށް ޑރ. ރަމީލާ އައްޔަންކުރަން މަޖިލީހުން ފާސްކޮށްފައިވަނީ ވޯޓުގައި ބައިވެރިވި 38 މެމްބަރުންގެ އިއްތިފާގުންނެވެ. އެ މަގާމަށް ޑރ. ރަމީލާ އައްޔަންކުރަން ނުފެންނަ ކަމަށް އެއްވެސް މެމްބަރަކު ވޯޓު ދެއްވައިފައެއް ނުވެ އެވެ.
މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މިއަދުގެ އެޖެންޑާގައި ކުރަން ހުރި މަސައްކަތްތައް އެއްކޮށް ނިންމާލެވިއްޖެ ކަމަށާއި، އިތުރު މަސައްކަތެއް ކުރަން އެޖެންޑާގައި ނެތް ކަމަށެވެ. ބާކީ ދެން ހުރި މަސައްކަތްތަކަކީ ކޮމިޓީ މަރުހަލާގައި ކުރަން ހުރި މަސައްކަތްތައް ކަމަށް އޭނާ ފާހަގަކުރެއްވި އެވެ.
"އެއްގޮތަކަށްވެސް މީގެ މާނައަކީ ރައްޔިތުންގެ މަޖިލީހުގެ ޖަލްސާތަކުގައި ކުރާނެ މަސައްކަތް ނެތް ވާހަކައެއް ނޫން އަޅުގަނޑު މި ދަންނަވަނީކީ،" --- މަޖިލީހުގެ ރައީސް އަބްދުއްރަހީމް ވިދާޅުވި އެވެ.
މިހާރު ކުރިއަށް މިދާ މަޖިލީހުގެ ޖަލްސާތަކަކީ މަޖިލީހުގެ އާންމު ޖަލްސާތަކެއް ނޫން ކަމަށާއި މިއީ ވަކި ކަންކަމަކަށް ހާއްސަކުރެވިގެން ބާއްވާ ޖަލްސާތަކެއް ކަމަށް އަބްދުއްރަހީމް އިތުރަށް ވިދާޅުވި އެވެ.
