ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށް ބޭއްވުމަށް ހުށަހެޅި އިސްލާހުގެ ބިލު ރައްޔިތުންގެ މަޖިލީހަށް މިއަދު ބަލައިގެންފި އެވެ. 

ސަރުކާރުގެ ފަރާތުން އިނގުރައިދޫ ދާއިރާގެ މެންބަރު އިބްރާހިމް ފަލާހު ހުށަހެޅުއްވި މި އިސްލާހު މަޖިލީހަށް ބަލައިގަތީ 46 މެމްބަރުންގެ އިއްތިފާގުންނެވެ. މި އިސްލާހާ ދެކޮޅަށް ވޯޓު ދެއްވީ ފަސް މެމްބަރުންނެވެ. އެއީ އެމްޑީޕީއަށް ނިސްބަތްވާ ފަސް މެމްބަރުންނެވެ. މަޖިލީހަށް ބިލު ބަލައިގަނެ، އެ ބިލު މިހާރު ވަނީ މިނިވަން މުއައްސަސާތަކާ ބެހޭ ކޮމިޓީއަށް ފޮނުވައިފަ އެވެ.

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށް ބާއްވަން ގާނޫނު އަސާސީއަށް ގެންނަންޖެހޭ ބަދަލުތައް ގެނައުމަށް އެމްޑީޕީން ދެކޮޅު ހަދާކަން ހާމަކުރެއްވީ އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ އެވެ. ދެ އިންތިހާބު އެއްކޮށްލަން އެމްޑީޕީ ތާއީދު ނުކުރާނެ ކަމަށާއި، ހަރަދު ކުޑަކުރުމުގެ ނަމުގައި ގާނޫނު އަސާސީ ބަދަލުކޮށްގެން އެ ބަދަލު ގެންނަން އުޅެނީ ވެރިކަން ދެމެހެއްޓުމަށް ކަމަށް އޭނާ ވަނީ ތުހުމަތު ކުރައްވައިފަ އެވެ.

އެގޮތުން ސަރުކާރުން މަސައްްކަތް ކުރަނީ 10 އަހަރު ދުވަހަށް ވެރިކަން ދަންމާލަން ކަމަށް ގަފޫރު ވަނީ ތުހުމަތު ކުރައްވައިފަ އެވެ.

ހަރަދުބޮޑުވެގެން އެއްކޮށްލާނަމަ އެއްކޮށްލާނީ ރިޔާސީ އިންތިހާބާއި ކައުންސިލް އިންތިހާބު ކަމަށް ގަފޫރު ވިދާޅުވި އެވެ. އަދި ރިޔާސީ އިންތިހާބާއި މަޖިލީހުގެ އިންތިހާބު އެއްކޮށް ބޭއްވުމުގެ ބަދަލުގައި ރިޔާސީ އިންތިހާބާއި ކައުންސިލް އިންތިހާބު އެއްކޮށްލައި، ދައުރުގެ މެދު ތެރެއިން މަޖިލިސް އިންތިހާބު ބާއްވަން ރަނގަޅު ކަމަށް ވެސް އޭނާ ވިދާޅުވި އެވެ.

ދެ އިންތިހާބު އެއްކޮށްލުމަކީ ދައުލަތުގެ ހަރަދުކުޑަވާނެ ކަމަށް ބުނާ ބުނުމަކީ ދޮގެއް ކަމަށާއި، ޕަބްލިކް ވޯކްސްއަށް 500 މީހުން ވައްދަން މިހާރުވެސް އިއުލާނުކޮށްފައިވާ ކަމަށް ގަފޫރު ވަނީ ތުހުމަތު ކުރައްވައިފަ އެވެ. އަދި އެއީ 72 މިލިޔަން ރުފިޔާ އަހަރަކު ހަރަދުވާނެ ކަމެއް ކަމަށް ގަފޫރު ވިދާޅުވި އެވެ.

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން އުޅެނީ ހެޔޮނިޔަތުގައި ނޫން ކަމަށާއި، އެއީ ރަނގަޅު ދިރާސާއެއް ކުރެވިގެން ކުރާ ކަމެއް ނޫންކަމަށް ވެސް އޭނާ އިތުރަށް ވިދާޅުވި އެވެ.