އަތޮޅުތެރޭގެ ސިއްހީ ނިޒާމު ހަރުދަނާކުރުމަށް ސަރުކާރުން ފައްޓަވާފައިވާ މަޝްރޫއުތަކުގެ ދަށުން އެކި މަރުހަލާތަކުގައި 39 ހޮސްޕިޓަލެއްގެ މަސައްކަތް މިހާރު ކުރިއަށްދާކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު އަތޮޅުތަކަށް ކުރެއްވި ދަތުރުފުޅުތަކުގައި ފާހަގަވި ކަންކަމަށް އަލިއަޅުއްވާލައްވަމުން މިނިސްޓަރު ވިދާޅުވީ، ރާއްޖޭގެ ގިނަ ރަށްތަކެއްގެ ސިއްހީ ދާއިރާގެ އުމްރާނީ ތަރައްގީ ވަރަށް ބޮޑަށް ވީރާނާވެފައިވާ ކަމަށެވެ. އަދި ބައެއް ތަންތަނަކީ ޖާގަ ކުޑަވުމުގެ ސަބަބުންނާއި އިމާރާތްތައް ބާވުމުގެ ސަބަބުން އެކަށީގެންވާ ގޮތެއްގައި ހިދުމަތް ނުދެވޭ ވަރަށް ހާލަތު ގޯސްވެފައިވާ ތަންތަން ކަމަށްވެސް މިނިސްޓަރު ފާހަގަކުރެއްވި އެވެ.
"އެކި މަރުހަލާތަކުގައި 39 ހޮސްޕިޓަލެއްގެ މަސައްކަތް އެބަ ކުރިއަށްދޭ. އެގޮތުން ބައެއް ތަންތަނަކީ މިހާރު ހޮސްޕިޓަލް ހުރި ތަންތަން އަޕްގްރޭޑް ކުރުން. އަނެއްބައި ތަންތަނަކީ މިހާރު ހޮސްޕިޓަލް ހުރި ތަންތަނުގެ ޖާގަ ނެތުމުގެ ސަބަބުން މުޅިން އާ އިމާރާތެއްގައި ހޮސްޕިޓަލް ގާއިމްކުރާ ތަންތަން،" މިނިސްޓަރު ނާޒިމް ވިދާޅުވި އެވެ.
Advertisement
ސިއްހީ ދާއިރާގެ އުމްރާނީ ތަރައްގީގެ ތަފްސީލް ހިއްސާކުރައްވަމުން މިނިސްޓަރު ވިދާޅުވީ، މުޅިން އަލަށް 19 ސިއްހީ މަރުކަޒު ގާއިމްކުރުމާއި، އެކްސްޓެންޝަން އަދި އަޕްގްރޭޑް ކުރުމުގެ 89 މަޝްރޫއަކާއެކު ޖުމްލަ 147 މަޝްރޫއެއް މިހާރުވެސް ކުރިއަށްދާ ކަމަށެވެ. މީގެ އިތުރުން ކުރިއަށް ރޭވިފައިވާ 22 ޕްރޮޖެކްޓެއްގެ ތެރޭގައި މުޅިން އަލަށް އިމާރާތްކުރާ 8 ހޮސްޕިޓަލަކާއި 5 ސިއްހީ މަރުކަޒުގެ އިތުރުން 9 އަޕްގްރޭޑިން މަޝްރޫއެއް ހިމެނޭ ކަމަށް މިނިސްޓަރު ވިދާޅުވި އެވެ. މިހާރުވެސް މިފަދަ 12 މަޝްރޫއެއްގެ މަސައްކަތް މުޅިން ނިމިފައިވާކަން މިނިސްޓަރު ފާހަގަކުރެއްވި އެވެ.
މިނިސްޓަރު ނާޒިމް ވިދާޅުވި ގޮތުގައި މި ސަރުކާރުން ކުރިއަށްގެންދާ މި ބިޔަ މަޝްރޫއުތަކަކީ ރާއްޖޭގެ ފަހުގެ ތާރީހެއްގައި ސިއްހީ ދާއިރާގެ އިންފްރާސްޓްރަކްޗާއަށް ނުކުރެވޭހާ ބޮޑު ހޭދައެއް ކުރެވިގެންދާނެ މަސައްކަތްތަކެކެވެ. މި މަސައްކަތްތަކުގެ މައިގަނޑު މަގްސަދަކީ ރައްޔިތުންނަށް ފެންވަރު ރަނގަޅު ސިއްހީ ހިދުމަތް ގާތުން ފޯރުކޮށްދިނުން ކަމަށްވެސް މިނިސްޓަރު ވިދާޅުވި އެވެ.
