ޤާހިރާ – ފަލަސްތީނުގެ ބިމުން އިސްރާއީލަށް ޖާގަ ދޭން ޖެހޭ ކަމަށާއި، އެއީ ދެދައުލަތުގެ ހައްލެއް ކަމަށް ބުނެ އިސްރާއީލާއި ޣައްޒާގެ މައްސަލައިގައި މިހާރު ކުރިޔަށްދާ މަޝްވަރާ ތަކުގެ ތެރެއިން ހަނގުރާމަ ހުއްޓާލުމުގެ އަވަސް އެއްބަސްވުމެއް އެކުލަވާލުމަށް މިސްރުގެ ރައީސް އަބްދުލް ފައްތާޙް އެލް ސީސީ އިލްތިމާސް ކުރައްވައިފިއެވެ.

އެމަނިކުފާނު މިހެން ވިދާޅުވެފައި ވަނީ ފްރާންސްގެ ފޮރިން މިނިސްޓަރު ސްޓެފަން ސެޖޯންއާ އެކު ހޮނިހިރު ދުވަހު ގާހިރާގައި ބޭއްވި ބައްދަލުވުމެއްގަ އެވެ.

ރައީސް ސީސީ ވަނީ މިހާރު ކުރިއަށްދާ މަޝްވަރާތަކުގެ އަވަސްކަން ފާހަގަކުރައްވައި، ޣައްޒާގައި ހިނގަމުންދާ ހަމަނުޖެހުންތަކުގެ ސަބަބުން "ނުރައްކާތެރި އަދި ނިމުމެއް ނެތް ނުތަނަވަސްކަމުގެ ދައުރެއް" ދަމަހައްޓަމުންދާ ކަމަށެވެ. އޭނާ ވަނީ މިހާރު ކުރެވެމުންދާ ޑިޕްލޮމެޓިކް މަސައްކަތްތަކުގެ ތެރެއިން މީހުންގެ ފުރާނަ ސަލާމަތްކޮށް، ސަރަހައްދުގައި ބިރުވެރިކަން އުފެދެމުންދާތީވެ، ސަރަހައްދީ ހަނގުރާމައެއްގެ އަސަރު ކުޑަކުރެވޭނެ އެއްބަސްވުމެއް ހޯދުމުގެ މުހިންމުކަން ފާހަގަކުރައްވާފައެވެ.

މީގެ އިތުރުން ސިސީ ވަނީ ހަނގުރާމައިގެ އަސްލު ސަބަބުތައް ހައްލުކުރުމަށް ހުރިހާ ފަރާތްތަކަށް ޕްރެޝަރު ކުރުމުގެ ޒިންމާ ދުނިޔޭގެ ބާރުގަދަ ގައުމުތަކާއި އދ މައްޗަށް އެބައޮތް ކަމަށް ވިދާޅވެފައެވެ. ފަލަސްތީނުގެ ދައުލަތެއް ގާއިމްކުރުމާއި ދެ ދައުލަތުގެ ހައްލެއް ތަންފީޒުކުރުމަކީ ދިގު މުއްދަތުގެ ސުލްހައަށް އެޅޭ މުހިންމު ފިޔަވަޅުތަކެއްގެ ގޮތުގައި ތަކުރާރުކޮށް ސީސީ ވިދާޅުވި އެވެ.

ފްރާންސްގެ ފޮރިން މިނިސްޓަރު ސްޓެފަން ސެޖޯން ވަނީ ފްރާންސްގެ ޑިޕްލޮމެޓިކް އިސްނެގުމާ ބެހޭ މައުލޫމާތު ސީސީއަށް ދެއްވާފަ އެވެ. ސެޖޯން ޤާހިރާއަށް ކުރައްވާ ދަތުރުފުޅަކީ ލުބުނާނާއި އިސްރާއީލުގައި ބާއްވާ ބައްދަލުވުންތަކަށް ފަހު ކުރިއަށް ގެންދާ ދަތުރުފުޅެއް ކަމަށާއި އޭނާގެ ދަތުރުގެ މަގުސަދަކީ ހަނގުރާމަ ހުއްޓާލުމާއި ގައިދީން ބަދަލުކުރުމަށް މަގުފަހިކޮށްދިނުމެވެ.

މިދިޔަ އޮކްޓޯބަރު މަހު ޣައްޒާގައި އިސްރާއީލުގެ އަސްކަރީ ބާރުތަކުން ވަނީ ފަލަސްތީނުގެ 40،000 އަށް ވުރެ ގިނަ މީހުން ޝަހީދު ކޮށްލާފައެވެ. މީގެތެރެއިން ގިނައީ އަންހެނުންނާއި ކުޑަކުދިންނެވެ. 

މިސްރަކީ މިހނގުރާމައި ޣަައްޒާއަށް ވަދެ ނުކުމެވޭ ބޯޑަރުގެ ކޮންޓުރޯލް ކުރުމަށް އިސްރާއީލަށް ހުއްދަ ދީފައިވާ މުސްލިމު ވެރިކަމެއް އޮންނަ ގައުމެއްކަންވެސް ފާހަގަ ކުރެވެއެވެ.